وڭتۇستىك قازاقتان وبلىسىندا 2017 جىلعى 1 قازان ايىنداعى كورسەتكىش بويىنشا وبلىس حالقىنىڭ سانى 2 914 054 ادامدى قۇرادى. بۇل وتكەن جىلعى ءتيىستى كەزەڭمەن سالىستىرعاندا 1,2 پايىزعا ارتقان. ناتيجەسىندە رەسپۋبليكا بويىنشا ءبىزدىڭ وبلىس بالا تۋ مەن تابيعي ءوسىم كورسەتكىشتەرى بويىنشا 1-ورىندا.
بۇگىن بۇل تۋرالى وقو وڭىرلىك كوممۋنيكاتسيالار قىزمەتىندە وتكەن بريفينگتە وبلىستىق ستاتيستيكا دەپارتامەنتىنىڭ باستىعى ايدار ابىلدابەكوۆ ءمالىم ەتتى.
ونىڭ ايتۋىنشا, وبلىستا 2017 جىلعى قاڭتار-قىركۇيەك ايلارىن ەسەپكە العاندا حالىقتىڭ تابيعي ءوسىمى 47 917 ادامدى قۇراعان. بۇل وتكەن جىلعا قاراعاندا 10,3 پايىزعا كوبەيىپ وتىر.
«اعىمداعى جىلدىڭ توعىز ايىندا وبلىس كولەمىندە بالا تۋ كورسەتكىشى 59 061-ءدى قۇراپ رەسپۋبليكا كولەمىندە العاشقى ورىندى ەنشىلەدى. ال قۇرىلعان وتباسىلارعا كەلسەك, بيىل قىركۇيەك ايىنا دەيىن 15 مىڭنان استام جۇپ نەكەگە تۇرعان. بۇل وتكەن جىلمەن سالىستىرعاندا 9,4 پايىزعا كەمىپ وتىر», - دەدى ايدار احمەتبەك ۇلى
بۇدان بولەك, اعىمداعى جىلدىڭ 9 ايىنىڭ قورىتىندىسى بويىنشا كوشى-قونمەن وبلىسقا كەلگەن حالىقتىڭ سانى 19 800 ادامدى قۇراعان. سونىمەن قاتار, بىلتىرعى جىلدىڭ وسى كەزەڭىمەن سالىستىرعاندا وڭىرگە قازاقستاننىڭ باسقا وبلىستارىنان كەلگەندەردىڭ سانى 2 ەسەگە كوبەيسە, تمد ەلدەرىنەن كەلگەندەردىڭ سانى 21,9 پايىزعا ءوسىپ وتىر. ال وبلىس ىشىندەگى كوشى-قون 78 514 ادامدى قۇرادى. سونداي-اق, وبلىستان قونىس اۋدارعانداردىڭ سانى 32 مىڭنان اسقان.