بۇگىن حوشيميندە (ۆەتنام) قىزدار اراسىندا بوكستان ازيا چەمپيوناتىنىڭ جالاۋى جەتىنشى رەت كوتەرىلەدى. سارىقۇرلىقتىڭ ەڭ مىقتى دەگەن بوكسشى قىزدارى قاتىساتىن بۇل دوداعا قازاق بۇرىمدىلارى دا تاس-ءتۇيىن دايىن.
بوكستان قىزدار قۇراماسى سوڭعى ازيا چەمپيوناتىندا ءبىر التىن, ءۇش قولا مەدال يەلەندى. قۇراما قورجىنىنا جالعىز التىندى 75 كيلودا سىنعا تۇسكەن داريعا شاكىموۆا سالعان-دى. ول فينالدىق ايقاستا قىتايلىق قارسىلاسى لي ءتسياندى ايقىن باسىمدىقپەن ۇتىپ, ازيا چەمپيونى اتاندى. ال گاۋحار ەرمەكباي (69 كگ), ءمولدىر بازارباەۆا (81 كگ) جانە ءلاززات كۇنگەيباەۆا (81 كگ-دان جوعارى) سارىقۇرلىق بىرىنشىلىگىن قولا جۇلدەمەن قورىتىندىلاعان ەدى.
بوكستان قىزدار قۇراماسى 2010 جىلى ەلوردادا وتكەن بىرىنشىلىكتە تابىستى ونەر كورسەتكەن بولاتىن. سول جىلى وتاندىق بىلعارى قولعاپ شەبەرلەرى ءتورت التىن, ءبىر كۇمىس جانە ءۇش قولا جۇلدەنى يەلەنگەن. اتاپ ايتار بولساق, جاينا شەكەربەكوۆا (54 كگ), سايدا حاسەنوۆا (64 كگ), داريعا شاكىموۆا (75 كگ) جانە مارينا ۆولنوۆا (81 كگ-دان جوعارى) – التىن, نازگۇل بورانباەۆا (48 كگ) – كۇمىس, ايگەرىم اسقاروۆا (51 كگ), ەلەنا كولتسوۆا (69 كگ) جانە جۇلدىز ماماتقۇلوۆا (81 كگ-عا دەيىن) – قولا. ازيا بىرىنشىلىگىنە 2008 جىلدان بەرى قاتىسىپ كەلە جاتقان بوكسشىلار جالپى سانى 20 جۇلدە الدى. ونىڭ بەسەۋى التىن, تورتەۋى كۇمىس جانە 11 قولا.
بيىلعى دودادا ۇجىمنىڭ الدىندا زور مىندەت, ۇلكەن جاۋاپكەرشىلىك تۇرعانى ايتپاسا دا بەلگىلى. قىزدار قۇراماسىنىڭ باس جاتتىقتىرۋشىسى ۆاديم پريسياجنيۋك ۆەتنام ساپارى الدىندا جۋرناليستەرگە بەرگەن سۇحباتىندا ەلگە ەكى التىن مەدالمەن ورالاتىنىن ايتتى. «مەنىڭشە, ەۋروپاعا قاراعاندا ازياداعى قىزدار بوكسىندا باسەكەلەستىك وتە مىقتى. بيىلعى ازيا بىرىنشىلىگىندە بىزگە ءۇندىستان, وڭتۇستىك كورەيا جانە قىتاي قۇراماسى لايىقتى قارسىلىق كورسەتەدى. دەگەنمەن, بۇل دوداعا ەلىمىزدىڭ ەڭ مىقتى دەگەن بوكسشىلارىن الىپ بارا جاتىرمىز. شاكىرتتەرىمنىڭ دايىندىعى دا جوعارى دەڭگەيدە ءوتتى. بارلىعى سايىسقا ساقاداي ساي. بۇيىرسا, ۆەتنامنان ەكى التىن مەدالمەن ەلگە ورالامىز دەگەن ۇمىتتەمىن», دەدى ۆ.پريسياجنيۋك.
سونىمەن, 2-8 قاراشا ارالىعىندا حوشيميندە وتەتىن ازيا بىرىنشىلىگىندە قازاقستان قۇراماسى مىنا قۇرامدا سىنعا تۇسەدى: ريو وليمپياداسىنىڭ قولا جۇلدەگەرى, ەكى دۇركىن ازيا چەمپيونى داريعا شاكىموۆا (75 كگ), ەكى دۇركىن الەم چەمپيونى نازىم قىزايباي (51 كگ), الەم چەمپيوندارى دينا جولامان (54 كگ), ۆالەنتينا حالزوۆا (69 كگ) جانە ءلاززات كۇنگەيباەۆا (81 كگ-دان جوعارى), سونداي-اق الۋا بالقىبەكوۆا (49 كگ), نازىم يششانوۆا (57 كگ), ريمما ۆولوسەنكو (60 كگ), مادينا نۇرشاەۆا (64 كگ) جانە ءمولدىر بازارباەۆا (81 كگ).
ريو وليمپياداسىنىڭ قولا جۇلدەگەرى داريعا شاكىموۆا الداعى ازيا چەمپيوناتىندا باپكەرلەر تاراپىنان جوعارى تالاپ قويىلعانىن ايتادى. «ازيا بىرىنشىلىگىنە قاتىساتىن كەز كەلگەن قارسىلاسىما تولىق دايىنمىن دەپ ەسەپتەيمىن. دەگەنمەن, قارسىلاستارىمدى تومەن باعالاعىم كەلمەيدى. بىلتىر ءالسىز بولعان قارسىلاسىم بيىل ءبىر ورنىندا تۇرىپ قالماي, دايىندىعىن ۇدەتىپ, ءار جەكپە-جەك سايىن مىقتى بولا تۇسەدى. وسى دودا الدىندا جاتتىقتىرۋشىلارىمىز بىزگە تۇعىردىڭ ەڭ بيىك ساتىسىنان كورىنۋدى تاپسىرعان. بۇيىرسا, جاتتىقتىرۋشىلاردىڭ تاپسىرماسىن ورىنداۋعا تىرىسامىز», دەيدى د.شاكىموۆا.
ءالي بيتورە, «ەگەمەن قازاقستان»