وڭتۇستىك قازاقستاندا «RIC ON KO’RME» اتتى اپتالىق جارمەڭكە باستاۋ الدى. العاش رەت ۇيىمداستىرلىپ وتىرعان جوباعا «وڭتۇستىك» ايماقتىق ينۆەستيتسيالىق ورتالىعى جانە «ىرىس» ميكروقارجى ۇيىمى مۇرىندىق بولىپ وتىر. بۇل تۋرالى وقو اكىمىنىڭ ءباسپاسوز قىزمەتى حابارلادى.
وتاندىق ءونىمدى قولداۋ جانە باعانى تۇراقتاندىرۋ ماقساتىندا ۇيىمداستىرىلعان شارانىڭ سالتاناتتى اشىلۋ راسىمىنە وڭتۇستىك قازاقستان وبلىسىنىڭ اكىمى جانسەيىت تۇيمەباەۆ قاتىستى. تاۋار ءوندىرۋشى مەكەمەلەردىڭ ونىمدەرىمەن تانىسقان ءوڭىر باسشىسى, كاسىپكەرلەردىڭ جۇمىسىنا ساتتىلىك تىلەپ, وسى قالىپتان تايىنباي ەڭبەك ەتۋگە شاقىردى.
«ەندى وسىنداي ۇلگىدە ۇلكەن كورمە ۇيىمداستىرۋ قاجەت. «وڭتۇستىك» ايو جانە «ىرىس» ميكروقارجى ۇيىمىنىڭ اۋدانداردا دا قارجىلاندىرعان جوبالارى كوپ. سوندىقتان ءار اۋداندا وسىنداي جارمەڭكە ۇيىمداستىرۋ كەرەك. بولاشاقتا مۇنداي جارمەڭكە تۇراقتى وتكىزىلىپ تۇرسا, الەۋمەتتىك بازارلار قالىپتاسادى. وسىلايشا ءبىز باعالاردى ارزانداتۋ جانە تۇراقتاندىرۋعا قول جەتكىزەمىز», - دەدى ج. تۇيمەباەۆ.
ءوز كەزەگىندە جارمەڭكەنى ۇيىمداستىرعان «وڭتۇستىك» ايماقتىق ينۆەستيتسيالىق ورتالىعىنىڭ باسقارما توراعاسى قۋانىش بايتورە كومپانيا حالىققا قولداۋ كورسەتۋگە ءار قاشان دا دايىن ەكەندىگىن جەتكىزدى. سونداي-اق, اتالعان جارمەڭكە ءار سەنبى سايىن ءداستۇرلى تۇردە جالعاساتىنىن ايتتى. ء«بىز تەك قانا قارجى ينستيتۋتى ەمەسپىز, ءبىزدىڭ كومپانيا دامۋ ينستيتۋتى بولىپ ەسەپتەلەدى. سوندىقتان, ءبىز كاسىپكەرلەرگە تەك قارجى بەرىپ قانا قويماي, ولاردىڭ كاسىبىن ءارى قاراي ىلگەرىلەتۋگە جانە دامىتۋعا بارىنشا قولداۋ كورسەتەمىز. ولار بىزبەن, ءبىز ولارمەن بىرگە وسەمىز», - دەدى ق. بايتورە.
جارمەڭكەگە «ماكسيمۋم» جشس ايماقتىق ينۆەستيتسيالىق ورتالىعىنان جەڭىلدەتىلگەن نەسيە الىپ, كاسىبىن جۇرگىزگەن 40-قا جۋىق كاسىپكەر قاتىسىپ, حالىققا وتاندىق ونىمدەرىن تومەن باعادا ۇسىندى. ولاردىڭ قاتارىندا بالىق جانە شۇجىق, جەمىس-جيدەك, كوكونىستەر, ەت جانە ءسۇت ونىمدەرى بار. ودان بولەك, جەڭىل ونەركاسىپتىك تاۋارلار, قولدان جاسالعان بۇيىمدار, قۇرىلىس ماتەريالدارى, سونداي-اق بالالار ءۇشىن ويىنشىقتاردى دا تابۋعا بولادى.
جارمەڭكەنىڭ سالتاناتتى اشىلۋ راسىمىندە بالالار ءۇشىن ويىن-ساۋىقتار, جانە ۇلتتىق ويىندار ۇيىمداستىرىلىپ, حالىققا پالاۋ تاراتىلدى. ءبىر بۇرىشتا جارمەڭكەگە قويىلعان ەتتەردەن باربەكيۋ ءپىسىرىلىپ, حالىقتىڭ بەرگەن باعاسى ارقىلى ەڭ ءدامدى ەت انىقتالدى.
ايتا كەتۋ كەرەك, اتالمىش شارا ەلباسىمىزدىڭ حالىققا جولداۋى, رۋحاني جاڭعىرۋ اياسىندا قولعا الىنىپ, باسقا دا ۇيىمدارعا الەۋمەتتىك شارالاردى وتكىزۋدى ناسيحاتتاۋدى كوزدەيدى. سونداي-اق, كومپانيانىڭ «RIC ON KO’RME» اتاۋى ارقىلى لاتىن الىپبيىنە كوشۋدى قولدايتىنىن كورسەتتى.