اقتاۋدا ماڭعىستاۋ وبلىسىنىڭ لاڭكەستىككە قارسى كوميسسياسىنىڭ وتىرىسى ءوتتى. جيىندا وبلىستىق بۇقارالىق اقپارات قۇرالدارىنىڭ ءوڭىر حالقىمەن دەسترۋكتيۆتى ءدىني اعىمداردىڭ يدەولوگياسىنا قارسى شارالار, مەملەكەتتىڭ تەرروريزم كۇرەس ساياساتى تۋرالى حالىقتى اقپاراتتاندىرۋى تالقىلاندى.
جىل باسىنان بەرى بۇقارالىق اقپارات قۇرالدارىندا ءدىني ەكسترەميزمنىڭ الدىن الۋ جانە تۇرعىنداردىڭ ءدىني ساۋاتتىلىعىن ارتتىرۋعا ارنالعان بارلىعى 400-گە جۋىق ماتەريال جارىق كوردى. ونىڭ ىشىندە, باسپا باسىلىمدارىندا – 150-گە جۋىق ماقالا, تەلەديدار ەفيرىندە – 100-گە جۋىق سيۋجەت, عالامتور سايتتارىندا – 150-گە جۋىق ماتەريال جاريالانعان.
«قازاقستان-اقتاۋ» تەلەارناسىندا ەسەپتى كەزەڭ ىشىندە «اداسقاندار» سپەكتاكلىنىڭ جازباسى, «اداسقان اعىمدار», «وسۋجدەننىە», «زابلۋجدەنيە», «جيھاد دەگەن نە؟», «سيريسكي كاپكان», «چتو ناشا جيزن», «پوكايانيە», «چاس ح», «اتا جولى», «سپەتسرەپورتاج», «كرۋگوۆەرت (تاكفير)», «راديكاليزم ماتريتساسى» جانە باسقا دا بەينەفيلمدەر كورسەتىلدى. ساپالى جانە راستالعان اقپاراتتى جەتكىزۋ ماقساتىندا وڭىرلىك دەڭگەيدە تىلشىلەر پۋلى قۇرىلعان, ءداستۇرلى جانە ءداستۇرلى ەمەس دىندەر بويىنشا ساۋاتتىلىعىن ارتتىرۋ ماقساتىندا سەمينار-ترەنينگتەرگە قاتىستىرىلىپ وتىرادى,-دەدى ىشكى ساياسات باسقارماسىنىڭ مىندەتىن اتقارۋشى قۇرمانبەك جۇماعالي.
لاڭكەستىكپەن كۇرەسۋ ماقساتىندا دەنساۋلىق ساقتاۋ باسقارماسى 7 توپتان تۇراتىن وڭىرلىك جەدەل شتابتى مەديتسينالىق-پسيحولوگيالىق قولداۋ توبىن قۇردى. ايماقتىڭ 12 مەديتسينالىق مەكەمەسىندە 15 ميلليوننان استام تەڭگەگە بەينەباقىلاۋ جۇيەسى ورناتىلعان.
توتەنشە جاعدايلار دەپارتامەنتىنىڭ باستىعى قۋانار بازارباەۆتىڭ مالىمەتىنشە, وبلىستا شۇعىل قۇتقارۋ جانە جەدەل جۇمىس كۇشتەرىندە 120 ادام بار جانە 24 بىرلىك تەحنيكامەن جاراقتانعان. باسقارمادا اۆاريالىق-قۇتقارۋ قىزمەتتەرىمەن 11 تىكەلەي تەلەفون جەلىسى قوسىلعان. حالىقتى جەدەل حاباردار ەتۋ ءۇشىن SMS-حابارلاما ارقىلى ەسكەرتۋ جۇيەسى قولدانىلادى. ازاماتتاردى قورعاۋ جانە توتەنشە جاعداي سالدارىن قالپىنا كەلتىرۋ ماقساتىندا شۇعىل ارەكەت ەتۋ توپتارى قۇرىلدى.
لاڭكەستىككە قارسى كوميسسياسىنىڭ وتىرىسىندا تومەندەگى شەشىمدەر قابىلداندى. اتاپ ايتساق, جەرگىلىكتى تەلەارنادا, حالىق كوپ شوعىرلانعان الاڭداردا, قالالار مەن اۋدانداردا LED – ەكراندا ۇزدىكسىز تۇرعىنداردىڭ ءدىني ساۋاتتىلىعىن ارتتىرۋعا ارنالعان بەينەباياندار تاراتۋ; جەرگىلىكتى باق-تا انتيتەررورلىق سيپاتتاعى ماقالالاردى اي سايىن جاريالاۋ; ءدىن ىستەر باسقارماسىنىڭ تاپسىرىسىنا ساي, جات اعىمدارعا جانە جالعان ءدىني ۇيىمدارعا قارسى تۇرا الاتىن بىلىكتى تەولوگتارمەن قامتاماسىز ەتۋ; حالىققا تەرروريزم اكتىلەرىنىڭ الدىن الۋعا كومەك كورسەتەتىن بەينەباياندار جاريالاۋ;
شەتەلدە ءدىني ءبىلىم الۋدىڭ قاۋپى تۋرالى جاستار اراسىندا ءتۇسىندىرۋ جۇمىستارىن كۇشەيتۋ; «STOP SECT Aktau» ينتەرنەت-قوعامداستىعىندا حالىقتىڭ ءدىني ساۋاتتىلىعىن ارتتىرۋ, ۇلتتىق سالت-داستۇرلەردى ناسيحاتتاۋعا جانە جاستاردىڭ رۋحاني الەۋەتىن دامىتۋعا باعىتتالعان ماتەريالداردى ورنالاستىرۋ; مەشىتتەردە, ساۋدا ورىندارىندا, الەۋمەتتىك مەكەمەلەردە ءدىني ادەبيەتتەردىڭ زاڭسىز تاراتۋدى انىقتاۋ جانە الدىن الۋ; بارلىق وبلىستاعى ءدىني عيماراتتاردى بەينەباقىلاۋ جۇيەسىمەن قامتاماسىز ەتۋ.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى