جاپونيا ۇكىمەتى «فۋكۋسيما-1» اپاتتى اەس وپەراتورى – تەرسو كومپانياسىنا 900 ملرد. يەن (شامامەن 11,5 ملرد. دوللار) بولەدى.
ۇكىمەتتىڭ مالىمدەۋىنشە, بۇل اقشا كومپانيا باسشىلىعىنا 2011 جىلدىڭ ناۋرىزىنداعى ءزىلزالا مەن تسۋنامي تۋدىرعان اپاتتار زارداپتارىن جويۋعا كومەكتەسەتىن بولادى. اتاپ ايتقاندا, وسى قارجىدان رەاكتوردى توقتاتۋ جۇمىستارى ءۇشىن اقى تولەنەدى. قارجى ۇكىمەتتىڭ جاپون اەس-تارى وپەراتورلارىمەن بىرلەسىپ قۇرعان ارنايى قوردان بولىنەدى.
تارتىپسىزدىكتەرگە ۇلاسقان ەرەۋىل
اقش-تىڭ كاليفورنيا شتاتىنداعى وكلەند قالاسىندا «وكلەنتتى باسىپ ال» ۇرانىمەن وتكەن بەيبىت شەرۋ سوڭى ءتارتىپسىزدىكتەرگە ۇلاستى.
ەرەۋىلشىلەر قالا ورتالىعىندا ۆيترينالاردى قيراتىپ, دۇكەندەردى توناي باستاعان. پوليتسيامەن قاقتىعىس كەزىندە 80 ادام تۇتقىندالدى. تارتىپسىزدىكتەردىڭ جاپپاي ءورىس الىپ كەتۋىنەن قايمىققان پوليتسيا ەرەۋىلشىلەردى تىنىشتاندىرۋ ءۇشىن شۇعىل شارالار قابىلداۋعا ءماجبۇر بولعان.
شاحتادا ورىن العان اپات
قىتايدىڭ حەنان پروۆينتسياسىنداعى كومىر شاحتاسىندا بولعان جارىلىس سالدارىنان 4 ادام قازا تاۋىپ, 57 ادام جەر استىندا قالعان.
اپات بولعان كەزدە شاحتادا 75 كەنشى جۇمىس ىستەپ جاتقان ەكەن. ولاردىڭ 14-ءى ءوز بەتتەرىمەن جوعارىعا شىققان كورىنەدى. قازىرگى ۋاقىتتا شاحتادا قۇتقارۋ وپەراتسياسى جۇرگىزىلىپ, جارىلىس سەبەپتەرى انىقتالۋدا. 29 قازاندا حۋنان پروۆينتسياسىنداعى شاحتادا دا جارىلىس بولىپ, وندا 28 كەنشى قازا تاپقان بولاتىن.
رەفەرەندۋمنان باس تارتتى
گرەكيا پرەمەر-ءمينيسترى يورگوس پاپاندرەۋ, كۇتكەندەگىگە كەرەعار, ءوزىنىڭ مەرزىمىنەن بۇرىن وتستاۆكاعا كەتەتىندىگى تۋرالى مالىمدەمە جاساعان جوق.
ونىڭ ەسەسىنە ءوز كابينەتى مۇشەلەرىمەن كەلىسسوز جۇرگىزىپ, ەۋرووداق تاراپىنان بولاتىن كومەك ماسەلەسى بويىنشا رەفەرەندۋم وتكىزۋدەن باس تارتتى. سونداي-اق ول ەلدە ۇلتتىق بىرلىك ۇكىمەتىن قۇرۋعا دا كەلىسىم بەرىپ وتىر. جاڭارعان ۇكىمەت قۇرامىنا انتونيس ساماراس كوشباسشىسى بولىپ تابىلاتىن گرەك وپپوزيتسياسىنىڭ وكىلدەرى دە كىرەدى دەپ كۇتىلۋدە.
فلوتيليا قارسىلىق كورسەتپەيدى
كەزەكتى «بوستاندىق فلوتيلياسىن» قۇراعان ەكى كەمە شامامەن گازا سەكتورىنان 150 شاقىرىمداي جەردە تۇر.
ەكسپەديتسياعا قاتىسۋشىلار ولاردىڭ وزدەرى بەلگىلەگەن جەرىنە بارار الدىندا جالپى وتىرىس وتكىزۋلەرىنە داۋىلدىڭ كەدەرگى كەلتىرگەنىن مالىمدەگەن. «بلوكادانى بۇزۋعا» تالپىنۋشىلار اراسىنداعى اراب ءجۋرناليسى جاعالاۋدا وزدەرىن ۇستاپ, گازا سەكتورىنا وتكىزبەۋ قامىن جاسايتىن يزرايلدىك تەڭىزشىلەرگە قارسىلىق كورسەتىلمەيتىنىن اتاپ كورسەتكەن. بولجام بويىنشا ەكى كەمەدەگى بەلسەندىلەر سانى 27 ادامدى قۇرايدى.
ساياسي داعدارىستى شەشۋ شارالارى
اراب مەملەكەتتەرى ليگاسى اراب جانە حالىقارالىق باق وكىلدەرىن سيرياداعى احۋالدى وقيعا ورنىنا كەلىپ, جازىپ كورسەتۋگە شاقىردى.
