ەلىن ءسۇيۋ – ەلدىڭ پاتريوتى بولۋ

– راسىندا, ءوزىڭىز ايتقانداي, بيىلعى جىلى قۇقىق قورعاۋ جانە باسقا دا مەملەكەتتىك ورگاندار اراسىندا ءۇشىنشى رەت وتكىزىلىپ وتىرعان ۆەدومستۆوارالىق رەسپۋبليكالىق بايقاۋدىڭ نەگىزگى ماقساتى – وتانشىلدىق رۋح پەن پاتريوتتىق سانا-سەزىمدى كۇشەيتۋ. «ەشكىم ىشتەن باتىر بولىپ تۋمايدى: باتىرلىق تا, مىنەز سەكىلدى وسكەن ورتا, كورگەن تاربيەگە بايلانىستى قالىپتاسادى», دەپ بىزگە باتىرلىق پەن باتىلدىقتىڭ ۇلگىسى بولا بىلگەن باۋىرجان مومىش ۇلى ايتقانداي, وتاندى قورعاۋ – ءار ازاماتتىڭ پارىزى. ال وتانعا دەگەن سۇيىسپەنشىلىكتى قالىپتاستىرۋ ادامنىڭ ومىرگە كەلگەن ساتىنەن باستالىپ, وتباسىندا وسى ۇعىم بالا بويىنا ءسىڭىرىلىپ, ءتۇسىندىرىلۋى ءتيىس. سوندا عانا كەز كەلگەن ادام ەلى مەن حالقىنىڭ, قالا بەردى ءوز وتباسىنىڭ قاۋىپسىزدىگى مەن كەلەشەگى ءوزىنىڭ قولىندا ەكەنىن تۇسىنەتىن بولادى.

سوعان وراي سوناۋ 2014 جىل­دان باستاۋ العان بۇل شارا بۇرىن ء«تىل – تاتۋلىق تىرەگى», ء«تىل – تۇتاستىق كەپىلى» دەپ اتالدى. ەندى مەملەكەت باسشى­سىنىڭ رۋحاني جاڭعىرۋعا شا­قىر­عان قوعام ءۇشىن اسا قۇندى «بولاشاققا باعدار: رۋحاني جاڭ­عىرۋ» ماقالاسىنا ساي بيىلعى جىلى ونى «رۋحاني جاڭعىرۋ – پاتريوتيزم نەگىزى» دەگەن اتاۋمەن وتكىزگەلى وتىر­مىز. نەگىزگى ماقساتى – ەلبا­سى­نىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىن ناسيحاتتاۋ مەن پات­ريوتتىق رۋحتى كۇشەيتۋگە قادام جاساۋ. بايقاۋعا مەملەكەتىمىزدىڭ التى ورگانى قاتىسادى. ولار: باس پروكۋراتۋرا, ۇلتتىق قاۋىپ­سىزدىك كوميتەتىنىڭ شەكا­را قىزمەتى, مەملەكەتتىك كۇزەت قىزمەتى, مەملەكەتتىك قىز­مەت ىس­تەرى جانە سىبايلاس جەم­قور­لىق­قا قارسى ءىس-قيمىل اگەنتتىگى, ىش­كى ىستەر مينيسترلىگى, قورعانىس مي­نيسترلىگى. بيىلعى سايىس ەكى تۋر­دان قۇرالادى. مەملەكەتتىك مەكەمەنىڭ رۋحاني جاڭعىرۋ بويىن­شا اتقارعان ىستەرىنىڭ تانىس­تى­رىلۋى مەن «رۋحاني جاڭ­عىرۋ – پاتريوتيزم نەگىزى» دەگەن اتاۋ­مەن تەاتر­لاندىرىلعان ساح­نالىق قو­يى­لىم قويىلادى. ءار مەكەمەنىڭ قىز­مەت­كەرى وزدەرىنە قويىلعان تالاپ­­تىڭ ماڭىزدىلىعىن تەرەڭ سەزى­نىپ, دايىندىققا ەرەكشە ءمان بەرۋدە.

ءتىل قاي ەلدە, قاي جەردە, قاي حالىقتا بولسىن قاشاندا ءوز قۇن­دى­لىعىن جوعالتقان ەمەس. قازاق بالاسىنىڭ ءوز حالقىن قۇر­مەت­تەپ, ەلىن ءسۇيۋى ءۇشىن, ول انا ءتىلىن قۇر­مەتتەۋى كەرەك. ەلىن ءسۇيۋ – ول ەلىنىڭ پاتريوتى بولۋ. وتان الدىنداعى پارىز, ابىروي جانە حالىققا ادالدىق – قاي ۋاقىتتا دا وسى مەكەمە قىزمەتكەرلەرى ءۇشىن كۇمانسىز باعدار. جوعارى پاتريوتتىق سانانى دارىپتەۋ مەملەكەت جانە قۇقىق قورعاۋ ورگاندارى ءۇشىن اسا ماڭىزدى مىندەتتەردىڭ ءبىرى بولىپ تابىلادى. ەتنيكالىق جانە ءدىني ەرەكشەلىگىنە قاراماستان ءاربىر ازامات ەلمەن بىرتۇتاستىعىن سەزىنۋى, باۋىرمال حالىقتىڭ ءبىر بولىگى ەكەندىگىن ءتۇسىنۋى قا­جەت. ويىمدى با­ۋىر­جان مومىش ۇلىنىڭ «ناعىز جا­ۋىن­گەردىڭ قاسيەتتەرىن تاربيە­لەۋدە داستۇرلەر, پاتريوتيزم مەن ءتارتىپتىڭ زور ماعىناسى بار», دەگەن سوزىمەن تۇيىندەگىم كەلەدى.

جازىپ العان

الەكساندر تاسبولات, «ەگەمەن قازاقستان»