تاياۋدا اقش بيلىگى سولتۇستىك كورەيانى تەرروريزمدى قولدايتىن مەملەكەتتەر تىزىمىنە ەنگىزگەن بولاتىن. ءوز كەزەگىندە پحەنيان اق ءۇيدىڭ بۇل ارەكەتىن ارانداتۋشىلىققا بالاپ, ەلدەگى يادرولىق قارۋ باعدارلاماسىن ودان ءارى كۇشەيتەتىنىن جەتكىزگەن.
Korean Central News اگەنتتىگىنە بەرگەن سۇحباتىندا سولتۇستىك كورەيا سىرتقى ىستەر مينيسترلىگىنىڭ وكىلى ء«بىزدىڭ ۇلى ەلىمىزدى «تەرروريزم» تىزىمىنە ەنگىزۋگە ءداتى بارعان وڭباعان بۇزاقىلارعا اسكەرىمىز بەن حالقىمىزدىڭ اشۋى ءورشىپ تۇر», دەپ مالىمدەدى. Al Jazeera ارناسىنىڭ حابارلاۋىنشا, كەيبىر ساراپشىلار اق ءۇي بيلىگىنىڭ ارەكەتى سولتۇستىك كورەيانىڭ شىمبايىنا باتىپ, يادرولىق قارۋدى يگەرۋگە قۇلشىنىسىن ودان ءارى كۇشەيتىپ جىبەرەتىنىنەن قاۋىپتەنەدى.
«سىرتقى ىستەر ءمينيسترىنىڭ وكىلى تەرروريزمدى قولداپ وتىرعان مەملەكەت دەپ ايىپتاۋ امەريكالىق اۆتوريتارلىق جۇيەنىڭ قۇرالى ەكەنىن جانە ولاردىڭ ءوز كوزقاراسىنا ساي كەلمەيتىندەردى سىرىپ تاستاۋعا تالپىنۋ ەكەنىن ايتتى. بۇعان دەيىن اقش پرەزيدەنتى دونالد ترامپ سولتۇستىك كورەيانى يادرولىق قارۋ ارقىلى الەمگە قاۋىپ توندىرۋدەن بولەك, حالىقارالىق تەرروريزمدى قولداپ وتىرعانىن مالىمدەگەن», دەيدى Al Jazeera ارناسى.
جالپى, اقش پەن سولتۇستىك كورەيانىڭ ارازدىعى بۇگىن باستالعان جوق. بۇعان دەيىن كحدر بىرنەشە مارتە يادرولىق قارۋىن سىناقتان وتكىزىپ, قۇرلىقارالىق بالليستيكالىق زىمىراندارىن ۇشىرعان-دى. اق ءۇي باسشىسى د.ترامپ سولتۇستىك كورەيانىڭ بۇل ارەكەتىن ايىپتاپ, قارۋلى قارسىلىق كورسەتۋگە ءازىر ەكەنىن جەتكىزدى. ءوز كەزەگىندە كيم چەن ىن دا كەز كەلگەن ۋاقىتتا امەريكانىڭ ك ۇلىن كوككە ۇشىرۋعا دايىن ەكەنىن مالىمدەدى. ەكى باسشىنىڭ ءسوز قاقتىعىسى ءبىراز جەرگە بارىپ باسىلعان-دى.
سولتۇستىك كورەيا سىرتقا ءجۇنىن قامپايتىپ كورسەتۋگە تالپىنعانىمەن, ەلدەگى جاعداي ءماز ەمەس. تاياۋدا كحدر اسكەرىنەن قاشقان ساربازدىڭ ۆيدەوسى جەر جاھاندى شارلاپ كەتكەن بولاتىن. ءوز ەلىنەن باس ساۋعالاعان سولتۇستىككورەيالىق ازامات وڭتۇستىك كورەيامەن اراداعى شەكاراعا ولەرمەندىكپەن ۇمتىلعان-دى. كحدر شەكاراشىلارى زاڭ بۇزۋشىنى قۋالاپ, بىرنەشە جەردەن جارالادى. الايدا وق تيگەنىنە قاراماستان, ول كورشى ەلدىڭ ايماعىنا ءوتىپ ۇلگەرگەن. مۇنداي وقيعا كۋا بولعان وڭتۇستىك كورەيانىڭ شەكاراشىلارى بەيباققا كومەك قولىن سوزىپتى. ساربازدىڭ دەنساۋلىعىن باقىلاعان دارىگەرلەر ونىڭ دەنەسىنەن 27 سانتيمەترلىك ىشەك قۇرتىن تاۋىپ الدى. قازىر قاشقىننىڭ جاعدايى ءتاۋىر. BBC ارناسىنىڭ حابارلاۋىنشا, ەرەسەك ادامنىڭ دەنەسىندە ۇزىن ىشەك قۇرتتىڭ بولۋى ەلدەگى جاعدايدىڭ ناشارلىعىن كورسەتەدى.
شولۋدى ازىرلەگەن اباي اسانكەلدى ۇلى, «ەگەمەن قازاقستان»