قازىر ينۆەستيتسياعا نەگىزدەلگەن ىرگەلى جوبالار ەكونوميكانى دامىتۋدىڭ ءبىر تەتىگىنە اينالدى. بۇل ورايدا حالىقارالىق, وڭىرارالىق بايلانىستار جاقسى ناتيجە بەرەتىنىن وبلىستاعى اتقارىلعان يگى ىستەر كورسەتىپ وتىر.
قوستاناي رەسەيدىڭ شەكارالاس وبلىستارىمەن, تاتارستان رەسپۋبليكاسىمەن ەكونوميكالىق قارىم-قاتىناس جاسايدى. اسىرەسە سوڭعى جىلدارى تاتارستانمەن بارىس-كەلىس جيىلەدى. تامىز ايىندا قوستانايعا تاتارستان پرەزيدەنتى رۋستام ميننيحانوۆ كەلىپ, كاسىپورىنداردى ارالاپ, ەكونوميكالىق, مادەني بايلانىستار ورناتۋعا باعىتتالعان كەلىسىمدەر جاساسقان بولاتىن. بۇل جولى قوستاناي وبلىسى اكىمىنىڭ ورىنباسارى مەيىرجان مىرزاليەۆ باستاعان دەلەگاتسيا ىسكەرلىك قارىمتا ساپارمەن تاتارستاندا بولىپ قايتتى.
تاتارستان رەسەي ايماقتارى اراسىندا قاي سالادا بولسىن قارقىندى دامۋىمەن ەرەكشەلەنەدى. سوندىقتان قوستانايلىق دەلەگاتسيا تاتار اعايىندارمەن ەكونوميكالىق قاتىناستاردى نىعايتۋعا قول جەتكىزۋدى ماقسات تۇتتى. ساپار بارىسىندا تاتارستاننىڭ پرەمەر-ءمينيسترىنىڭ ءبىرىنشى ورىنباسارى رۋستام نىعماتۋللينمەن كەزدەسۋدە وبلىس اكىمىنىڭ ورىنباسارى مەيىرجان مىرزاليەۆ حالىقارالىق جانە وڭىرارالىق بايلانىستاردى دامىتۋدىڭ ماڭىزىنا توقتالا كەلىپ, قوستاناي وبلىسىنىڭ ەكونوميكالىق ورلەۋ كورسەتكىشتەرى, ينۆەستيتسيالىق الەۋەتى, ىنتىماقتاستىقتىڭ كەلەشەك نەگىزگى باعىتتارى جونىندە ايتىپ بەردى. سونىمەن قاتار ول ينۆەستيتسيالىق جوبالاردى بىرلەسە جۇزەگە اسىرۋى كەڭەيتە تۇسۋگە ءۇمىت ارتاتىنىن دا جەتكىزدى.
تاتارستان ينۆەستيتسيالىق دامۋ اگەنتتىگىنىڭ جەتەكشىسى تاليا مينۋللينامەن بولعان كەزدەسۋدە اتالعان اگەنتتىك قوستانايلىق قوناقتارعا تۇساۋكەسەر جاساپ رەسپۋبليكانىڭ ينۆەستيتسيالىق الەۋەتىن ايتىپ بەردى. تاتارستان رەسەي فەدەراتسياسى بويىنشا ينۆەستيتسيا تارتۋدا كوشباسشى بولىپ كەلەدى جانە بۇل ىستە جاقسى تاجىريبە جيناقتاعان.
ءوز كەزەگىندە مەيىرجان مىرزاليەۆ تە قازاقستاندا ينۆەستيتسيا تارتۋ جونىندە ۇلتتىق ستراتەگيا قابىلدانعانىن, ونى ازىرلەۋ بارىسىندا قوستاناي وبلىسى قاناتقاقتى ءوڭىر دەپ بەلگىلەنگەنىنەن حاباردار ەتتى. سونداي-اق ءبىزدىڭ دەلەگاتسيا تاتارستاننىڭ قۇرىلىس, ارحيتەكتۋرا جانە تۇرعىن ءۇي-كوممۋنالدىق شارۋاشىلىعى مينيسترلىگىندە دە بولدى. وندا رەسەي ينۆەستيتسياسى ارقىلى قوستانايدا جۇزەگە اساتىن ليفت جابدىقتارى ءوندىرىسى جوباسى تۋرالى ايتىلدى.
قوستانايلىقتار قازان قالاسىنداعى «الابۇعا» ەرەكشە ەكونوميكالىق ايماعى مەن «حيمگراد» تەحنوپوليسىن ارالادى. وسىدان 11 جىل بۇرىن «الابۇعا» ارنايى ەكونوميكالىق ايماعىنا 27 ميلليارد رۋبل ينۆەستيتسيا بولىنگەن بولاتىن. بۇگىندە ايماقتا ماشينا جاساۋ, حيميا, قۇرىلىس ماتەريالدارىن وندىرەتىن, مەتالل وڭدەۋ سەكىلدى ىرگەلى كاسىپورىندار ورنالاسقان. ال جاڭا جوبانى جۇزەگە اسىرام دەگەن ينۆەستورلارعا ايماقتا جەر دە ۇسىنىلادى, ينفراقۇرىلىمدىق قولداۋ دا كورسەتىلەدى.
قوستاناي وبلىسىنىڭ دەلەگاتسياسى تاتار اعايىنداردىڭ ينۆەستيتسيا تارتۋداعى باي تاجىريبەسى مەن ۇردىستەرىنەن ۇلگى الىپ قايتتى.
ءنازيرا جارىمبەت,
«ەگەمەن قازاقستان»
قوستاناي