تەرەزا مەي: رەسەي سايلاۋعا كەدەرگى جاساپ, باتىستىڭ بەرەكەسىن بۇزعىسى كەلدى

لوندون قالاسى مەرىنىڭ بانكەتىندە ءسوز العان پرەمەر-مينيستر تەرەزا مەي ۆلاديمير ءپۋتيننىڭ ۇكىمەتى «ەركىن قوعامنىڭ» شىرقىن بۇزۋعا تىرىسىپ جاتقانىن ايتتى. بريتان ۇكىمەتى باسشىسىنىڭ ايتۋىنشا, ماسكەۋ جالعان اقپارات تاراتىپ, باتىستا الاۋىزدىق تۋعىزعىسى كەلەدى. دەگەنمەن, پرەمەر-مينيستر لوندوننىڭ رەسەيمەن تەكە تىرەسكە تۇسكىسى كەلمەيتىنىن, بىراق ۇلىبريتانيا ءوز مۇددەسىن قورعايتىنىن ءسوز ەتتى.  

«رەسەي ءبىزدىڭ «ويىننىڭ» ەرەجەسىن بىلگەندە عانا باتىستىڭ سەنىمدى سەرىگى بولا الادى» دەگەن پرەمەر-مينيستر رەسەي ەۋروپاداعى بىرنەشە ەلدىڭ اۋە كەڭىستىگىنە بۇزىپ كىرىپ, ماقساتتى تۇردە بولشەكتەگىسى كەلگەنىن العا تارتتى. «بۇعان, ولاردىڭ سايلاۋعا ارالاسۋىن جانە دانيا قورعانىس مينيسترلىگى مەن بۋندەستاگقا جاساعان حاكەرلىك شابۋىلىن جاتقىزۋعا بولادى», - دەيدى مەي.

تەرەزا مەي ۇلىبريتانيا ەۋرووداقتان كەتىپ, ناتو-عا تولىقتاي بەت بۇراتىنىن ايتتى. «ليبەرالدىق قۇندىلىقتارىمىزدى نىعايتاتىن» «برەكسيت» تۋرالى كەلىسىم جاساسۋعا تىرىسامىز», - دەدى مەي.

سونداي-اق ول بۇۇ قاۋىپسىزدىك كەڭەسىنىڭ تۇراقتى مۇشەسى رەتىندە رەسەي حالىقارالىق تۇراقتىلىقتى دامىتۋدا ماڭىزدى ءرول اتقاراتىنىن دا اتاپ ءوتتى. رەسەيدىڭ باسقا جولدى تاڭدايتىنىنا ءۇمىت ارتقان مەي: ء«بىز ەكى ەل مۇددەسىن جانە الەمدىك ءتارتىپتى قورعاۋ ءۇشىن بىرگە ارەكەت ەتەمىز», - دەدى.

تەرەزا مەيدىڭ ايتقاندارى دونالد ترامپتىڭ سوزدەرىنە قارسى پىكىر رەتىندە قابىلداندى. وتكەن اپتادا اقش پرەزيدەنتى رەسەي بيلىگىنىڭ امەريكاداعى پرەزيدەنتتىك سايلاۋعا ارالاسپايتىنىن, ول جاعىنان ۆلاديمير پۋتينگە سەنەتىندىگىن جەتكىزگەن ەدى.