باتىس قازاقستاندا مەملەكەتتىك قىزمەتشىلەر سىيلىق الماي ما, الدە العان سىيلىعىن تاپسىرماي ما؟

اليك شپەكباەۆ ارنايى مونيتورينگتىك توپ مۇشەلەرىمەن بىرگە ورال قالاسى اكىمدىگىندە بيىلعى ماۋسىم ايىنان بەرى جۇمىس ىستەپ تۇرعان «اشىق اكىمدىك» جوباسىنىڭ ناتيجەلەرىمەن تانىستى. تۇرعىنداردىڭ اكىمدىك كابينەتتەرى اراسىندا سابىلىپ جۇرمەي, جاڭاشا ۇيىمداستىرىلۋى – زامان تالابى. ورالدىق «اشىق اكىمدىك» جوباسىنىڭ جۇمىسىن ارالاپ كورگەن توراعا ورىنباسارى بۇل باستامانى ودان ءارى جاقسارتۋ بويىنشا ءوز ۇسىنىستارىن ايتتى.

ساپار اياسىندا ا.شپەكباەۆ وبلىستىڭ تەرەكتى, زەلەنوۆ جانە تاسقالا اۋداندارىندا كوشپەلى كەزدەسۋ وتكىزىپ, جۇمىسپەن قامتۋ جانە الەۋمەتتىك باعدارلامالار, حالىققا قىزمەت كورسەتۋ, كوشى-قون قىزمەتى سالالارى جانە اۋداندىق اۋرۋحانا سەكىلدى حالىق پەن بيزنەسكە قىزمەت كورسەتەتىن مەكەمەلەردى ينسپەكتسيالادى.

كەزدەسۋ بارىسىندا ا.شپەكباەۆ مەملەكەت كورسەتەتىن قىزمەت ساپاسىن ارتتىرۋ, مەملەكەتتىك ورگانداردا ازاماتتارعا جاعداي جاساۋ ءۇشىن جۇمىستى وڭتايلاندىرۋ, اۆتوماتتاندىرۋ قاجەتتىلىگىن ءتۇسىندىردى. اۋدان اكتيۆىمەن كەزدەسۋ بارىسىندا جەرگىلىكتى اكىمدەرگە قاي سالادا بولماسىن مەملەكەتتەن كورسەتىلەتىن قىزمەتتەردى الۋ كەزىندە ازاماتتارعا قولايلى جاعداي جاساۋدى تاپسىردى. مەملەكەتتەن كورسەتىلەتىن قىزمەتتەردى الۋ كەزىندە تۇرعىنداردىڭ زاڭدى قۇقىعى بۇزىلسا, ءتيىستى ورىندارعا شاعىمدانىپ, بەلسەندى ازاماتتىق ۇستانىمىن كورسەتسىن دەدى استانالىق وكىل.  27 قازاندا توراعا ورىنباسارىنىڭ قاتىسۋىمەن ورال قالاسىندا سىبايلاس جەمقورلىققا قارسى «تازا قول: پاراسىز بولاشاققا بىرگە» اتتى فورۋم ءوتتى. بۇل جيىندا دا جەرگىلىكتى كاسىپكەرلەر اراسىنان سۋىرىلىپ شىعىپ, ءوز كاسىبىندە كەزدەسكەن زاڭبۇزۋشىلىقتار مەن كەدەرگىلەر تۋرالى مەملەكەتتىك مەكەمەلەر قىزمەتىنە شاعىم ايتقاندار بولدى. اليك جاتقامباي ۇلى ول ماسەلەلەردىڭ ارقايسىسى تۋرالى ەكىنشى جاقتىڭ كوزقاراسىن تىڭداپ, ماسەلەنى زەرتتەپ, وڭ شەشىلۋىنە كومەكتەسۋگە ۋادە بەردى.

28 قازاندا ا.شپەكباەۆ باتىس قازاقستان وبلىسى اكىمى جانىنداعى سىبايلاس جەمقورلىققا قارسى كوميسسيا وتىرىسىنا قاتىستى. بۇل جيىنعا جەرگىلىكتى جانە ورتالىق مەملەكەتتىك ورگانداردىڭ, قۇقىققورعاۋ جۇيەسىنىڭ باسشىلارى, اۋدان اكىمدەرى, اۋداندىق ءماسليحات حاتشىلارى مەن دەپۋتاتتار, قوعامدىق كەڭەستەردىڭ جانە ۇكىمەتتىك ەمەس ۇيىمداردىڭ وكىلدەرى شاقىرىلعان. وتىرىستا مەملەكەت كورسەتەتىن قىزمەت ساپاسى, مەملەكەتتىك قىزمەت سالاسىندا زاڭنامانىڭ ساقتالۋى جانە سىبايلاس جەمقورلىققا قارسى قولدانىلىپ جاتقان شارالار تالقىلاندى.  اگەنتتىك توراعاسىنىڭ ورىنباسارى ءوز سوزىندە ەلىمىزدىڭ سىبايلاس جەمقورلىققا قارسى ساياساتى تۇبەگەيلى وزگەرگەنىن ايتىپ ءوتتى. 

