15 قىركۇيەكتە «ەگەمەننىڭ» «پارلامەنت» بەتىندە دەپۋتات مەرۋەرت قازبەكوۆانىڭ پرەمەر-مينيستر باقىتجان ساعىنتاەۆتىڭ اتىنا جولداعان ساۋالىن جاريالاعان ەدىك. قىسقاشا ايتاتىن بولساق, وندا دەپۋتات شەتەلگە ساياحاتتاپ شىققان ازاماتتارىمىزعا «تۋريستىك قامقور» قورى جەتكىلىكتى دارەجەدە قامقورلىق كورسەتپەي وتىرعانى تۋرالى جازىلعان. تۋروپەراتورلاردان اقشانى جيناپ العانىمەن قور تۋريستەر كەلەڭسىز جاعدايلارعا تاپ بولسا قول ۇشىن بەرمەيتىندىگى وندا ناقتى فاكتىلەرمەن كورسەتىلگەن. وسىنداي جاعدايلاردى ايتا كەلىپ دەپۋتات ۇكىمەت باسشىسىنا, ءوزىنىڭ ويىنشا پايداسى جوق قورلاردى جابۋ كەرەكتىگىن ۇسىنعان ەدى.
ايتا كەتەتىن جايت, م.قازبەكوۆادان 2 اپتادان كەيىن ۇكىمەت باسشىسىنا ساۋال جولداعان دەپۋتات دانيا ەسپاەۆا دا «تۋريستىك قامقور» قورىنىڭ پايداسىزدىعىن قوسىمشا فاكتىلەرمەن دالەلدەي تۇسكەن. «بۇگىن تۇندە «اق جول» پارتياسى فراكتسياسىنىڭ دەپۋتاتتارىنا قايعىلى جاعدايعا تاپ بولعان تالدىقورعان جانە الماتى قالالارىنىڭ جەتى قازاقستاندىق تۋريستەرى حابارلاستى. 21 قىركۇيەكتە كەمەر قالاسىندا ورىن العان جول كولىك وقيعاسىنان تۇركيانىڭ 4 ازاماتى قازا تاپتى, ال قازاقستاندىقتار اۋىر جاراقاتتار الىپ, ولارعا شۇعىل تۇردە اۋىر وتالار جاسالدى. قازاقتىڭ جاس جىگىتتەرى مەن قىزدارى ەلگە تەك جاتقان قالپىندا تاسىمالدانا الادى, ال وعان قوماقتى قاراجات قاجەت.
الايدا ولاردىڭ «تۋريستىك قامقور» قورىنا, «ەير استانا» اۆياكومپانياسىنا جانە باسقا دا ورگاندارعا ۇندەۋلەرى ناتيجەسىز قالدى. قازىر زارداپ شەككەندەرگە جاردەمدەسۋمەن ءسىم-ءنىڭ انتالياداعى باس كونسۋلى باۋىرجان ابدراحمانوۆ قانا اينالىسىپ جاتىر, بىراق ونىڭ مۇمكىندىكتەرى شەكتەۋلى. ەكى كۇن بۇرىن فراكتسيا دەپۋتاتتارىمەن كەزدەسۋى بارىسىندا «تۋريستىك قامقور» قورىنىڭ باسشىلىعى ء«بىزدىڭ جالعىز مىندەتىمىز – ازاماتتارىمىزدى قايتارۋ», دەپ سەندىردى. نەلىكتەن قازىر ولار ارەكەتسىز وتىر؟ ءبىز ۇكىمەتتەن باعىنىشتى ۇيىمنىڭ ارەكەتسىزدىگىنە ارالاسۋدى سۇراپ, ازاماتتارىمىزدىڭ قايتىپ ورالۋىنا شۇعىل كومەك كورسەتۋدى, سونىمەن بىرگە ولاردى قاجەتتى مەديتسينالىق جانە ۇيىمداستىرۋشىلىق كومەكپەن قامتاماسىز ەتۋدى تالاپ ەتەمىز» دەلىنگەن ونىڭ ساۋالىندا.
وسى ساۋالدارعا پرەمەر-مينيستر كەڭسەسىنىڭ باسشىسى ن.الدابەرگەنوۆ قول قويعان تومەندەگىدەي جاۋاپ كەلدى:
«سىزدەردىڭ قازاقستان رەسپۋبليكاسى ازاماتتارىنىڭ شىعۋ ءتۋريزمى سالاسىندا قۇقىقتارىنا كەپىلدىك بەرۋ جۇيەسىنىڭ كەيبىر ماسەلەلەرىنە قاتىستى دەپۋتاتتىق ساۋالدارىڭىز مۇددەلى مەملەكەتتىك ورگانداردىڭ قوسىمشا پىسىقتاۋىن جانە جان-جاقتى قاراۋىن تالاپ ەتەدى. وسىعان بايلانىستى, اتالعان ماسەلە بويىنشا ۇكىمەت تاراپىنان جاۋاپ كەيىنىرەك بەرىلەتىنىن حابارلايمىن».
ارينە, ۇكىمەت ءوزى قۇرعان قوردى ءوزى دەرەۋ جاۋىپ تاستاماي, ول ءۇشىن جان-جاقتى زەرتتەلىپ, قوردىڭ تيىمسىزدىگىنە شىنىمەن كوز جەتكەندە عانا شەشىم قابىلداناتىن شىعار. ال ونىڭ بۇگىنگى تاڭداعى ءىسىنىڭ شالالىعى – جەكە باسشىلارىنىڭ ءوز مىندەتىن دۇرىس اتقارماعاندىعىندا دا بولۋى مۇمكىن عوي. ايتپەسە قوردى قۇرعانداعى ماقسات – شەتەلگە تۋريستىك ساپارعا شىعاتىن ازاماتتارىمىزعا قامقورلىق جاساۋ نيەتىنەن تۋعانى انىق.
ازىرلەگەن
جاقسىباي سامرات,
«ەگەمەن قازاقستان»