قارابالىق اۋدانىنداعى ۆوروشيلوۆ اۋىلىنا گاز جەتكىزىلدى. بۇل اۋدان ورتالىعى قارابالىق سەلوسىنا جاقىن بولعانىمەن, تۇرعىندارى ازايىپ قالعان شاعىن اۋىل بولىپ سانالادى. سوعان قاراماستان وبلىس اكىمدىگى مەن ۇلتتىق وپەراتور «قازترانسگاز» اق اراسىنداعى مەموراندۋم اياسىندا شاعىن اۋىلداردى دا گازداندىرۋ ءىسى جۇزەگە اسىپ جاتىر. كوگىلدىر وتىندى قوسۋعا ارنالعان سالتاناتتى شاراعا قوستاناي وبلىسى اكىمىنىڭ ءبىرىنشى ورىنباسارى عاۋەز نۇرمۇحامبەتوۆ پەن «قازترانسگاز ايماق» اق باس ديرەكتورىنىڭ ورىنباسارى مۇقان سادۋاقاسوۆ قاتىستى.
اتالعان نىساننىڭ قۇرىلىسى بارىسىندا 6,9 كم تارتا كوشەارالىق گاز قۇبىرلارى سالىندى. ەلدى مەكەندەگى تۇرعىندار سانى 495 ادام. اۋىلداعى 155 جەكە ءۇيدىڭ 49-ى گازعا قوسىلعان, تاعى 4 ۇيدەگى مونتاج جۇمىستارى تولىعىمەن اياقتالدى. بۇعان قوسا ۆوروشيلوۆكادا 4 دۇكەن, 1 مەكتەپ پەن مادەنيەت ءۇيى بار.
«قازترانسگاز» كومپانياسى ۇلكەن جۇمىس اتقاردى. ەكى جىلدا وبلىستا 600 كم گاز قۇبىرى سالىنادى, 50 مىڭنان استام تۇرعىنى بار 8 ەلدى مەكەنگە گاز بەرىلەدى. وسىنىڭ ارقاسىندا گازعا قوسىلعان حالىق سانى 10% ارتادى», دەدى قوستاناي وبلىسى اكىمىنىڭ ءبىرىنشى ورىنباسارى عاۋەز نۇرمۇحامبەتوۆ.
«قازترانسگاز» ايماق اق باس ديرەكتورىنىڭ ورىنباسارى مۇقان سادۋاقاسوۆ ۆوروشيلوۆ اۋىلىنان باسقا بيىل تاعى دا وسى اۋدانداعى توعىزاق جانە دەنيسوۆ اۋدانىنداعى انتونوۆ, الچانوۆ اكۋىلدارى كوگىلدىر وتىنعا قوسىلاتىنىن ايتتى.
ءنازيرا جارىمبەتوۆا
«ەگەمەن قازاقستان»
قوستاناي وبلىسى, قارابالىق اۋدانى