قازاقستاندا سەكسەۋىل ساتۋعا تىيىم سالىندى

ءىس-شاراعا اۋىل شارۋاشىلىعى مينيسترلىگى ورمان شارۋاشىلىعى جانە جانۋارلار دۇنيەسى كوميتەتى توراعاسى ورىنباسارىنىڭ مىندەتىن اتقارۋشى قايرات ۇستەمىروۆ, ورمان شارۋاشىلىعى جانە جانۋارلار دۇنيەسى كوميتەتى جانۋارلار دۇنيەسى جانە اڭشىلىق شارۋاشىلىعى باسقارماسىنىڭ باسشىسى باقىتبەك دۇيسەكەەۆ, ورمان شارۋاشىلىعى جانە جانۋارلار دۇنيەسى كوميتەتى بالىق رەسۋرستارىن قورعاۋ جانە بالىق اۋلاۋدى رەتتەۋ باسقارماسىنىڭ باسشىسى ارمان وتەپوۆ قاتىستى.

جيىن بارىسىندا ورمان شارۋاشىلىعى جانە جانۋارلار دۇنيەسى كوميتەتى توراعاسى ورىنباسارىنىڭ مىندەتىن اتقارۋشى ق.ۇستەمىروۆ ۇكىمەت وتىرىسىندا قازاقستاندا بيولوگيالىق ارتۇرلىلىكتى ساقتاۋ ماسەلەسى قارالعانىن تىلگە تيەك ەتتى.

«بۇل ماسەلە مينيسترلىكتىڭ باسىمدىقتارىنىڭ ءبىرى بولىپ ەسەپتەلەدى جانە ءبىز وسى باعىتتا جەدەل جانە جۇيەلى شارالار قابىلدايمىز. ورمان شارۋاشىلىعى سالاسىندا رەسپۋبليكانىڭ ورمان جامىلعىسى تومەندىگىن ەسكەرە وتىرىپ, مىناداي شارالاردى بەكىتىلدى. ولار 2004 جىلدان باستاپ ەكسپورتقا تىيىم سالىندى, 2015 جىلدان باستاپ 2018 جىلدىڭ سوڭىنا دەيىن بارلىق سەكسەۋىل شلامىنا موراتوري جاريالاندى, بيىل رەسپۋبليكانىڭ ساۋدا ورىندارىندا سەكسەۋىلدى ساتۋعا تىيىم سالىندى, سونداي-اق بيىلعى جىلى قىلقان جاپىراقتى ورمانداردا سانيتارلىق كەپتىرۋگە, ونىڭ ىشىندە قىزدىرعىشتاردى ازىرلەۋگە تىيىم سالىندى», دەدى ق.ۇستەمىروۆ.

سونىمەن قاتار ول 2018 جىلدان باستاپ الماتى وبلىسىنداعى «ىلە-بالقاش» تابيعي قورىعى جانە شىعىس قازاقستانداعى «تارباعاتاي» ۇلتتىق تابيعي پاركى جۇمىس ىستەي باستايتىنىن, ءتيىستى قورلار 2018 جىلعا ارنالعان بيۋدجەت جوباسىنا ەنگىزىلگەنىن اتاپ ءوتتى.

سونداي-اق ق.ۇستەمىروۆ براكونەرلەرمەن كۇرەس كۇشەيە تۇسكەنىن دە العا تارتتى.

«مەملەكەتتىك مەكەمەلەردەگى ينسپەكتسيا سىبايلاس جەمقورلىق كورىنىستەرىنىڭ الدىن الۋ ءۇشىن اعىمداعى جىلدىڭ ماۋسىم ايىندا مينيسترگە تىكەلەي باعىناتىن «ساپسان» جەدەل توبى قۇرىلدى. ءوزىنىڭ قىزمەتىنىڭ ناتيجەسىندە اعىمداعى جىلدىڭ 5 ايى ىشىندە تابيعات قورعاۋ زاڭناماسىن بۇزۋشىلىقتاردىڭ 16 فاكتىسى انىقتالدى, ولار بويىنشا ماتەريالدار قۇقىق قورعاۋ ورگاندارىنا بەرىلدى», دەدى ول

راۋان قايدار, «ەگەمەن قازاقستان»