پارلامەنت سەناتى حالىقارالىق قاتىناستار, قورعانىس جانە قاۋىپسىزدىك كوميتەتىنىڭ توراعاسى داريعا نازارباەۆا رەسەي مەملەكەتتىك دۋماسى قورعانىس كوميتەتىنىڭ توراعاسى ۆلاديمير شامانوۆپەن جانە مەملەكەتتىك دۋمانىڭ تمد ىستەرى, ەۋرازيالىق ينتەگراتسيا جانە وتانداستارمەن بايلانىس ىتەرى جونىندەگى كوميتەت توراعاسىنىڭ ءبىرىنشى ورىنباسارى كونستانتين زاتۋلينمەن كەزدەستى. بۇل تۋرالى سەناتتىڭ ءباسپاسوز قىزمەتى حابارلادى.
د.نازارباەۆا قازاقستان مەن رەسەيدىڭ تاتۋ كورشىلىك قاتىناستارىن نىعايتۋدا پارلامەنتارالىق بايلانىستار نەگىزگى ماسەلەلەردىڭ ءبىرى ەكەنىن اتاپ ءوتتى. سەناتور تمد جانە ۇقشۇ پارلامەنتارالىق اسسامبلەيالارى سەكىلدى الاڭداردا ءوزارا پارلامەنتارالىق ءىس-قيمىلدى ودان ءارى نىعايتۋ جايىندا ايتتى.
ۆ.شامانوۆ قازاقستان پرەزيدەنتى ن.نازارباەۆتىڭ سيرياداعى شيەلەنىستى رەتتەۋگە قوسقان زور ۇلەسىن اتاپ ءوتتى.
«استاناداعى كەلىسسوزدەر اياسىندا قول جەتكەن جەتىستىكتەر ونىڭ ماڭىزدىلىعىن دالەلدەدى. وعان قوسا, استانا حالىقارالىق شيەلەنىستەردى شەشۋدەگى الەمدىك ورتالىقتاردىڭ بىرىنە اينالدى», دەدى ول.
سەناتور ءوز كەزەگىندە سيرياداعى جاعدايدى تۇراقتاندىرۋ مەن دايش جانە باسقا دا تەررورشىل توپتاردىڭ اسكەري جانە قارجىلاي الەۋەتىن جويۋداعى رەسەيدىڭ ەرەكشە ءرولىن تىلگە تيەك ەتتى.
«قازاقستان بۇدان بىلاي دا سيرياداعى تەكەتىرەستى بەيبىت رەتتەۋگە جاردەمدەسۋگە, ونىڭ ىشىندە استانادا سيرياارالىق كەلىسسوزدەردى جۇرگىزۋگە بارلىق قاجەتتى جاعدايدى جاساۋعا ءازىر», دەدى د.نازارباەۆا.
اڭگىمە بارىسىندا رەسەي دەپۋتاتتارى مەملەكەتتىك دۋماداعى زاڭ شىعارۋ قىزمەتى, سونداي-اق شەكارا ماڭايىنداعى ىنتىماقتاستىقتى نىعايتۋ جونىندەگى جۇمىستار بارىسى تۋرالى د.نازارباەۆانى حاباردار ەتتى.
كەزدەسۋ اياسىندا حالىقارالىق كۇن ءتارتىبىنىڭ باسقا دا ماڭىزدى سالالارى, اتاپ ايتقاندا, يادرولىق تاقىرىپقا قاتىستى يرانداعى وزەكتى ماسەلەلەر مەن اۋعانستانداعى احۋالدى تۇراقتاندىرۋ جايى دا تالقىلاندى.