تاۋەلسىزدىك جىلدارىندا بۇقارالىق اقپارات قۇرالدارى, بايلانىس پەن اقپاراتتاندىرۋدىڭ بارلىق اسپەكتىلەرى بويىنشا زاڭنامالىق بازا قالىپتاستى. ارنايى زاڭدار قابىلداندى.
ۋاقىتپەن بىرگە ولار دا جاڭارىپ كەلەدى. اتىراۋدا كەيبىر زاڭنامالىق اكتىلەرگە اقپارات جانە كوممۋنيكاتسيالار ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى وتكەن دوڭگەلەك ۇستەلدە سالانى نىعايتۋ, وتاندىق اقپارات دەڭگەيىن كوتەرۋ, كوممۋنيكاتسيالىق ينفراقۇرىلىمدى دامىتۋ جايى ءسوز بولدى.
زاڭ جوباسىن تالقىلاۋعا ارنالعان شاراعا قر پارلامەنت ءماجىلىسىنىڭ توراعاسى نۇرلان نىعماتۋللين, وبلىس اكىمى نۇرلان نوعاەۆ, اقپارات جانە كوممۋنيكاتسيا مينيسترلىگىنىڭ, مەملەكەتتىك ورگاندار مەن رەسپۋبليكالىق, ايماقتىق بۇقارالىق اقپارات قۇرالدارىنىڭ وكىلدەرى, ساراپشىلار مەن بلوگەرلەر قاتىستى.
ءماجىلىستىڭ الەۋمەتتىك-مادەني دامۋ جونىندەگى كوميتەتى ۇيىمداستىرعان دوڭگەلەك ۇستەلدە نۇرلان نىعماتۋللين جاڭا زاڭ جوباسىن ايماقتاردا تالقىلاۋ وڭ ناتيجە بەرەتىنىن, وتاندىق اقپارات كەڭىستىگىنىڭ باسەكەگە قابىلەتتىلىگىن ارتتىرىپ, دامىتۋ ءۇشىن سالالىق زاڭنامالاردى جەتىلدىرۋ قاجەتتىلىگىن اتاپ ءوتتى.
ينتەرنەت-رەسۋرستار, الەۋمەتتىك جەلىدەگى اككاۋنتتار, اقپارات اينالىمى, ينتەرنەت پايدالانۋشىلاردىڭ جاۋاپكەرشىلىگى زاڭ جۇزىندە رەتتەلۋى ءتيىس. اۆتورلىق قۇقىق, اقپاراتتى زاڭسىز, پايدا تابۋ ماقساتىندا پايدالانۋ جايى دا وزەكتى تاقىرىپ.
ءماجىلىس توراعاسىنىڭ ايتۋىنشا, كوپتەگەن ماسەلەلەردى زاڭدىق تۇرعىدا رەتتەۋ قاجەتتىلىگى ۇكىمەتتىڭ قولدانىستاعى زاڭناماعا وزگەرىستەر ەنگىزۋىنە تۇرتكى بولعان. «مەملەكەت باسشىسى تاۋەلسىزدىك العان كۇننەن باستاپ ءسوز بوستاندىعىن قامتاماسىز ەتۋگە جانە وتاندىق اقپارات قۇرالدارىنىڭ دامۋىنا ەرەكشە جاعداي جاسادى. پرەزيدەنتى ارقاشان دا ماڭىزدى شەشىمدەردىڭ بارلىعىن حالىقپەن اقىلداسىپ قابىلداۋ كەرەكتىگىن ايتىپ كەلەدى. سوندىقتان, وسى قۇجات تا پارلامەنت ماجىلىسىندە, قوعامدىق ورتادا كەڭىنەن قارالىپ, كوپتەگەن شارالار ءوتتى. وتاندىق بۇقارالىق اقپارات قۇرالدارىنىڭ جۇمىسىنىڭ تيىمدىلىگىن ارتتىرۋعا, باسەكەگە قابىلەتتى اقپاراتتىق نارىق قالىپتاستىرۋعا, ەلىمىزدىڭ اقپاراتتىق قاۋىپسىزدىگىن قامتاماسىز ەتۋگە جول اشاتىن زاڭدى ءبارىمىز بىرلەسىپ جاساۋىمىز كەرەك», - دەدى ن.نىعماتۋللين.
اشىق ديالوگ الاڭىندا قازنەت جۇمىسىن ۇيىمداستىرۋ, الەۋمەتتىك جەلىلەردەگى پىكىرلەردى سايكەستەندىرۋ, مەملەكەتتىك ورگانداردىڭ اقپاراتتى بەرۋ جەدەلدىگى, زاڭمەن قورعالاتىن قۇپيالاردىڭ باق-تا جاريالانۋىنا كەلىسىم الۋ, جوققا شىعارۋ مەحانيزمى, اقپارات تاراتۋ كەزىندە كامەلەتتىك جاسقا تولماعانداردى قورعاۋ ماسەلەلەرى دە ايتىلدى.
دوڭگەلەك ۇستەل وتىرىسىنان كەيىن ءماجىلىس توراعاسى, «نۇر وتان» پارتياسى ساياسي كەڭەس بيۋروسىنىڭ مۇشەسى ن. نىعماتۋلين پارتيانىڭ اتىراۋ وبلىستىق فيليالىندا ازاماتتاردى جەكە سۇراقتار بويىنشا قابىلدادى. سپيكەردىڭ قابىلداۋىنا كەلگەندەر «اتىراۋ - استراحان» جولىنىڭ جوندەلۋى, جاڭا مەكتەپ سالۋ, تۇرعىن ۇيلەردىڭ گازبەن قامتاماسىز ەتىلۋى سىندى الەۋمەتتىك ماسەلەلەردى العا تارتتى.
نۇرلان نىعماتۋلين ول ماسەلەلەردىڭ زاڭنامالىق تۇرعىدان شەشۋ مۇمكىندىكتەرىن قاراستىرىپ, جەرگىلىكتى اتقارۋشى ورگاندار وكىلدەرىمەن ارادا بولعان كەلىسىمدەردىڭ ورىندالۋىن باقىلاۋعا الاتىنىن ايتتى.
باقىتگۇل باباش,
«ەگەمەن قازاقستان»
اتىراۋ
سۋرەتتى تۇسىرگەن
ەرلان التىباەۆ