قازاقستان مەن ازەربايجان – ەجەلدەن دوستىعى جاراسقان مەملەكەتتەر. ەكى ەلدىڭ اراسىندا ديپلوماتيالىق قارىم-قاتىناس ورنىققان شيرەك عاسىر ىشىندە ىنتىماقتاستىقتى بارلىق سالادا دامىتۋ ماسەلەسى ۇدايى جۇرگىزىلىپ كەلەدى. بۇگىن اشىلعالى وتىرعان باكۋ – تبيليسي – كارس تەمىر جول جەلىسى دە – قوس مەملەكەتتىڭ كولىك-ترانزيتتىك الەۋەتىن ارتتىرۋدىڭ ماڭىزدى ستراتەگيالىق جوباسى.
وسىناۋ ماڭىزدى وقيعاعا بايلانىستى ازەربايجاننىڭ بەلگىلى ساياسي تۇلعالارى, ەكونوميست-ساراپشىلارى دا ءوز ويلارىن بىلدىرۋدە. ازەربايجان ءماجىلىسىنىڭ دەپۋتاتى تاحير ميركيشيليدىڭ ايتۋىنشا, بۇل – قازاقستان مەن ازەربايجان بايلانىسىنا تىڭ سەرپىن بەرەتىن اۋقىمدى جوبا. قازىرگى تاڭدا ەلدەردىڭ ەكى بىردەي ستراتەگيالىق ارىپتەسى قىتاي مەن ەۋروپالىق وداق اراسىنداعى تاۋار اينالىمى 500 ملرد اقش دوللارىنا جەتكەن. ال ەكى ورتاعا جىل سايىن 100 ملن توننا جۇك تاسىمالدانادى. بۇل جۇكتەردى تاسىمالدايتىن ەكى جول بار. سونىڭ ءبىرى – قىتايدان باستالىپ, ءترانسسىبىر تەمىر جولىن پايدالانۋ ارقىلى رەسەيمەن سولتۇستىك ەۋروپاعا جەتكىزۋ بولسا, ەكىنشىسى – ءۇندى مۇحيتى ارقىلى نەمىس پورتىنا اپاراتىن تەڭىز جولى.
بۇل ەكەۋىنىڭ دە وزىندىك ارتىقشىلىعى مەن كەمشىلىگى بار. ءبىرىنشىسى ساياسي جاعىنان تۇراقتى ەمەس بولسا, ەكىنشىسى وتە ۇزاق جول. سوندىقتان وسىدان ون جىلداي بۇرىن باكۋدە ۇلكەن جيىن ءوتىپ, سوندا قابىلدانعان دەكلاراتسيادا ساياسي جاعىنان تۇراقتى, قاي ەلگە دە ءتيىمدى بىرىڭعاي پلاتفورما قۇرۋ تۋرالى ايتىلعان. «ەۋروپالىق وداق پەن قىتاي, قازاقستان مەن ازەربايجان, تۇركيا مەن ورتالىق ازيا, رەسەي مەن يران اراسىنداعى تاۋار اينالىمىنداعى ءوسىمدى ەسەپتەگەندە وسى ەلدەرگە جىلدام تاۋار جەتكىزەتىن, ەكونوميكالىق جاعىنان ءتيىمدى بولاتىن ۇلكەن جوبانى قولعا الۋ ماسەلەسى باكۋ كونفەرەنتسياسىندا كەڭىنەن قوزعالدى. وسىلايشا, باكۋ – تبيليسي – كارس تەمىر جول جەلىسىن سالۋ يدەياسى دۇنيەگە كەلگەن ەدى. بۇل ءبىزدىڭ ەلدەردى, تۇركيا, گرۋزيانى بايلانىستىراتىن, ياعني ەۋروپادان باستالىپ, تۇركيا ارقىلى ءوتىپ, كاۆكاز, ورتالىق ازيا مەن قىتايدى جالعايتىن ورتاق كوپىر ىسپەتتى», دەيدى دەپۋتات.
ال ازەربايجاننىڭ ەكونوميست-ساراپشىسى فۋاد اليزادە 800 شاقىرىمنان اساتىن ازەربايجان, گرۋزيا, تۇركيا تەمىر جولدارىن بىرىڭعاي جەلىگە قوساتىن باكۋ – تبيليسي – كارس تەمىر جول باعدارى ترانسكاسپي حالىقارالىق كولىك ءدالىزىنىڭ ماڭىزدى بولىگى ەكەنىن ايتادى. ونىڭ پىكىرىنشە, ماگيسترالدى پايدالانۋعا بەرۋ ارقىلى قىتايدان شىعاتىن جۇك اعىنىن قازاقستان اۋماعىمەن اقتاۋ پورتى, قۇرىق, اليات ايلاقتارى ارقىلى تۇركياعا قىسقا جولمەن جەتكىزىپ, ودان ءارى ەۋروپاعا باعىتتاۋعا بولادى. بۇل ءبىر جاعىنان ۋاقىتتى جانە شىعىندى ۇنەمدەيدى. «مىسالى, 25 قازان كۇنى قازاقستاننىڭ قوستاناي قالاسىنان شىققان جۇك تۇرىكتىڭ قالاسىنا باكۋ – تبيليسي – كارس ارقىلى جىلدام جەتەدى. ون جىلعا جۋىق ۋاقىت بويى سالىنعان تەمىر جول جەلىسى قازاقستان مەن ازەربايجان اراسىنداعى ستراتەگيالىق بايلانىستى نىعايتا تۇسەدى», دەيدى ەكونوميست.
سونىمەن بۇگىن باكۋ – تبيليسي – كارس تەمىر جول جەلىسىنىڭ سالتاناتتى اشىلۋىنا ەلباسى نۇرسۇلتان نازارباەۆ جانە ازەربايجان پرەزيدەنتى ي.اليەۆ, تۇركيا پرەزيدەنتى ر.ەردوعان, گرۋزيا پرەمەر-ءمينيسترى گ.كۆيريكاشۆيلي, وزبەكستان پرەمەر-ءمينيسترى ا.ءارىپوۆ قاتىسادى دەپ كۇتىلۋدە.
قىمبات توقتامۇرات,
«ەگەمەن قازاقستان» –
باكۋدەن (ازەربايجان)