پرەمەر-مينيستر باقىتجان ساعىنتاەۆتىڭ توراعالىعىمەن وتكەن ۇكىمەت وتىرىسىندا ۇكىمەت مۇشەلەرى ءبىراۋىزدان قازاقستاننىڭ 2025 جىلعا دەيىنگى ستراتەگيالىق دامۋ جوسپارىن قولداپ, مەملەكەت باسشىسىنىڭ قاراۋىنا جىبەردى.
ۇلتتىق ەكونوميكا ءمينيسترى تيمۋر سۇلەيمەنوۆتىڭ ايتۋىنشا, ستراتەگيالىق جوسپاردىڭ باستى ماقساتى — 2025 جىلعا دەيىن ساپالى ءارى تابىستى ەكونوميكا ءوسىمىن قامتاماسىز ەتۋ, ەىدۇ-عا مۇشە ەلدەرمەن سالىستىرۋعا كەلەتىن ءومىر ءسۇرۋ دەڭگەيىنە جەتۋ. جوباعا سايكەس, جىلىنا كەم دەگەندە 4,5-5% دەڭگەيىندە ەكونوميكا وسىمىنە قول جەتكىزۋ جوسپارلانىپ وتىر, بۇل قازاقستانعا جان باسىنا شاققانداعى ءجىو ءوسىم دەڭگەيىن 2025 جىلعا قاراي 46 100 $ (سقت بويىنشا) دەيىن قامتاماسىز ەتۋگە مۇمكىندىك بەرەدى.
ت. سۇلەيمەنوۆتىڭ ايتۋىنشا, قۇجات جوباسى ءتۇرلى دەڭگەيدە تالقىلاۋدىڭ ءتورت كەزەڭىنەن ءوتتى, سونىڭ ىشىندە حالىقارالىق ۇيىمداردىڭ ساراپتامالىق باعالاۋى دا بار.
ماسەلەنى قاراۋ قورىتىندىسى بويىنشا, ستراتەگيالىق جوسپار جوباسىن قر ۇكىمەتىنىڭ مۇشەلەرى ءبىراۋىزدان قولداپ, مەملەكەت باسشىسىنىڭ قاراۋىنا جىبەردى.
باقىتجان ساعىنتاەۆ بۇنىڭ وتە ماڭىزدى قۇجات ەكەنىن اتاپ ءوتتى. جوبا استانا مەن الماتىنىڭ ءتۇرلى الاڭدارىندا قارالدى. سوڭعى تالقىلاۋ وتاندىق ساراپشىلاردىڭ قاتىسۋىمەن كەشە وتكىزىلدى.
«مەملەكەت باسشىسىنىڭ بيىلعى جولداۋىنداعى تاپسىرماسىنا سايكەس, ەكونوميكالىق ءوسىمنىڭ جاڭا مودەلىن قۇرۋدى جانە حالىقتىڭ ءال-اۋقاتىن جاقسارتۋدى كوزدەيتىن قۇجات ازىرلەندى. اتالعان قۇجات ەلىمىزدىڭ نەگىزگى ستراتەگيالىق قۇجاتى – «قازاقستان-2050»-ءدى ىسكە اسىرۋعا باعىتتالعان. ماقسات – 30 وزىق دامىعان ەل قاتارىنا قوسىلۋ», — دەدى ب. ساعىنتاەۆ.
وسىعان وراي, جۇرتشىلىققا دۇرىس ءارى تۇسىنىكتى تىلمەن اتالعان ستراتەگيالىق قۇجاتتىڭ ءمانىن ءتۇسىندىرۋ قاجەت. باقىتجان ساعىنتاەۆ ۇلتتىق ەكونوميكا مينيسترلىگىنە اقپارات جانە كوممۋنيكاتسيالار مينيسترلىگىمەن, وزگە دە مۇددەلى مەملەكەتتىك ورگاندارمەن بىرلەسىپ ءتيىستى جۇمىستى قولعا الۋدى تاپسىردى.