- جۇرگىزىلگەن جۇمىس ناتيجەسىندە اكىمشىلىك كەدەرگىلەر قىسقاردى, تۇرمىستىق جەمقورلىق تومەندەدى, مەملەكەتتىك ورگانداردىڭ اشىقتىق جانە ەسەپ بەرۋ پرينتسيپتەرى ەنگىزىلدى. سونداي-اق, سىبايلاس جەمقورلىققا قارسى ستراتەگيانى ودان ءارى ءتيىمدى جۇزەگە اسىرۋ ءۇشىن باعدارلى زاڭنامانىڭ جانە سىبايلاس جەمقورلىققا قارسى شارالاردىڭ تيىمدىلىگىن جەتىلدىرۋ مەن كوتەرۋ قاجەتتىلىگى بايقالادى, - دەدى اليك جاتقامباي ۇلى.

ازاماتتار ادەتتە مەملەكەتتىك قۇرىلىمدارعا مەملەكەتتەن كورسەتىلەتىن قىزمەت ءۇشىن كەلەدى. ول قىزمەتتىڭ ساپالى جانە ۋاقىتىلى, اكىمشىلىك كەدەرگىلەرسىز بولۋى – ءاربىر قىزمەت كورسەتۋشىنىڭ مىندەتى. بىراق, تالداۋ ناتيجەلەرى بۇل سالادا شەشىلمەگەن تۇيىندەر بار ەكەندىگىن كورسەتەدى. بقو بويىنشا جالپى كورسەتىلگەن مەملەكەتتىك قىزمەتتىڭ 31%-ى عانا (2,4 ملن.) ەلەكتروندى تۇردە كورسەتىلگەن. مەملەكەتتىك كورپوراتسيا ارقىلى كورسەتىلگەن مەملەكەتتىك قىزمەت ۇلەسى 2016 جىلعى 2%-دان 46%-عا دەيىن ءوسىپتى. الايدا, مەملەكەتتىك قىزمەتتىڭ باسىم بولىگى ءالى قاعاز تۇرىندە جۇرەدى. 

باتىس قازاقستان وبلىسىندا بيىلعى 9 اي ىشىندە 304 مەملەكەتتىك قىزمەتشى قىزمەتىنەن اۋىسقان ەكەن. بۇل رەسپۋبليكالىق كورسەتكىشتەن 1,8%-عا جوعارى. «جەرگىلىكتى اتقارۋشى ورگاندارداعى كادرلىق جاعدايعا باسا نازار اۋدارۋ كەرەك» دەدى ا.شپەكباەۆ. مەملەكەتتىك قىزمەتشى قىزمەت وكىلەتىن ورىنداۋ كەزىندە قۇنى 1 اەك-تەن ارتىق بولاتىن سىيلىقتى الۋىنا بولمايدى. ياعني ايتقاندا, قۇنى 1 اەك-تەن ارتىق سىيلىق بولسا, ول مەملەكەتتىك قورعا تاپسىرىلۋى ءتيىس. ال مەملەكەتتىك م ۇلىك جانە جەكەشەلەندىرۋ كوميتەتىنىڭ 2017 جىلدىڭ 9 ايىنداعى قورىتىندىسىنا قاراعاندا بقو-دا مەملەكەتتىك قورعا جالپى سوماسى 207 125 تەڭگە بولاتىن 116 سىيلىق قانا تاپسىرىلعان. سوندا بقو مەمقىزمەتشىلەرى سىيلىق الماي ما, الدە العان سىيلىعىن تاپسىرماي ما؟ ا.شپەكباەۆ مەملەكەتتىك مەكەمە باسشىلارىنا بەرىلگەن سىيلىقتارعا تۇگەندەۋ جۇرگىزىپ, ارنايى قورعا تاپسىرىلۋىن قاداعالاۋ قاجەتتىگىن اتاپ كورسەتتى.

ورالداعى كوميسسيا وتىرىسىندا «سىبايلاس جەمقورلىققا قارسى ءبىرىنشى مەديا-ورتالىق» رەسپۋبليكالىق قوعامدىق ۇيىمىنىڭ توراعاسى ت.بايعۇلوۆ «جولداردا سىبايلاس جەمقورلىق دەڭگەيىن تومەندەتۋ بويىنشا 10 قادام» جوباسىمەن تانىستىردى.شارا سوڭىندا, «جاسىرىن ساتىپ الۋ» جوباسىنىڭ جۇمىسى قورىتىندىلانىپ, رەزونانستى سىبايلاس جەمقورلىق ىستەرى بويىنشا بەينەروليكتەر كورسەتىلدى.  قازبەك قۇتتىمۇرات ۇلى

سۋرەتتى تۇسىرگەن ايباتىر نۇراش

ورال