بۇگىندە نەبىر ويىن تۇرلەرى بار. سونىڭ ىشىندە ادامداردىڭ وي وزىقتىعىنا اسەر ەتەتىندەي شاحمات ويىنى بۇگىنگى تاڭدا قاراپايىم قالىپتان دامىپ, كۇردەلەنىپ كەلە جاتقانى بەلگىلى. ولاي دەيتىن سەبەبىمىز, كۇننەن كۇنگە شاحماتتاعى شارشى سانى ءوسىپ, جاڭا فيگۋرالار قوسىلىپ جاتىر.
ءجۇز شارشىلى شاحمات جايلى بۇرىن-سوڭدى ەستىپ كەلسەك, جاقىندا ونى قاراعاندىدا ويناۋدىڭ ءساتى تۇسكەن. جالپى ءجۇز شارشىلى شاحماتتىڭ الەم بويىنشا وسى كۇنگە دەيىن 28 ءتۇرى بار ەكەن. ءبىزدىڭ باياندايىن دەپ وتىرعانىمىز دەمەك, 29-ءتۇرى.
شاحپلەي نەمەسە فەرزوكون دەپ اتالاتىن ءجۇز شارشىلى شاحماتتى ويلاپ تاپقان تالاي تەكتىلەرگە تۇعىر بولعان قاسيەتتى اقتوعاي ءوڭىرىنىڭ ازاماتى – دانەليا حامزين. سەكسەننىڭ سەڭگىرىنە شىققان دانەليا اقساقال سانالى عۇمىرىنىڭ 56 جىلىن ماتەماتيكا ءپانىنىڭ ۇستازدىعىنا ارناعان. زيالى قارت بۇگىندە جاعىمدى جاڭالىعىمەن قۋانتىپ وتىر.
– مەن ماتەماتيك بولعاندىقتان 1959 جىلدان بەرى شاحمات ويىنى تۋرالى ءارتۇرلى ويلاردا كەلدىم. جاڭادان ويلاپ تاپقان ويىنىمنىڭ نەگىزگى يدەياسى تاقتاداعى ات فيگۋراسىنىڭ جۇرىسىندەگى ەرەكشەلىك پەن كەمشىلىكتى ەسكەرۋدەن تۋدى. ال ات قازاققا پىراق ەسەپتى قاسيەتتى ۇعىم ەكەنى بەلگىلى.
اتاقتى شاحماتشىلار بوتۆيننيك پەن تال الەمى بىرىنشىلىگىندە ويناعاندا ەرەكشە جاڭا جۇرىستەر تاپپاي, اقىرىندا تەڭ ويىنعا كەلىسەدى. سول جىلدارى وسى ءجۇز شارشىلى شاحماتتىڭ العاشقى نۇسقاسىن جاسادىم. ويىندا ەكى فەرزى, ءبىر بۇركىت (ويىنعا قوسىلعان جاڭا فيگۋرا وسىلاي اتالادى) قانا بار. قالعان فيگۋرالار بۇرىنعى رەتپەن تىگىلەدى. ويىننىڭ ارتىقشىلىعى دا سول, بۇركىتتە اتتىڭ دا, لاديا مەن ءپىلدىڭ دە ءجۇرىسى بولعاندىعى, – دەيدى دانەليا حامزين.
– اقتوعايدان كوشكەن نەمىستەر گەرمانياعا كەتتى. سولاردان ەستىگەندەرى بار, گەرمانيا مەن جاپونيادان كەلگەن بىرنەشە شەتەلدىك جىگىتتەر ماعان جولىعىپ ءجۇردى.
وسى ويىنىڭىزدى بىزگە ساتىڭىزشى دەگەن قولقا دا سالدى, – دەيدى ول.
بۇل ويىندى 1959 جىلدان بەرى ويناپ كەلە جاتقان ادامدار دا بار ەكەن. ماسەلەن, شايمولدا بالىقوۆ ەسىمدى ارداگەر ءبىزدىڭ ونەرتاپقىشپەن ءوزارا ويناپ كەلگەن. وسىدان جەتى جىل بۇرىن اقساقالدىڭ جاناشىر باۋىرلارىنىڭ ءبىرى جاڭا ويىن تۇرىنە قازاقستاندىق اۆتورلىق پاتەنت الىپ بەرۋدى ايتادى.
الپىس جىلعا تاقاۋ ايتىلماي, جازىلماي كەلگەن جاڭالىق بۇگىن عانا جالعاننىڭ جارىعىنا شىعىپ وتىر. جۋىردا ادىلەت مينيسترلىگىنەن سەرتيفيكاتىن الىپ بەرگەن دە سول جان. استاناعا حابارلاسقان ونەرتاپقىشقا رەسپۋبليكالىق پاتەنتتىڭ ءبىر جىلدان كەيىن عانا بەرىلەتىنىن جانە 200 مىڭ تەڭگە اقشا ەكەنىن ايتادى.
ميراس اسان,
«ەگەمەن قازاقستان»
قاراعاندى وبلىسى