شىعىس قازاقستاندا ۇزاق ۋاقىت بويى جەكە قۇرامدى جاۋىنگەرلىك دايىندىققا وقىتۋ جانە داعدىلارىن جەتىلدىرۋگە ارنالعان ارنايى بازا بولعان جوق. ءوڭىر باسشىسى دانيال احمەتوۆتىڭ قولداۋىمەن بيىل وبلىستىق ءىىد قاراماعىنا ماڭايىنىڭ اۋماعى 1 گەكتاردان اساتىن ەكى عيمارات بەرىلدى.
بۇدان بولەك, جوندەۋ جۇمىستارىنا جەرگىلىكتى بيۋدجەتتەن 357 ميلليون تەڭگەدەن استام قارجى ءبولىندى. بۇل تۋرالى وبلىس اكىمىنىڭ ءباسپاسوز قىزمەتى حابارلادى.
«قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى ەلباسى جولداۋىندا بەسىنشى باسىمدىق قاۋىپسىزدىك پەن سىبايلاس جەمقورلىققا قارسى كۇرەسكە باعىتتالعان. بۇگىندە اتقارۋشى بيلىك پەن پوليتسيانىڭ ءوزارا ارەكەتتەسۋى ارقاسىندا قۇرىلعان جاڭا جۇيە قوعامدىق قاۋىپسىزدىكتى قامتىپ, قۇقىق قورعاۋشىلار جۇمىسىنىڭ تيىمدىلىگىن ارتتىرا تۇسپەك. دەسە دە, وبلىس اكىمى اتاپ وتكەندەي, قىزمەت ساپاسىن جاقسارتۋ ءۇشىن جەكە قۇرامدى وقىتۋدىڭ ماڭىزى جوعارى. وسى رەتتە اتالعان باعىتتاعى جۇمىستى جۇيەلەۋ ءۇشىن دەپارتامەنتتە ارنايى دايىندىق باسقارماسى قۇرىلدى.
– ءبىر جارىم جىل بۇرىن بۇل عيمارات بوس تۇرعان ەدى. قاجەتتى قاراجاتتى بولدىك. ەندى وبلىستىق ءىىد جەكە قۇراممەن تەوريالىق جانە تاجىريبەلىك تۇرعىدا وقىتۋ وتكىزۋ ءۇشىن جاقسى بازا بار. مۇندا دايىندىقتىڭ بارلىق تۇرىنەن ءوتۋ ارقىلى قيىن دا قاۋىپتى قىزمەتتەرىڭىزدە كەزدەسەتىن كەز-كەلگەن جاعدايعا دايىن بولعاندارىڭىزدى قالايمىز. تاعى اتاپ وتەرىم, كەلەسى جىلى ىشكى ىستەر قىزمەتكەرلەرىنە ارنالعان ءۇيدىڭ قۇرىلىسىن باستايمىز, – دەدى شقو اكىمى دانيال احمەتوۆ.
جاڭا ورتالىق سوڭعى ۇلگىدەگى بەينەباقىلاۋ, تەكسەرۋ-رۇقسات ەتۋ جانە ارنايى بايلانىس جۇيەلەرىمەن, كابينەتتەر زاماناۋي قۇرىلعىلارمەن جابدىقتالعان. ساپپەن ءجۇرۋ, تاكتيكالىق-ارنايى ساباقتار وتكىزۋ ءۇشىن ارنايى الاڭ دا قاراستىرىلعان. ورتالىق نەگىزىندە التى كۇنگە شاقتالعان وقىتۋ-جاتتىعۋ جيىندارى وتكىزىلەتىن بولادى.
ايتا كەتۋ كەرەك, بيىل وبلىستىق بيۋدجەتتەن ءىىد ماتەريالدى-تەحنيكالىق قورىن جاقسارتۋ ماقساتىندا 3,5 ملرد. تەڭگە ءبولىندى. 276 اۆتوكولىك پەن 10 اۆتوبۋس ساتىپ الىندى. جالپى شقو ىشكى ىستەر قۇرىلىمىن اۆتوكولىكپەن قامتاماسىز ەتۋ جانە تەحنيكالىق قارۋلاندىرۋ بويىنشا رەسپۋبليكا بويىنشا العاشقى ورىندا تۇر.
ازامات قاسىم, «ەگەمەن قازاقستان»