ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە «جاستار وتانعا» يننوۆاتسيالىق يدەيالاردىڭ رەسپۋبليكالىق فەستيۆالى ءوتتى.
سالتاناتتى ءىس-شارانىڭ باستى ماقساتى – ەلباسىنىڭ باستامالارىن, ناقتىراق ايتقاندا «تسيفرلىق قازاقستان-2020» باعدارلاماسىن جۇزەگە اسىرۋ مەن دامىتۋعا ۇلەس قوسۋ, سونداي-اق, جاستاردىڭ قوعامداعى بەلسەندىلىگىن ارتتىرۋ.
القالى باسقوسۋعا ءدىن ىستەرى جانە ازاماتتىق قوعام ءمينيسترى نۇرلان ەرمەكباەۆ, «بولاشاق» قاۋىمداستىعى كەڭەسىنىڭ توراعاسى مىندەتىن اتقارۋشى باقتيار ماكەن, ءبىلىم جانە عىلىم مينيسترلىگىنىڭ جاۋاپتى حاتشىسى ارىن ورساريەۆ, رەسەيدەگى «سينەرگيا» بيزنەس-مەكتەبىنىڭ قازاقستانداعى ءبولىمىنىڭ ديرەكتورى باۋىرجان قاسىمبەرگەباەۆ جانە وزگە دە تۇلعالار قاتىستى.
فەستيۆالدىڭ اشىلۋىندا ءسوز العان ءدىن ىستەرى جانە ازاماتتىق قوعام ءمينيسترى نۇرلان ەرمەكباەۆ جاستارعا اسىرەسە كاسىپكەرلەر تاراپى كوبىرەك قولداۋ كورسەتۋ كەرەكتىگىن ۇسىندى.
– مەملەكەت باسشىسى: «قازىرگى تاڭدا جەكە ادام عانا ەمەس, تۇتاس حالىقتىڭ ءوزى باسەكەلىك قابىلەتىن ارتتىرسا عانا تابىسقا جەتۋگە مۇمكىندىك الادى», دەپ ەرەكشە ايتىپ وتكەن. وسى جوبا ارقىلى ءبىز شىعارماشىل جاستارعا قولداۋ كورسەتىپ, ولاردىڭ يننوۆاتسيالىق الەۋەتىن دامىتۋ ءۇشىن الاڭ قۇرعىمىز كەلەدى. بۇگىن مەن بيزنەس-قاۋىمداستىقتى جاستار كاسىپكەرلىگىن قولداۋعا شاقىرامىن, – دەدى مينيستر نۇرلان ەرمەكباەۆ.
جيىنعا ەلىمىزدىڭ تۇكپىر-تۇكپىرىنەن يننوۆاتسيالىق يدەيالارى بار تالانتتى 500 جاس قاتىستى. ال بايانداماشىلار «IT تەحنولوگيالار», «مەديتسينا», «قالدىقتاردى پايداعا جاراتۋ», «اۋىل شارۋاشىلىعى», «ەنەرگەتيكا», «قىزمەت كورسەتۋ سالاسى», «اقىلدى تەحنولوگيالار», «يننوۆاتسيالار» سەكىلدى سەگىز باعىتتا ءوز ويلارىن, يدەيالارىن ءبىلدىردى.
ءىس-شاراعا ەلىمىزدىڭ ۇزدىك بيزنەسمەندەرى, ءتۇرلى سالاداعى ماماندار شاقىرىلدى. ولار وزدەرىنىڭ تاجىريبەلەرىمەن, بىلىمدەرىمەن ءبولىستى. سونىمەن قاتار ءتۇرلى بيزنەس-ويىندار ۇيىمداستىرىلدى.
قاتىسۋشىلار تاراپىنان 100-دەن استام يننوۆاتسيالىق يدەيا كەلىپ ءتۇستى. ولاردىڭ 27-ءى عانا فينالدىق كەزەڭگە جەتتى.
قاراعاندىلىق ۆياچەسلاۆ ليتۆينوۆ «Caste Exoskeleton. رەابيليتاتسيالىق تەحنيكا» جوباسىمەن فەستيۆالدىڭ جەڭىمپازى اتاندى. ول ماسكەۋ قالاسىندا پلەحانوۆ اتىنداعى ينكۋباتوردا تەگىن وقۋ سەرتيفيكاتىنا يەلەندى.
الماتى قالاسىنان كەلگەن ايبەك راحىم, ەرسۇلتان ناليحان, ەلنۇر جەكسەنوۆ «Tazalyk» جوباسىن ۇسىنىپ ەكىنشى ورىن الدى. ال استانا قالاسىنان دامير تاعامباەۆ «ەكوكورم» جوباسى ارقىلى ۇزدىك ۇشتىكتى قورىتىندىلادى.
سونداي-اق فەستيۆالدىڭ جەڭىمپازدارى مەن جۇلدەگەرلەرى «Synergy Global Forum Almaty 2017» حالىقارالىق فورۋمىنا قاتىسۋعا شاقىرىلادى.
ايان ءابدۋالي, «ەگەمەن قازاقستان»