قاراشانىڭ 5-ءى كۇنى ساعات شامامەن تۇنگى 03.00 كەزىندە باتىس قازاقستان وبلىستىق ىشكى ىستەر باسقارماسى جەرگىلىكتى پوليتسيا قىزمەتى تابيعاتتى قورعاۋ ءبولىمىنىڭ قىزمەتكەرلەرى «وحوتزووپروم» ومقم ينسپەكتورلارىمەن بىرلەسە وتىرىپ بوكەي ورداسى اۋدانى اۋماعىندا زاڭسىز كيىك اۋلاپ جۇرگەن ءۇش ادامدى انىقتادى. تەكسەرۋ كەزىندە وقيعا ورنىنان مۇيىزدەرى كەسىلگەن ءۇش كيىك, التى پار مۇيىزدەر, تىركەلمەگەن اڭشى مىلتىعى تابىلىپ, تاركىلەندى.
اتالعان فاكتى بويىنشا قازاقستان رەسپۋبليكاسى قك-ءنىڭ 337-بابى (زاڭسىز اڭشىلىق) بويىنشا قىلمىستىق ءىس قوزعالدى. قازىرگى ۋاقىتتا جەدەل-تەرگەۋ ءىس-شاراسى جۇرگىزىلۋدە, دەپ حابارلايدى پوليتسيانىڭ ءباسپاسوز قىزمەتى.
وسىنىڭ الدىندا, 27 قازان كۇنى تابيعات قورعاۋ ءبولىمى قىزمەتكەرلەرى جاڭاقالا اۋدانىنداعى ماشتەكساي اۋىلى ماڭىنان «نيۆا» كولىگىنە مىنگەن براكونەرلەردى قولعا تۇسىرگەندە, اڭشىلاردىڭ كولىگىنەن 3 كيىكتىڭ باسى, مىلتىق, پىشاق, وق تابىلعان ەدى. ال 2 قاراشا كۇنى تۇندە كوشىم وزەنىندەگى «رۋبەج» باقىلاۋ بەكەتىندە توقتاتىلعان اۆتوكولىك ىشىنەن جاڭادان كەسىلىپ, قاپقا سالىنعان 80 دانا كيىك ءمۇيىزى شىققان بولاتىن.
جىل باسىنان بەرى باتىس قازاقستان وبلىسىندا زاڭسىز اقبوكەن اۋلاعانى ءۇشىن 37 ادام ۇستالعان ەكەن. ولاردىڭ 18-ءىنىڭ ءىسى سوتتان ءوتىپ, ءارتۇرلى جازا تاعايىندالسا, قالعانى تەرگەۋ ساتىسىندا. براكونەرلەردەن كوپتەگەن قارۋ-جاراق, قارشانا, ءتىپتى «دجيپ» اۆتوكولىگى دە تاركىلەنگەن.
- بۇگىنگى تاڭدا قازاقستانداعى كيىكتىڭ ەڭ كوپ پوپۋلياتسياسى باتىس قازاقستان وبلىسىندا, بوكەيلىك دالاسىندا. بۇرىن بوكەي ورداسى مەن جانىبەك اۋداندارى اۋماعىندا بولسا, قازىر كوبەيىپ, جاڭاقالا وڭىرىنە دە جايىلىپ تاراپ كەتتى. بۇل – كەڭ-بايتاق ايماق, زاڭسىز اڭشىلىق جاساۋشىلار وسىنى پايدالانىپ, ەركىن قيمىلداعىسى كەلەدى. بىراق سوڭعى كەزدە مەملەكەت تاراپىنان اقبوكەندى قورعاۋعا ەرەكشە كوڭىل ءبولىندى. بۇل ىسكە بىزدەن باسقا بارلىق ۋچاسكەلىك ينسپەكتورلار, اۋماقتىق ينسپەكتسيا, «وحوتزووپروم» رمكم ماماندارى جۇمىلدىرىلعان. قازىر قۇرال-جابدىعىمىز دا ساي. مىسالى, بىزگە ءۇش ايعا پايدالانۋعا تىكۇشاق بەردى. كۇن سايىن اۋەدەن باقىلاپ, اقبوكەننىڭ ءورىسىن بارلاپ قايتامىز. بۇل – ۇلكەن كومەك, - دەيدى ەلامان ساتىبالدى ۇلى.
قازاقستان رەسپۋبليكاسى اۋىل شارۋاشىلىعى مينيسترلىگىنە قاراستى ورمان شارۋاشىلىعى جانە جانۋارلار الەمى كوميتەتىنىڭ دەرەگىنە قاراعاندا قازاقستاندا كيىكتىڭ جالپى سانى 150 مىڭنان اسادى. ال باتىس قازاقستان وبلىسىندا جىل باسىنان بەرى «كيىكتى ساقتاپ قالايىق!» جوباسى قولعا الىنىپ, بۇعان جاۋاپتى مەكەمەلەر بىرلەسە قيمىلداۋدا.
قازبەك قۇتتىمۇرات ۇلى,
«ەگەمەن قازاقستان»