مەديتسينالىق قۇجاتتاردى ەلەكتروندى فورماتقا كوشىرۋ كەزەڭ-كەزەڭىمەن جۇرگىزىلەدى – ا.تسوي

جۇرتشىلىقتىڭ قولىندا جۇرگەن قاعاز مەديتسينالىق كارتا دا جاڭا فورماتقا اۋىستىرىلىپ, ونىڭ ورنىنا ەلەكتروندى دەنساۋلىق پاسپورتى پايدا بولادى. بۇل تۋرالى كەشە ۇكىمەتتىڭ ءباسپاسوز ءماسليحاتىندا دەنساۋلىق ساقتاۋ مينيسترلىگىنىڭ وكىلدەرى مالىمدەدى.

دەنساۋلىق ساقتاۋ ۆيتسە-ءمينيسترى الەكسەي تسويدىڭ ايتۋىنشا, مەديتسينا سالاسىن تسيفرلاندىرۋ جۇيەسى قازاقستان ازاماتتارىنىڭ دەنساۋلىعى تۋرالى مالىمەتتەردى جيناقتاپ, بىرىڭعاي جۇيەگە بىرىكتىرۋگە قۇرىلعان.

مينيسترلىك 2008 جىلدان بەرى ەمدەۋ ۇيىمدارىنىڭ قىزمەتىنە جۇگىنگەن حالىقتىڭ سىرقات تاريحى تۋرالى ستاتيستيكا جاساقتاپتى. ەندى وسى ستاتيستيكالىق مالىمەتتەر تسيفرلاندىرۋ جۇيەسىنىڭ اياسىندا ازاماتتاردىڭ جەكە كۋالىگىنە جەكە يدەنتيفيكاتسيالىق كودى (جسن) ارقىلى تىركەلمەك. مۇنداي زاماناۋي تىركەلىم جۇيەسى دارىگەرلەرگە دە, پاتسيەنتتەرگە دە ءتيىمدى. ايتالىق, دارىگەرلەر بۇرىنعىداي الدىنا كەلگەن ناۋقاستىڭ اۋرۋ تاريحىن اۋىزشا سۇراپ, قولمەن جازىپ وتىرمايدى. ازاماتتىڭ جەكە كۋالىگىندەگى شتريح-كودتى كومپيۋتەرگە قوسسا بولدى, بارلىق سىرقات تاريحى اۆتوماتتى تۇردە مونيتورعا شىعا كەلەدى. بۇل دارىگەر مەن پاتسيەنتتىڭ ۋاقىتىن اناعۇرلىم ۇنەمدەيدى, وسى جۇيەنىڭ ارقاسىندا مامانننىڭ ناۋقاستى قاراۋ ۋاقىتى بۇرىنعىداي 20-30 مينۋت ەمەس, 3-5 مينۋتقا دەيىن قىسقارادى, دەيدى ماماندار.

ەلەكتروندى جۇيەنىڭ تاعى ءبىر ارتىقشىلىعى, مۇندا جاساندى ينتەللەكت باعدارلاماسى دا ەنگىزىلەدى. ەگەر دارىگەر ناۋقاسقا قانداي دا ءبىر ءدارى تاعايىنداسا, ونىڭ الگى ادامعا جاعاتىن-جاقپايتىنىن اۋرۋ تاريحىنا قاراپ, جاساندى ينتەللەكت انىقتاپ بەرەدى.

ۆيتسە-مينيستر سونداي-اق, دەنساۋلىق سالاسىن تسيفرلاندىرۋعا بايلانىستى دارىگەرلەردىڭ جۇكتەمەسى مەن قاعازباستىلىعىن ازايتۋعا, ەمدەۋ ۇيىمدارىن كومپيۋتەرلەندىرۋگە ەرەكشە دەن قويىلىپ وتىرعانىن جەتكىزدى. بيىلعى 1 قازانداعى جاعداي بويىنشا دارىگەر مەن مەدبيكەلەردىڭ كومپيۋتەرمەن جابدىقتالۋى 78,4 پايىزدى قۇرايدى. 2018 جىلدىڭ 1 قاڭتارىندا بۇل ماسەلەنى 85 پايىزعا شەشىپ, ال 2019 جىلدىڭ باسىندا 100 پايىزعا جەتكىزۋ كوزدەلىپ وتىر.

بۇعان قوسا, دارىگەرلەر قاعازباستىلىقتان دا ارىلعالى وتىر. ا.تسويدىڭ ايتۋىنشا, مەديتسينالىق قۇجاتتاردى تۇگەل ەلەكتروندى فورماتقا كوشىرۋ كەزەڭ-كەزەڭىمەن جۇرگىزىلەدى. بيىل جىلدىڭ سوڭىنا دەيىن مەديتسينالىق ۇيىمدار جارتىلاي اۆتوماتتاندىرۋ جۇيەسىنە كوشەدى. كەلەسى جىلدىڭ باسىنان باستاپ, قاراعاندى, اقمولا, قوستاناي جانە باتىس قازاقستان وبلىستارىنىڭ ەمدەۋ ۇيىمدارى قاعاز تۇرىندەگى ەسەپكە الۋ قۇجاتتاماسىن تولتىرۋدان بوساتىلادى. ال 2019 جىلدىڭ 1 قاڭتارىنان باستاپ, ەلىمىزدەگى بارلىق دەنساۋلىق ساقتاۋ ۇيىمىنىڭ مەديتسينالىق قۇجاتتامالارى قاعازسىز فورماتقا كوشىرىلمەك.

جالپى, قاعازباستىلىقتان ارىلۋ قاعاز تۇرىندەگى مەديتسينالىق كارتانى جويۋدان باستالماق. رەسپۋبليكالىق ەلەكتروندى دەنساۋلىق ساقتاۋ ورتالىعىنىڭ باس ديرەكتورى ولجاس ابىشەۆتىڭ ايتۋىنشا, مەديتسينالىق كارتالاردىڭ ءبارى ەلەكتروندى تولقۇجات نۇسقاسىنا كوشەدى. وسىلايشا, 2019 جىلدىڭ ورتاسىنا قاراي قاعاز تۇرىندەگى مەديتسينالىق كارتا مۇلدە جويىلاتىن بولادى. ال كەلەسى جىلدان باستاپ, ەمحانا جانە اۋرۋحانا دارىگەرلەرى پاتسيەنتتەردىڭ جەكە كۋالىگىندەگى شتريح-كود ارقىلى ەلەكتروندى دەنساۋلىق پاسپورتىمەن جۇمىس ىستەي باستايدى. وعان دەيىن مەملەكەتتىك جانە جەكەمەنشىك مەديتسينالىق ۇيىمداردىڭ پاتسيەنتتەر تۋرالى جەكە دەرەك قورى بىرىكتىرىلىپ, بىرىڭعاي دەرەكتەر بازاسىن قۇراماق.

الداعى جىلدان باستاپ, ازاماتتاردىڭ وزدەرى دە ەلەكتروندى تسيفرلىق قولتاڭبا ارقىلى ءوزىنىڭ جەكە ەلەكتروندى دەنساۋلىق پاسپورتىن اشىپ كورىپ, ونداعى مالىمەتتەرمەن تانىسا الاتىن بولادى.

قىمبات توقتامۇرات,

«ەگەمەن قازاقستان»