دۇنيەجۇزىلىك قازاق كۇرەسى فەدەراتسياسى برازيليادا پانامەريكا چەمپيوناتىن وتكىزدى.
برازيليا تورىنە توسەلگەن كىلەمگە لاتىن امەريكاسىنىڭ مەكسيكا, برازيليا, پاراگۆاي, ۋرۋگۆاي, پەرۋ, چيلي, كولۋمبيا, ارگەنتينا ەلدەرىنىڭ بالۋاندارى قاتىستى.
پانامەريكا چەمپيوناتىندا سەگىز ەلدىڭ بالۋاندارى 80 جانە 80 كەلىدەن جوعارى سالماق دارەجەسىندە كۇرەسكە ءتۇستى.
دۇنيەجۇزىلىك قازاق كۇرەسى فەدەراتسياسىنىڭ ءبىرىنشى ۆيتسە-پرەزيدەنتى سەرىك تۇكيەۆ ەلىمىزدەن بارعان دەلەگاتسيانى باستاپ باردى. ۇيرەتۋشى مامان رەتىندە كۇرتەشە كيىپ, كىلەمگە دە شىقتى. باپكەر بولىپ تالاي بالۋاننىڭ توماعاسىن سىپىرعان مامان لاتىن امەريكاسىنداعى اتان جىلىك, ءاپايتوس بالۋاندارعا ۇلتتىق كۇرەسىمىزدىڭ ءادىس-ءتاسىلى مەن ەرەكشەلىگىن ۇيرەتتى.
نۇرلىبەك ەرماعامبەتوۆ برازيليا جەرىندە بالۋاندارعا بەلدەسۋدىڭ قىر-سىرىن ۇيرەتۋمەن بىرگە باپكەرلەرگە, تورەشىلەرگە ارنايى سەمينار, كەڭەستەر وتكىزدى.
«قازاق كۇرەسىنەن پانامەريكا چەمپيوناتىن وتكىزۋدەگى ماقساتىمىز – ۇلتتىق كۇرەسىمىزدىڭ ناسيحاتىن ارتتىرۋ. الداعى ۋاقىتتا لاتىن امەريكاسى ەلدەرىندە قازاق كۇرەسىنىڭ فەدەراتسيالارى اشىلىپ, ۇلتتىق سپورتىمىزبەن شۇعىلدانۋشىلاردىڭ سانى كوبەيسە – ەڭبەگىمىزدىڭ اقتالعانى. ءبىزدىڭ باستى مۇراتىمىز – قازاق كۇرەسىن جازعى وليمپيادا ويىندارىنىڭ باعدارلاماسىنا ەنگىزۋ. اللا ءساتىن سالسا, ول كۇنگە دە جەتەمىز. قازاق كۇرەسىنەن الەمنىڭ 40-قا جۋىق ەلىندە فەدەراتسيالار اشىلدى. الەمنىڭ 80-نەن استام ەلىندە فەدەراتسيامىز اشىلىپ, ۇلتتىق كۇرەسىمىز كەڭىنەن تارالسا, بىزگە وليمپيادا ويىندارىنا جول كەڭىنەن اشىلادى. پانامەريكا چەمپيوناتىن ۇيىمداستىرۋداعى, ارنايى سەمينار, كەڭەستەر وتكىزۋدەگى كوزدەگەنىمىز دە وسى قۇرلىقتا فەدەراتسيالار اشۋ», – دەيدى سەرىك ادام ۇلى.
دزيۋدو كۇرەسى مەن جەكپە-جەك سپورتىنا وتە بەيىم الىپ دەنەلى پانامەريكالىقتار ۇلتتىق كۇرەسىمىزبەن شۇعىلدانۋعا ەرەكشە ىقىلاس تانىتتى دەيدى بىرىنشىلىكتى ۇيىمداستىرۋشىلار.