مەملەكەتتىك حاتشى گۇلشارا ابدىقالىقوۆانىڭ توراعالىعىمەن پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ وتىرىسى ءوتتى.
جيىندى اشقان گ.ابدىقالىقوۆا ەلباسى ن.نازارباەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋى ۇلتتىق كوميسسيانىڭ جۇمىسىنا تىڭ سەرپىن بەرگەنىنە توقتالدى.
«ەلباسى «بولاشاققا باعدار: رۋحاني جاڭعىرۋ» ماقالاسىندا «زامان سىنىنان سۇرىنبەي وتكەن وزىق داستۇرلەردى تابىستى جاڭعىرۋدىڭ ماڭىزدى العىشارتتارىنا اينالدىرا ءبىلۋ قاجەت. ەگەر جاڭعىرۋ ەلدىڭ ۇلتتىق-رۋحاني تامىرىنان ءنار الا الماسا, ول اداسۋعا باستايدى» دەپ اتاپ وتكەن بولاتىن. وسكەلەڭ ۇرپاق بويىندا جات ۇعىمدارعا قارسى تۇرا الاتىن يممۋنيتەت قالىپتاستىرۋ, وتباسى قۇندىلىقتارىن, قازاقستان حالقىنىڭ وزىق داستۇرلەرىن دارىپتەۋ – ماڭىزدى باعىت. بۇل ءىستىڭ ناتيجەلى بولۋى مەملەكەتتىك ورگاندار مەن قوعامدىق ينستيتۋتتاردىڭ ءوزارا ءتيىمدى ءىس-قيمىلىنا بايلانىستى», دەدى گ.ابدىقالىقوۆا.
كوميسسيا وتىرىسىندا قىزىلوردا جانە پاۆلودار وبلىستارىنداعى وتباسىلىق جانە گەندەرلىك ساياسات تۇجىرىمداماسىن ىسكە اسىرۋ بويىنشا 2017-2019 جىلدارعا ارنالعان ءىس-شارالار جوسپارىنىڭ ورىندالۋ بارىسى جونىندە بايانداما جاسالدى.
پاۆلودار وبلىسىندا ءونىمدى ەڭبەكپەن اينالىسۋ جانە جاپپاي كاسىپكەرلىكتى دامىتۋ بويىنشا جۇمىستار بەلسەندى جۇرگىزىلىپ كەلەدى. جىل باسىنان بەرى 329 نازىك جاندى سۇرانىسقا يە 52 ماماندىق بويىنشا ءتالىم الدى. وبلىستاعى اۋىل ايماقتاردا ايەلدەردىڭ كوشباسشىلىق قابىلەتىن ارتتىرۋعا ارنالعان مەكتەپتەردى دامىتۋ جۇمىستارى ىستەلىپ جاتىر. ماسەلەن, باياناۋىل اۋدانىندا تاعى ءبىر وسىنداي مەكتەپ اشىلدى.
جالپى پاۆلودار وبلىسى قىزمەت اتقاراتىن ايەل زاتىنىڭ سانى بويىنشا ۇزدىك ءۇش ءوڭىردىڭ قاتارىنا كىرەدى. وندا نازىك جاندىلاردىڭ 30 پايىزى جەرگىلىكتى وكىلەتتى مەكەمەلەردە جۇمىس ىستەيدى. اۋداندىق ءماسليحات دەپۋتاتتارىنىڭ اراسىنداعى ايەلدەردىڭ سانى 29,4 پايىز, قالالىق ءماسليحاتتا 27,3 پايىز, وبلىستىق ءماسليحاتتا 21,9 پايىزدى قۇرايدى. وبلىس اكىمىنىڭ ورىنباسارى مەيرام بەگەنتاەۆتىڭ ايتۋىنشا, وتباسىلىق جانە گەندەرلىك ساياساتتى ءتيىمدى جۇرگىزۋدىڭ ناتيجەسىندە ايماقتا جەتىم بالالاردىڭ سانى ازايعان. سونىڭ ناتيجەسىندە, بالالار ءۇيىنىڭ ءبىرى جابىلىپ, عيمارات ورنىنا لاگەر اشىلعان.
قىزىلوردا وبلىسىندا «رۋحاني جاڭعىرۋ» باعدارلاماسى اياسىندا وڭىردە 135 شارا ۇيىمداستىرىلىپ, ولارعا 7 مىڭعا جۋىق جاستار قاتىستى. سونداي-اق, قىسقا مەرزىمدە كاسىبي ماماندار دايىنداۋ ءۇشىن ەكى مىڭنان استام جۇمىسسىز ادام وقۋعا جىبەرىلدى. سولاردىڭ 70,2 پايىزى نازىك جاندىلار ەكەن. «باستاۋ-بيزنەس» جوباسى بويىنشا 320 ايەل ارنايى ترەنينگتەن ءوتىپ, سونىڭ 124-ءى شاعىن نەسيە الىپ, 54-ءى ءوز كاسىبىن ءۇيىرىپ اكەتكەن.
سونىمەن قاتار, جيىندا 2018 جىلعى اقپاندا بۇۇ-نىڭ سالالىق كوميتەتىنە ۇسىنىلاتىن ايەلدەرگە قاتىستى كەمسىتۋشىلىكتىڭ بارلىق ءتۇرىن جويۋ تۋرالى كونۆەنتسيانىڭ ورىندالۋ بارىسى تۋرالى قازاقستان رەسپۋبليكاسىنىڭ كەزەكتى بەسىنشى بايانداماسىنىڭ جوباسى تانىستىرىلدى.
اباي اسانكەلدى ۇلى,
«ەگەمەن قازاقستان»