ءبىر توپ وتاندىق تىلشىلەر «قازاقستاندىق باق-تاردىڭ بۇۇ قاۋىپسىزدىك كەڭەسى جۇمىسىن جاريا ەتۋدەگى الەۋەتىن كۇشەيتۋ» جوباسى اياسىندا بۇۇ-نىڭ نيۋ-يورك قالاسىنداعى شتاب-پاتەرىنە بارىپ, ەڭسەلى ۇيىمنىڭ جۇمىسىمەن تانىسىپ قايتتى. بەس كۇندىك سەميناردى قازاقستاننىڭ سىرتقى ىستەر مينيسترلىگى بۇۇ حاتشىلىعى مەن بۇۇ دامۋ باعدارلاماسىمەن بىرلەسىپ ۇيىمداستىردى.
جوبانىڭ نەگىزگى ماقساتى – ەلىمىزدىڭ 2017-2018 جىلدارداعى بۇۇ قاۋىپسىزدىك كەڭەسىنە تۇراقتى ەمەس مۇشەلىگىن, كەلەر جىلعى قاڭتارداعى وسى ۇيىمدا توراعالىق ەتۋىن قەڭىنەن جاريالاۋدى قامتاماسىز ەتۋ. ساپارعا شىعار الدىندا جۋرناليستەرمەن كەزدەسۋ وتكىزگەن سىرتقى ىستەر ءمينيسترى قايرات ءابدىراحمانوۆ قازاقستاننىڭ قاۋىپسىزدىك كەڭەسىندەگى ماقساتتارى مەن مىندەتتەرىن ءتۇسىندىرىپ بەردى.
«پرەزيدەنت نۇرسۇلتان نازارباەۆ حالىقارالىق قاۋىپسىزدىكتى نىعايتۋ, تۇراقتى دامۋدى قامتاماسىز ەتۋ جانە ورتالىق ازيانىڭ مۇددەلەرىن ىلگەرىلەتۋدە اۋقىمدى ماقساتتار بەلگىلەگەن بولاتىن. بۇۇ قاۋىپسىزدىك كەڭەسىنە مۇشەلىك قازاقستاننىڭ جاھاندىق ۇدەرىستەرگە قاتىسۋى, ەلىمىزدىڭ بىتىمگەرشىلىك الەۋەتىن ارتتىرۋ جانە ديپلوماتيالىق قىزمەتىنىڭ كاسىبي دەڭگەيىن كوتەرۋ ءۇشىن بىرەگەي مۇمكىندىك بولىپ تابىلادى. بۇقارالىق اقپارات قۇرالدارىنىڭ وسى جوباعا بەلسەنە قاتىسۋى, ەڭ الدىمەن, قازاقستاننىڭ قاۋىپسىزدىك كەڭەسىندەگى جۇمىسى تۋرالى ۋاقتىلى جانە جان-جاقتى اقپارات بەرۋ تۇرعىسىنان ماڭىزدى», دەدى ق. ءابدىراحمانوۆ.
ساپار بارىسىندا جۋرناليستەر بۇۇ قاۋىپسىزدىك كەڭەسىنىڭ جۇمىسىمەن, قازاقستاننىڭ اتالعان ورگانعا تۇراقتى ەمەس مۇشە رەتىندەگى قىزمەتىنىڭ باسىمدىقتارىمەن, سونداي-اق 2018 جىلعى قاڭتاردا بۇۇ قاۋىپسىزدىك كەڭەسىندەگى توراعالىعىنىڭ جوسپارلارىمەن تانىستى. تىلشىلەر بۇۇ قاۋىپسىزدىك كەڭەسىنىڭ وتىرىستارى مەن اشىق پىكىرتالاستارىنا بارىپ, بريفينگ, سەمينار, ماستەر-كلاسس جانە ديپلوماتتار مەن بۇۇ-دا تۇراقتى تۇردە تىركەلگەن شەتەلدىك جۋرناليستەرمەن بەيرەسمي كەزدەسۋلەرگە قاتىستى.
جوباعا «ەگەمەن قازاقستان», «كازاحستانسكايا پراۆدا», «تۇركىستان», «The Astana Times» گازەتتەرىنىڭ, «قازاقستان», «حابار», «كتك» تەلەارنالارىنىڭ, «قازاقپارات», «Tengrinews.kz» «Zakon.kz» اقپارات اگەنتتىكتەرىنىڭ تىلشىلەرى قاتىستى.