ماڭعىستاۋ وبلىسى اكىمىنىڭ ورىنباسارى ش. يلمۇحانبەتوۆا «بىرىڭعاي جيناقتاۋشى زەينەتاقى قورى» اق باسقارما ءتورايىمىنىڭ ورىنباسارى س. ەگەۋباەۆامەن كەزدەستى. كەزدەسۋ بارسىندا ەكى جاقتى مەموراندۋمعا قول قويىلىپ, الداعى ۋاقىتتا بىرلەسىپ اتقاراتىن جوبالاردى تالقىلادى.
مەموراندۋمنىڭ ماقساتى - «اقپاراتتى قازاقستان – 2020» مەملەكەتتىك باعدارلاماسى شەڭبەرىندە تاراپتاردىڭ اراسىندا سەرىكتەستىك قاتىناس ورناتۋ, ۇزاق مەرزىمدى, ءتيىمدى جانە ءوزارا پايدالى ىنتىماقتاستىقتى دامىتۋ, سونداي-اق قوعامنىڭ الەۋمەتتىك-ەكونوميكالىق جانە مادەني دامۋى ءۇشىن اقپاراتتىق ورتا قالىپتاستىرۋ.
مەموراندۋم اياسىندا حالىقتى جيناقتاۋشى زەينەتاقى جۇيەسىنە تارتۋ, مىندەتتى زەينەتاقى جارنالارىنىڭ جۇيەلى تۇردە ءتۇسۋى مەن كولەمىن ۇلعايتۋ, زەينەتاقى جۇيەسىن جاڭعىرتۋ ماسەلەلەرى, سونداي-اق قور قىزمەتىن الۋدىڭ بالاما مۇمكىندىكتەرى بويىنشا اقپارات بەرۋ ماقساتىندا قارجىلىق ساۋاتتىلىقتى كوتەرۋ كوزدەلىپ وتىر.
ساۋلە ەگەۋباەۆانىڭ دەرەگىنشە, بۇگىندە وبلىس حالقىنىڭ سانى 655 مىڭ ادامدى قۇرسا, ولاردىڭ ىشىندە 292 مىڭنان استامى ەكونوميكالىق تۇرعىدان بەلسەندى. 2017 جىلعى 1 قازانداعى جاعداي بويىنشا وبلىستا مىندەتتى زەينەتاقى جارنالارىن ەسەپكە الۋ بويىنشا 326,3 مىڭ شوت تىركەلگەن. ال ولارداعى زەينەتاقى جيناقتارىنىڭ كولەمى 505,8 ملرد تەڭگە. بۇل قازاقستان رەسپۋبليكاسى بويىنشا مىندەتتى زەينەتاقى جارنالارى ەسەبىنەن قالىپتاسقان زەينەتاقى جيناقتارىنىڭ 6,8 پايىزىن قۇرايدى. سونداي-اق 34,5 مىڭ شوت مىندەتتى كاسىپتىك زەينەتاقى جارنالارىن (مكزج) ەسەپكە الۋ بويىنشا اشىلعان. وبلىستا ەرىكتى زەينەتاقى جارنالارىن ەسەپكە الۋ بويىنشا شامامەن 0,4 مىڭ شوت اشىلعان. بۇل قازاقستان رەسپۋبليكاسى بويىنشا ەرىكتى زەينەتاقى جارنالارىن ەسەپكە الۋ بويىنشا اشىلعان شوتتاردىڭ 1 پايىزىن قۇرايدى. وبلىس تۇرعىندارىنىڭ زەينەتاقى جيناقتارىنىڭ ورتاشا سوماسى 1 575 مىڭ تەڭگە, بۇل ورتاشا رەسپۋبليكالىق كورسەتكىشتەن 93 پايىزعا جوعارى.
كەزدەسۋ بارىسىندا قازاقستان رەسپۋبليكاسىنىڭ قولدانىستاعى زەينەتاقىمەن قامسىزداندىرۋ مودەلى, جيناقتاۋشى زەينەتاقى جۇيەسىنىڭ جاي-كۇيى, سونداي-اق تۇرعىندارعا اقپارات بەرۋ, ولاردى جيناقتاۋشى زەينەتاقى جۇيەسىنە تارتۋ جانە قارجىلىق ساۋاتتىلىعىن ارتتىرۋ ماسەلەلەرى دە تالقىلاندى.
جيىن سوڭىندا قول قويىلعان مەموراندۋم اياسىندا اتالعان ماسەلەلەردى شەشۋ بويىنشا بىرلەسكەن شارالار قاراستىرىلعان. بجزق وسى مەموراندۋمعا سايكەس وبلىس اكىمدىگىنىڭ قولداۋىمەن جەرگىلىكتى كاسىپورىندار مەن ۇيىمداردا وبلىس تۇرعىندارى اراسىندا اقپاراتتىق-ءتۇسىندىرۋ جۇمىستارىن جۇرگىزىپ, جەرگىلىكتى بۇقارالىق اقپارات قۇرالدارىندا ماتەريالدار جاريالايتىن بولادى.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى