پرەمەر-مينيستر باقىتجان ساعىنتاەۆتىڭ توراعالىعىمەن وتكەن ۇكىمەت وتىرىسىندا ونەركاسىپتىك قاۋىپسىزدىكتى قامتاماسىز ەتۋ ماسەلەلەرى قارالدى.
ينۆەستيتسيالار جانە دامۋ ءمينيسترى جەڭىس قاسىمبەك ونەركاسىپتىك قاۋىپسىزدىك سالاسىنداعى مەملەكەتتىك ساياساتتى ىسكە اسىرۋ بارىسى تۋرالى مالىمدەدى.
«سوڭعى جىلدارى جاسالعان احۋالدىق تالداۋ قاۋىپتى وندىرىستىك نىسانداردىڭ اپاتسىز جۇمىسى وڭ قارقىنعا يە ەكەنىن كورسەتتى. ماسەلەن, 2016 جىلى اپاتتار سانى 2008 جىلمەن سالىستىرعاندا 60%-عا تومەندەگەن, اپات سالدارىنان زارداپ شەككەندەر سانى شامامەن ءتورت ەسەگە قىسقارعان», — دەدى جەڭىس قاسىمبەك.
ءمينيستردىڭ ايتۋىنشا, جازاتايىم وقيعالار سانىن ازايتۋدىڭ نەگىزگى سەبەپتەرى — ونەركاسىپتىك قاۋىپسىزدىك سالاسىندا قاۋىپتى باعالاۋ جۇيەسىن ەنگىزۋ, ونەركاسىپتىك قاۋىپسىزدىك سالاسىنداعى نورماتيۆتىك-قۇقىقتىق بازانى جەتىلدىرۋ, ۋاكىلەتتى ورگان مەن باقىلاناتىن كاسىپورىندار اراسىنداعى سىندارلى ءوزارا ءىس-قيمىل جاساۋ ارقىلى اپاتتاردىڭ الدىن الۋ جانە وعان جول بەرمەۋ جۇمىستارىن كۇشەيتۋ.
سونىمەن قاتار, مينيستر جابدىقتاردىڭ, عيماراتتار مەن قۇرىلىستاردىڭ ەسكىرۋى, سونداي-اق قاۋىپتى وندىرىستىك نىسان يەلەرىنىڭ ونەركاسىپتىك قاۋىپسىزدىك تالاپتارىن ساقتاماۋى وندىرىستىك قاۋىپسىزدىك جاعدايىنا تەرىس اسەرىن تيگىزەتىنىنە نازار اۋداردى. وسىعان بايلانىستى, ۆەدومستۆو ونەركاسىپتىك كاسىپورىنداردى ءوندىرىستى جاڭعىرتۋ مەن اۆتوماتتاندىرۋعا ىنتالاندىرۋ بويىنشا جۇمىستار جۇرگىزىپ جاتىر.
«قازىردىڭ وزىندە ERG, KazZinc سەكىلدى كاسىپورىندار «اقىلدى كارەر», قىزمەتكەرلەردى ءموبيلدى باسقارۋ, «اقىلدى فابريكا» سەكىلدى يندۋستريا 4.0 ەلەمەنتتەرىن ەنگىزۋ بويىنشا جۇمىستار جۇرگىزىپ جاتىر. KazMinerals كاسىپورىندارىندا (اقتوعاي جانە بوزشاكول) ءوندىرىستى ديسپەتچەرلەۋ مەن وڭتايلاندىرۋ جۇيەسى ەنگىزىلگەن. «التىنتاۋ كوكشەتاۋ» اق-دا ونلاين رەجيمدە كارەرگە مونيتورينگ جۇرگىزۋ جانە ونەركاسىپتىك ينتەرنەت جۇيەسى ەنگىزىلگەن. جۇيەقۇرۋشى كاسىپورىنداردىڭ كوپتەگەن كەنىشتەرىندە قىزمەتكەرلەردى قۇلاقتاندىرۋ جانە جايعاستىرۋ جۇيەلەرى ىسكە اسىرىلعان. وڭدەۋ ونەركاسىبىندە «سارىارقااۆتوونەركاسىپ» جشس, «جىگەرمۇنايسەرۆيس» جشس, «قاينار-اكب» جشس سەكىلدى كەيبىر كاسىپورىنداردا روبوتتالعان دەربەس كەشەندەر قولدانىلۋدا», — دەدى ينۆەستيتسيالار جانە دامۋ ءمينيسترى.
بۇدان وزگە, قازىرگى زامانعى نورمالار مەن حالىقارالىق تەحنولوگيالىق تالاپتارعا سايكەس نورماتيۆتىك-قۇقىقتىق بازانى جەتىلدىرۋ ماقساتىندا «قر كەيبىر زاڭنامالىق اكتىلەرىنە ونەركاسىپتىك قاۋىپسىزدىك ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنىڭ تۇجىرىمداماسى ازىرلەنىپ جاتىر.
سونىمەن قاتار, ەلباسىنىڭ مەملەكەتتىك باقىلاۋ جانە قاداعالاۋ فۋنكتسيالارىنىڭ اۋقىمدى تەكسەرىسىن جۇرگىزۋ تۋرالى تاپسىرماسىنا سايكەس ونەركاسىپتىك قاۋىپسىزدىك سالاسىنداعى فۋنكتسيالاردىڭ 30% قىسقارتىلادى.
قورىتىندىلاي كەلە, بايانداماشى اتالعان مىندەتتەردى جۇزەگە اسىرۋ قازاقستاندىقتاردىڭ ءومىرى مەن دەنساۋلىعىن ساقتاي وتىرىپ, قاۋىپتى وندىرىستىك نىسانداردىڭ اپاتتى جاعدايلارىن تومەندەتۋگە مۇمكىندىك بەرەتىنىن ايتتى.