ەلىمىزدىڭ مادەنيەت جانە سپورت مينيسترلىگى ءباسپاسوز قىزمەتىنىڭ حابارلاۋىنشا, بۇل كۇندەرى اقش-تىڭ لوس-اندجەلەس قالاسىندا قازاقستاننىڭ مادەنيەتى مەن كينوسىنىڭ كۇندەرى ءوتىپ جاتىر. اقش-تاعى قازاقستاننىڭ ەلشىلىگى جانە قازاقستان كينەماتوگرافيالىق ونەرى مەن عىلىمدارى اكادەمياسى ۇيىمداستىرعان بۇل شارا سابان تەاترىندا اقان ساتاەۆتىڭ «اناعا اپارار جول» فيلمىمەن اشىلعان.
فيلمنەن سوڭ حالىق ءارتىسى ايمان مۇساقوجاەۆانىڭ, حالىقارالىق بايقاۋلاردىڭ لاۋرەاتى ەدىل قۇسايىنوۆتىڭ, الەمدىك دەڭگەيدە ونەر كورسەتىپ جۇرگەن تالانتتى ءانشى ديماش قۇدايبەرگەننىڭ, قازاق ۇلتتىق ونەر ۋنيۆەرسيتەتىنىڭ ەۋرازيالىق سيمفونيالىق وركەسترىنىڭ, سونداي-اق «شابىت, «ايگولەك» انسامبلدەرىنىڭ قاتىسۋىمەن ۇلكەن كونتسەرت وتكەن.
لوس-اندجەلەستە «Spirit of the Great Steppe» – « ۇلى دالا رۋحى» دەگەن اتپەن ءوتىپ جاتقان قازاقستان مادەنيەتى مەن كينوسىنىڭ كۇندەرى تۋرالى مادەنيەت جانە سپورت ءمينيسترى ارىستانبەك مۇحامەدي ۇلى تومەندەگىشە پىكىر ءبىلدىردى: «ەلىمىزدىڭ مادەنيەتى مەن كينوسىنىڭ كۇندەرى اقش-تا تۇڭعىش رەت ءوتىپ جاتقان جوق. دەسە دە بۇل جولى امەريكالىقتارعا كوبىندە قازاقتىڭ تاريحىنان حابار بەرىپ, ونىڭ ۇلت رەتىندەگى كەسكىن-كەيپىن كورسەتەتىن فيلمدەر ۇسىنىلدى. بۇل قازاق مادەنيەتىنە دەگەن قىزىعۋشىلىقتى وياتاتىنى ءسوزسىز. سونداي-اق بۇل ءىس-شارا ەكى ەل اراسىنداعى مادەني قارىم-قاتىناس تاريحىندا جاقسى ءبىر بەلەس بولماق».
شىنىندا دا امەريكالىق كورەرمەندەرگە وتاندىق كينو ءوندىرىسىنىڭ ەڭ تانىمال جانە ءوز كورەرمەندەرىمىزدەن وڭ باعا العان فيلمدەر ۇسىنىلعان. ونىڭ ىشىندە سۇلتان قوجىقوۆتىڭ جارتى عاسىرعا جۋىق ۋاقىتتان بەرى ەكراننان تۇسپەي كەلە جاتقان, قازاق كينو ونەرىنىڭ تولقۇجاتىنا اينالعان «قىز جىبەك», رۇستەم ءابدىراشتىڭ ەلباسىنىڭ ومىرىنەن تۇسىرگەن «بالالىق شاعىمنىڭ اسپانى» جانە قازاق تاريحىنىڭ تاعدىرشەشتى كەزەڭدەرىن ورنەكتەگەن «قازاق حاندىعى. الماس قىلىش» كوركەم فيلمدەرى بار.
بۇل فيلمدەردىڭ بارلىعى نيۋ-يورك كينواكادەمياسىنىڭ لوس-اندجەلەستەگى فيليالىندا اعىلشىن سۋبتيترلارىمەن قازاق تىلىندە كورسەتىلەدى. اۋقىمدى شارانىڭ اياسىندا نيۋ-يورك كينواكادەمياسىندا وقيتىن قازاقستاندىق ستۋدەنتتەرمەن وتاندىق كينەماتوگرافيا وكىلدەرىنىڭ كەزدەسۋلەرى ۇيىمداستىرىلماق.
ايتا كەتەيىك, لوس-اندجەلەستە ءوتىپ جاتقان ايتۋلى شاراعا ەلىمىز تاراپىنان اقش-تاعى ەلشى ەرجان قازىحانوۆ, مادەنيەت جانە سپورت ءمينيسترى ارىستانبەك مۇحامەدي ۇلى, قازاقستان كينەماتوگرافيالىق ونەرى مەن عىلىمدارى اكادەمياسىنىڭ پرەزيدەنتى ايمان مۇساقوجاەۆا, كسرو جانە قازاقستاننىڭ حالىق ءارتىسى ءاسانالى ءاشىموۆ, حالىق ءارتىسى قۇمان تاستانبەكوۆ, قازاقستاننىڭ ەڭبەك سىڭىرگەن ءارتىسى مەرۋەرت وتەكەشەۆا جانە باسقا دا ەسىمى ەلگە ەلەۋلى ونەر ادامدارى قاتىسۋدا.
ايگۇل سەيىل,
«ەگەمەن قازاقستان»