قازاق مەملەكەتتىك قىزدار پەداگوگيكالىق ۋنيۆەرسيتەتىندە ء«تىل پاراسات» رەسپۋبليكالىق بايقاۋى ءوتتى. قازاق ءتىلىن جەتىك مەڭگەرگەن ەتنوس جاستارى اراسىندا ۇيىمداستىرىلعان سايىس جوعارى وقۋ ورىندارىنىڭ ستۋدەنتتەرىنىڭ اراسىندا جۇرگىزىلدى. بۇل تۋرالى قىزدار ۋنيۆەرسيتەتىنىڭ ءباسپاسوز قىزمەتى حابارلادى.
شارانى ۇيىمداستىرۋشى – قازاقستان رەسپۋبليكاسى مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي جۇمىس كوميتەتىنىڭ تاپسىرماسىمەن ش. شاياحمەتوۆ اتىنداعى تىلدەردى دامىتۋدىڭ رەسپۋبليكالىق ۇيلەستىرۋ-ادىستەمەلىك ورتالىعى. ماقسات – قازاق ءتىلىنىڭ قولدانىلۋ اياسىن كەڭەيتۋ, ءتىل مادەنيەتىن كوتەرۋ, ەتنوس وكىلدەرىن ىنتالاندىرۋ جانە تالانتتى جاستاردى انىقتاپ, قولداۋ كورسەتۋ.
بايقاۋدىڭ اشىلۋ راسىمىندە سويلەگەن بەلگىلى قوعام قايراتكەرى, شايسۇلتان شاياحمەتوۆ اتىنداعى تىلدەردى دامىتۋدىڭ رەسپۋبليكالىق ۇيلەستىرۋ-ادىستەمەلىك ورتالىعىنىڭ ديرەكتورىنىڭ ورىنباسارى ورازكۇل اسانعازىقىزى وسى تاقىلەتتەس سايىستار مەملەكەتتىك ءتىلدىڭ كوسەگەسىن كوگەرتۋگە زور ىقپال ەتەتىندىگىن جەتكىزدى.
– ەلىمىز تاۋەلسىز ەل اتانعانىنا جيىرما التى جىلدىڭ ءجۇزى بولدى. وسى جىلدار ارالىعىندا قازاقستان وتپەلى كەزەڭدى باسىنان وتكەرگەنى بارلىعىمىزعا بەلگىلى. تاۋەلسىزدىك جىلدارىندا ەڭ كوپ ايتىلعان ءھام جازىلعان تاقىرىپتىڭ ءبىرى – مەملەكەتتىك ءتىلدىڭ احۋالى. دەسە دە كەڭەس وداعى تۇسىنداعى جاعدايعا قاراعاندا شۇكىرشىلىك ايتارلىقتاي. بۇل تاراپتا بىرقاتار شارۋا اتقارىلىپ, ناقتى باستامالار قولعا الىندى. ىستەلگەن جۇمىستار دا جەتەرلىك. مەملەكەتتىك ءتىلىمىزدىڭ مارتەبەلى تۇعىرىنا تولىق قونۋى ءۇشىن ءبىزدىڭ ورتالىق تا ايانىپ قالماي, جۇيەلى جۇمىستار جۇرگىزۋدە. بۇل ءىس-شارا دا سونىڭ ءبىر پاراسى, – دەدى و. اسانعازى.
بايقاۋعا 17-22 جاس ارالىعىنداعى وبلىستىق جانە قالالىق ىرىكتەۋ كەزەڭدەرىنىڭ جەڭىمپازدارى قاتىسىپ, باقتارى مەن باپتارىن سىنادى. سايىس كەزەڭدەرىندە ۇمىتكەرلەر ۇسىنىلعان تاقىرىپ بويىنشا اۋىزشا تۇساۋكەسەر, قازاقشا ەسسە جازۋ, ديالوگ قۇرۋ جانە «شابىت جۇلدىزى» اتتى شىعارماشىلىق تاپسىرمالاردى ورىنداۋ بويىنشا باسەكەگە ءتۇستى.
قاتىسۋشىلاردىڭ ءبىلىمى مەن بىلىگىن, ونەرى مەن ورەسىن بەلگىلى فيلولوگ عالىمداردان قۇرالعان قازىلار القاسى باعالادى. ولاردىڭ قاتارىندا فيلولوگيا عىلىمدارىنىڭ دوكتورى, پروفەسسور تەمىرحان تەبەگەنوۆ, ش. شاياحمەتوۆ اتىنداعى رەسپۋبليكالىق ۇيلەستىرۋ-ادىستەمەلىك ورتالىعى ديرەكتورىنىڭ ورىنباسارى ورازكۇل اسانعازى, ا. بايتۇرسىن ۇلى اتىنداعى ءتىل ءبىلىمى ينستيتۋتىنىڭ ءبولىم مەڭگەرۋشىسى, فيلولوگيا عىلىمدارىنىڭ دوكتورى ورىناي جۇباەۆا, قازاق ۇلتتىق سالت-داستۇرلەرى اكادەمياسىنىڭ پروفەسسورى, كومپوزيتور كەنتاۋ قۋانتاي ۇلى جانە قازاقستاندىق ۇلتتىق يۋنەسكو كلۋبتارى فەدەراتسياسىنىڭ ۆيتسە-پرەزيدەنتى عاني بەيسەمباەۆ بار.
تارتىستى وتكەن بايقاۋ قورىتىندىسى بويىنشا جەڭىمپاز اتانعاندار ديپلوم, العىس حاتتارمەن جانە باعالى سىيلىقتارمەن ماراپاتتالدى.