پارلامەنت سەناتىنىڭ حالىقارالىق قاتىناستار, قورعانىس جانە قاۋىپسىزدىك كوميتەتىنىڭ ءتورايىمى داريعا نازارباەۆانىڭ قاتىسۋىمەن قازاقستان رەسپۋبليكاسىنىڭ قارۋلى كۇشتەرى ۇلتتىق اسكەري-پاتريوتتىق ورتالىعىندا اسكەري-پاتريوتتىق جۇمىستاردى جەتىلدىرۋگە ارنالعان ۆەدومستۆوارالىق كەزدەسۋ ءوتتى.
شاراعا پارلامەنت دەپۋتاتتارى, قارۋلى كۇشتەر قاتارىندا قىزمەت ەتەتىن سالا ماماندارى, مەملەكەتتىك ورگانداردىڭ وكىلدەرى مەن اسكەري-پاتريوتتىق كلۋبتاردىڭ جانە كادەتتەر كلاسىنىڭ تاربيەلەنۋشىلەرى قاتىستى.
كەزدەسۋدەگى سوزىندە سەناتور د.نازارباەۆا جاستار اراسىندا پاتريوتتىق تاربيە جۇرگىزۋ ارقىلى جوعارى رۋحاني-پاتريوتتىق قاسيەتتەردى, وتان الدىنداعى مىندەتتەرىن تەرەڭ سەزىنۋ مەن ازاماتتىق جاۋاپكەرشىلىك سەزىمىن قالىپتاستىرۋ – مەملەكەتتىك ورگانداردىڭ, جاستار ۇيىمدارىنىڭ, وتباسى مەن قوعامنىڭ ماقساتتى جانە جۇمىلا ارەكەت ەتۋىن تالاپ ەتەتىنىن اتاپ ءوتتى. «وقۋشىلاردىڭ اقىل-وي, رۋحاني جانە كۇش-قۋات الەۋەتىن ىسكە اسىرا الاتىن مەكتەپتەردەگى اسكەري-پاتريوتتىق كلۋبتار وسى باعىتتاعى ماڭىزدى ميسسيانى اتقارادى. مەكتەپ ىشىندەگى وسىنداي قۇرىلىمدار سانى جىلدان-جىلعا ارتىپ كەلەدى. بۇل بولاشاق پاتريوتتار تاربيەلەۋگە وتە جاقسى مۇمكىندىك جانە ونى بارىنشا پايدالانۋعا بولادى», دەدى سەنات كوميتەتىنىڭ توراعاسى.
ال جيىنعا جەتەكشىلىك ەتكەن قورعانىس ءمينيسترى ساكەن جاسۇزاقوۆ بيىلعى جىلدىڭ اقپان ايىنداعى كەزدەسۋدە مەملەكەت باسشىسى مىندەتتەگەن تاپسىرمالار سالادا ءوز دەڭگەيىندە جۇزەگە اسىرىلىپ جاتقانىنا توقتالدى. ء«بىزدىڭ بۇگىنگىدەي باسقوسۋىمىزدىڭ جاستارعا اسكەري-پاتريوتتىق ءتالىم-تاربيە بەرۋدە ماڭىزى زور. وسى ماقساتتا مۇنداي شارالارعا ارداگەر اسكەري ماماندارىمىز بەن اسكەريلەر وتباسىن جانە ءوزىنىڭ قىزمەتتىك بورىشىن ءمىنسىز اتقارىپ جۇرگەن جانداردى مەيلىنشە كوبىرەك قاتىستىرۋعا تىرىسۋدامىز. سەبەبى ولار ءبىزدىڭ سالانىڭ مايتالمان ماماندارى. سوندىقتان دا ءبىز ونداي ازاماتتاردى قاي كەزدە دە كەيىنگى تولقىنعا ۇلگى-ونەگە ەتە الامىز. اسىرەسە, ەلىمىزدە جاس اسكەريلەر لەگىن قالىپتاستىرۋ مەن ولاردىڭ پىكىر الماسىپ, تاجىريبەمەن ءبولىسۋ الاڭقايلارىن ۇيىمداستىرۋ قاي جاعىنان الساق تا ۇتىمدى», دەدى س.جاسۇزاقوۆ.
بۇگىندە رەسپۋبليكا بويىنشا 101 كادەتتەر كلاسى اشىلىپ, ول جەرلەردە 2 800-دەن استام ءجاسوسپىرىم ءبىلىم الۋدا. ءمينيستردىڭ مالىمدەۋىنشە, كادەتتەر كلاسىنىڭ تاربيەلەنۋشىلەرى اسكەري سالانىڭ نەگىزىن وقۋمەن قاتار, مەنتالدى اريفمەتيكا, بال ءبيى, سالت اتپەن ءجۇرۋ, قويان-قولتىق ۇرىس پەن ادەپ, شەت ءتىلى سىندى سالاعا قاتىستى ءتارتىپ-تالاپتاردى وقىپ, ۇيرەنەدى.
كەزدەسۋدى قورىتىندىلاعان پارلامەنت سەناتىنىڭ دەپۋتاتى داريعا نازارباەۆا ەلىمىزدە ءاربىر ازامات ءۇشىن بەيبىتشىلىك پەن تۇراقتىلىقتىڭ ماڭىزى ەرەكشە ەكەنىن العا تارتتى. «بۇگىنگى تاڭدا ءبىز ساليقالى ساياسات ۇستانعان تۇراقتى بيلىگى بار ىنتىماعى جاراسقان بەيبىت ەلدە ءومىر ءسۇرىپ جاتىرمىز. ال وركەنيەتكە قۇلاش ۇرعان قازىرگىدەي زامان تالابى قىزىق ءارى قيىندىقتارعا تولى. ءتىپتى, ءبىلىم الىپ, قىزمەت ىستەيمىن, ايقىن ماقساتىما جەتەمىن دەپ بولاشاعىڭدى جوسپارلاي الۋدىڭ ءوزى جاس اسكەرلەرىمىز ءۇشىن زور باقىت», دەدى سەناتور. سونداي-اق ول كەزدەسۋگە كەلگەن جاس جاۋىنگەرلەر نازارىن ازاماتتىق پارىز بەن جاۋاپكەرشىلىكتى سەزىنۋ قابىلەتىن قالىپتاستىرۋ ماسەلەسىنە دە اۋداردى. «بەلگىلى ءبىر دەڭگەيدە قول جەتكىزگەن جەتىستىكتەرىمىزدى ەسەلەي ءتۇسۋ ءۇشىن بىزگە جاس اسكەري قۇرىلىمداردى مەملەكەتتىك دەڭگەيدە دامىتۋ مەن قولداۋ بويىنشا بىرەگەي رەسپۋبليكالىق باعدارلاما قاجەت», دەدى د.نازارباەۆا.
جيىن سوڭىندا قورعانىس ءمينيسترى س.جاسۇزاقوۆ سەناتور د.نازارباەۆاعا «Eل قورعانى» ءبىرىنشى دارەجەلى ۆەدومستۆولىق مەدالىن تاپسىردى. سونىمەن قاتار كەزدەسۋگە قاتىسۋشى تاراپتار اراسىندا ەلىمىزدەگى اسكەري-پاتريوتتىق جۇمىستى ودان ءارى جەتىلدىرۋ بويىنشا ىنتىماقتاستىق پەن ءوزارا ارەكەتتەستىك تۋرالى مەموراندۋمعا قول قويىلدى.
نۇرلىبەك دوسىباي, «ەگەمەن قازاقستان»