بۇگىندە اتالعان جوبا اياسىندا 102 ۇمىتكەر ىرىكتەلدى, دەپ xابارلايدى قازاقپارات.
«100 جاڭا ەسىمنىڭ» بىرىنشى كەزەڭى اياقتالدى. سونىڭ قورىتىندىسى بويىنشا ءبىز 102 ادامدى ىرىكتەپ الدىق. ولاردىڭ ومىرلىك جولى مەن كۇندەلىكتى قىزمەتى بولاشاق ۇرپاققا ۇلگى بولا الادى. «100 جاڭا ەسىم» جاڭا كوزقاراستى, جاڭاشا ويلاۋدى قالىپتاستىرادى دەگەن ۇلكەن سەنىم بار. بۇگىن كىشىگىرىم قۇپيانى دا اشىپ بەرە الامىن. جىلدىڭ اياعىنا دەيىن ءبىز «100 جاڭا ەسىمگە» كىرەتىندەردىڭ ەلباسى نۇرسۇلتان نازارباەۆپەن كەزدەسۋىن ۇيىمداستىرۋدى جوسپارلاپ وتىرمىز», - دەدى اقپارات جانە كوممۋنيكاتسيالار ءمينيسترى داۋرەن اباەۆ استاناداعى xالىقارالىق كونفەرەنتسيادا.
ءمينيستردىڭ ايتۋىنشا, «تسيفرلىق قازاقستان» مەملەكەتتىك باعدارلاماسى دا قوعام ءومىرىنىڭ سان سالاسىن جاڭعىرتۋدى كوزدەيدى. سونىڭ اياسىندا ەل ەكونوميكاسىنا اقپاراتتىق تەxنولوگيالار كەڭىنەن ەنگىزىلەدى, يننوۆاتسيالاردى جان-جاقتى قولدانۋعا جول اشىلادى. مەكتەپتەر مەن جوعارى وقۋ ورىندارىنىڭ ءبىلىم بەرۋ جوسپارلارى زامان تالابىنا قاراي وزگەرەتىن بولادى. ۇزدىك ۋنيۆەرسيتەتتەردە اقپاراتتىق-كوممۋنيكاتسيالىق كافەدرالار اشىلىپ, باعدارلامالاۋ نەگىزدەرىنە ارنالعان ساباقتار ەنگىزىلەدى. جاڭا تەxنولوگيالاردى قولدانۋ جاعىنان مۇعالىمدەردىڭ دايىندىعىن ارتتىرۋعا باسا نازار اۋدارىلادى.
«وسىلايشا, ادام كاپيتالىن دامىتۋ ارقىلى ءبىز سانانى جاڭعىرتۋعا قاتىستى ناقتى ماقسات-مىندەتتەردى ورىنداي الامىز», - دەپ اتاپ كورسەتتى داۋرەن اسكەربەك ۇلى.
ايتا كەتەيىك, ەلوردادا «جاڭا جاھاندىق بولمىستاعى قازاقستاننىڭ جاڭعىرۋ مودەلى» تاقىرىبىندا xالىقارالىق پارلامەنتتىك كونفەرەنتسيا باستالدى. اتالعان شارا قر تۇڭعىش پرەزيدەنتى كۇنىنە ارنالىپ وتىر. ماجىلىسكە رەسەي, ازەربايجان, تۇركيا, وزبەكستان, ارمەنيا, يتاليا, يسپانيا, قىتاي, بىرىككەن اراب امىرلىكتەرى, بولگاريا, ماجارستان جانە تاعى باسقا ۇزىن سانى ون بەس ەلدىڭ دەلەگاتتارى قاتىسۋدا. بۇدان بولەك, اقش-تىڭ ساراپشىلارى دا كەلدى.