داماسكىگە قارسى «اقپاراتتىق سوعىس» ءورتىن تۇتاتادى دەگەن ايىپپەن وسىعان دەيىن سيريا وكىمەتى شەتەلدىك جۋرناليستەردىڭ ءوز اۋماعىندا جۇمىس ىستەۋىنە تىيىم سالعان بولاتىن. جاقىندا سيريا مەن اراب مەملەكەتتەرى ليگاسىنىڭ مينيسترلىك كوميتەتى ەلدەگى ساياسي داعدارىستى شەشۋ بويىنشا كەلىسىمگە قول جەتكىزدى. بەلگىلەنگەن جوسپار بويىنشا ارميانىڭ تانك بولىمشەلەرى قالادان شىعارىلىپ, ۇكىمەت پەن وپپوزيتسيا اراسىندا كەلىسسوزدەر ءجۇرۋى ءتيىس.
اسكەري بازاداعى جارىلىس
يراكتىڭ باكۋبا قالاسىندا ەكى بىردەي بومبا جارىلىپ, سونىڭ سالدارىنان التى ادام قازا تاۋىپ, 23 ادام زارداپ شەككەن.
بۇل الدىن-الا الىنعان مالىمەتتەر, بىزگە جارالىلاردى ءالى دە اكەلۋدە, دەپ مالىمدەگەن ديالا پروۆينتسياسى دەنساۋلىق ساقتاۋ دەپارتامەنتىنىڭ ءباسپاسوز حاتشىسى فاريس ءال-اززاۆي. جارىلىس باگداتتان 65 شاقىرىم جەردەگى اسكەري بازانىڭ جانىندا, سولداتتار ايلىقتارىن الۋ ءۇشىن كەزەككە تۇرعان كەزدە ورىن العان.
اقش باستى كيبەرشپيونداردى اتادى
اقش ءۇشىن ونەركاسىپتىك جانە ەكونوميكالىق سالاداعى شپيوندىق قاۋپى قىتاي مەن رەسەيدەن تۋىندايدى, دەلىنگەن اقش قارسى بارلاۋ باسقارماسىنىڭ بايانداماسىندا.
اتالعان قۇجاتتا ونەركاسىپتىك شپيوناج امەريكا قاۋىپسىزدىگىنە ەڭ باستى قاتەرلەردىڭ ءبىرى رەتىندە اتاپ كورسەتىلگەن. ونى جازۋشىلار ونەركاسىپ سالاسىنداعى ماڭىزدى اقپاراتتار مەن جاڭا تالدامالاردى ۇرلاۋ ماقساتىنداعى شپيوندىقپەن ونداعان ەلدەردىڭ بارلاۋ قىزمەتتەرى, كومپانيالارى جانە قاراپايىم ازاماتتارى اينالىسادى دەپ ەسەپتەيدى.
ازەربايجاندىق ەۆرەيلەر نەگە اشۋلاندى؟
رەسەيلىك جۋرناليست ۆ.سولوۆەۆتىڭ «ارسىز مىنەز-قۇلقى» ازەربايجاننىڭ تاۋلىق ەۆرەيلەرى ءدىني قاۋىمداستىعىنىڭ اشۋ-ىزاسىن تۋدىردى.
ولار ارميان-ازەربايجان جانجالىن حولوكوستپەن سالىستىرۋعا بولمايدى دەپ ەسەپتەيدى. حولوكوست ەۆرەي حالقىن جەككورۋشىلىك سالدارى بولىپ تابىلادى. ازەربايجاندا ەتنوستىق نەمەسە ءدىني جەككورۋشىلىك جوق. ايتا كەتۋ كەرەك, ماسكەۋ-باكۋ رەيسىنە ۇلتى ارميان س.گيۋردجياننىڭ وتىرعىزىلماۋىن اتالعان جۋرناليست حولوكوستپەن تەڭەگەن بولاتىن.
يتتەرى ۇرگەندەر ايىپ تولەيدى
لوس-اندجەلەستە بۇدان بىلاي 10 مينوتتەن ۇزاق ۋاقىت ۇرگەن يتتەردىڭ قوجايىندارى ايىپپۇل تولەيتىن بولادى.
قالا تۇرعىندارىنىڭ ءتۇنى بويى ۇرگەن يتتەر ادامعا ۇيقى بەرمەيدى دەگەن كوپتەگەن شاعىمدارىنا بايلانىستى لوس-اندجەلەس سوتى وسىنداي قاۋلى قابىلداعان. يتتەردىڭ ءۇرۋ ۇزاقتىعىن قالالىق باقىلاۋ قىزمەتىنىڭ قىزمەتكەرلەرى انىقتايتىن بولادى. يت قوجايىنى ءبىرىنشى «كىناسى» ءۇشىن – 250, ەكىنشى جولى – 500, ال ءۇشىنشى جولى 1000 دوللار ايىپپۇل تولەيتىن بولادى.
ينتەرنەت ماتەريالدارى نەگىزىندە ازىرلەندى.