ەلوردادا شەتەلدىك جانە وتاندىق تۋروپەراتورلار ءۇشىن ديالوگ الاڭى قۇرىلدى. بۇل تۋرالى استانا اكىمدىگىنىڭ مەديا ورتالىعى حابارلادى.
«استانا كونۆەنشن بيۋرو» جشس ۇيىمداستىرعان تۋرعا قىتايدان, يراننان, سونداي-اق تمد ەلدەرىنەن 80 تۋروپەراتور قاتىستى. ولار وتاندىق وپەراتورلارمەن قارىم-قاتىناس ورناتىپ, بىرقاتار كەلىسىم جاساستى. جوسپار بويىنشا «Welcome to Astana» اقپاراتتىق تۋرى ءۇش كۇنگە سوزىلدى.
رەسەيلىك ەكسكۋرسوۆود ۆەرا پوپوۆيچ: «Welcome to Astana» اقپاراتتىق تۋرىنىڭ العاشقى ەكى كۇنىندە ءبىز استاناداعى قوناق ۇيلەردى, مەديتسينالىق, عىلىمي, ءبىلىم بەرۋ, سپورتتىق جانە مادەني نىسانداردى ارالادىق. قازاقستان استاناسىنىڭ «بايتەرەك», «نۇر-الەم» سياقتى بىرەگەي عيماراتتارىندا بولىپ قايتتىق. تۋريزم سالاسى بىرلەسكەن جۇمىستى تالاپ ەتەدى. ول قالالار, ەلدەر اراسىنداعى دوستىقتى نىعايتىپ, ادامداردى جاقىنداستىرادى», - دەسە, «استانا كونۆەنشن بيۋرو» جشس-ءنىڭ باس مەنەدجەرى اسەل قارباەۆا: ء«بىزدىڭ قالادا وقيعالىق ءتۋريزمدى دامىتۋدىڭ زور مۇمكىندىگى بار. بۇل تۇرعىدا استانانىڭ الەۋەتى زور. ويتكەنى بۇگىنگى تاڭدا الەمنىڭ كوپتەگەن ەلدەرى قازاقستاننىڭ استاناسىن بەيبىتشىلىككە باستايتىن ورتا رەتىندە تانيدى», - دەيدى. سونىمەن بىرگە اسەل قارباەۆا قازىرگى تاڭدا ەلوردادا تۋريزم سالاسىنىڭ ءتۇرلى باعىتتارىن دامىتۋ شارالارى جۇيەلى تۇردە قولعا الىنىپ جاتقانىن ايتىپ ءوتتى.