الەۋمەتتىك-مەديتسينالىق فورۋم اياسىندا بالالارعا ارناپ قويعان قويىلىمدى ولاردىڭ وزدەرى ويناپ, كەيىپكەرلەرىن جۇرەككە جىلى ەتىپ سومدادى.
الماتىدا «عىلىمي-مەديتسينالىق قوعام» قوعامدىق بىرلەستىگىنىڭ ۇيىمداستىرۋىمەن الەۋمەتتىك-مەديتسينالىق فورۋم بولىپ ءوتتى. بۇل شارانىڭ بارىسىندا ۆاكتسيناتسيا جانە ونكولوگياعا قاتىستى ايرىقشا شيەلەنىسكەن ساۋالداردى تالقىلاۋ مۇمكىندىگىمەن اشىق اڭگىمە وتكىزۋدىڭ ءتيىمدى ەكەندىگىن كورسەتە ءبىلدى. فورۋمعا قاتىسقان مەديتسينالىق قىزمەتكەرلەر پاتسيەنتتەرمەن جانە بالالاردىڭ اتا-انالارىمەن قارىم-قاتىناس جاساۋدان باعا جەتپەس تاجىريبە الىپ وتىرعانىن, سونىمەن قاتار دارىگەرلىك قابىلداۋ بارىسىندا تالقىلاۋعا مۇمكىندىك بەرمەيتىن كۇردەلى ماسەلەلەر بويىنشا پىكىر الىستى. وندا بالالار ونكولوگياسى جەتىستىكتەرى, پروبلەمالارى مەن پەرسپەكتيۆالارى جونىندە اڭگىمە قوزعالدى. «ۆاكتسينالاۋ – دەنى ساۋ ۇلت» دەگەن تاقىرىپتا قاتىسۋشى جۇرتشىلىق ساۋالدارىنا ماماندار تولىمدى جاۋاپتار بەردى. «كەل, ەرتەگى سۋرەتىن سالامىز!» اتتى بالالار سۋرەتتەرىنىڭ ەلىمىز بويىنشا ءوتىپ جاتقان بايقاۋىنىڭ قورىتىندىسى شىعارىلدى. فورۋم قوناقتارىنىڭ الدىندا الماتى قالاسى بالالار حيرۋرگياسى مەن پەدياترياسى عىلىمي ورتالىعىندا ەم قابىلداپ جۇرگەن بۇلدىرشىندەردىڭ كۇشىمەن قازاقستانعا ەڭبەك سىڭىرگەن ۇستاز مۇقان قۋاتباەۆتىڭ «باتىل ۆاكتسينا» قويىلىمى كورسەتىلدى. ونەر كورسەتكەن بۇلدىرشىندەر اراسىندا ۆيكا تيموفەەۆا, باتىرحان ءجۇسىپ, ءاميرا رىسماحانوۆانىڭ ونەرلەرى شىنايى شىقتى.
«سەنۋ جانە ءومىر ءسۇرۋ» اتتى الەۋمەتتىك-مەديتسينالىق فورۋم ءتۇرلى مەديتسينالىق سالالاردا اقپاراتتىق قولجەتىمدىلىكتى دامىتۋعا جانە ساۋىقتىرۋ قىزمەتتەرىن, جۇقپالى جانە ىسىك اۋرۋلارىنىڭ الدىن الۋ, دياگنوستيكالىق, ەمدەۋ جەتىستىگىنىڭ اياسىنداعى جاڭا تابىستاردى كوپشىلىككە تاراتۋعا, سونىمەن بىرگە سالاماتتى ءومىر سالتىن ناسيحاتتاۋعا ۇلكەن ىقپالىن تيگىزەتىنىن كورسەتىپ وتىر. بالالاردىڭ قىلقالامىنان شىققان سۋرەتتەگىدەي ءومىر دە ءمولدىر كۇيىندە ادەمى بولا بەرسىن دەپ تىلەدىك. ويتكەنى ولار ەگەمەن ەلىمىزدىڭ ەرتەڭى عوي.
ساپارباي پارمانقۇل, «ەگەمەن قازاقستان»
الماتى