بيىل ناۋرىز ايىندا اقمولا وبلىسىندا قۇرىلعان ء«اليحان-ءامىر» اۋىلشارۋاشىلىق وندىرىستىك كووپەراتيۆى ءوندىرۋشى كاسىپورىندارعا كۇنىنە 2,5 توننا ءسۇت جەتكىزىپ تۇرادى. جازعى ايلاردا تاپسىرىلاتىن ءونىمنىڭ كۇندەلىكتى كولەمى 7-8 تونناعا جەتەتىن, دەپ حابارلايدى «اۋىل شارۋاشىلىعىن قارجىلاي قولداۋ قورى» اق ءباسپاسوز قىزمەتى.
زەرەندى اۋدانى كاراوزەك اۋىلىندا ورنالاسقان ء«اليحان-ءامىر» اوك 31 شاعىن شارۋاشىلىقتى بىرىكتىرەدى. وبلىس ورتالىعىنان 45 كم جەردە ورنالاسقان كووپەراتيۆ ءسۇتتى «Milk Project» جانە «Natige» زاۋىتتارىنا قايتا وڭدەۋگە تاپسىرادى.
«اۋىل شارۋاشىلىعىن قارجىلاي قولداۋ قورى» اق ء«اليحان-ءامىر» كووپەراتيۆى مۇشەلەرىن «ىرىس» باعدارلاماسى بويىنشا ءسۇتتى باعىتتاعى مال ساتىپ الۋ ءۇشىن قارجىلاندىردى. سونىمەن قاتار, كووپەراتيۆتىڭ ءوزى قوردان نەسيە الىپ, ءمودۋلدى ءسۇت قابىلداۋ بەكەتىن ساتىپ الدى. مودۋل مەملەكەت تاراپىنان ينۆەستيتسيالىق سۋبسيديالاردى ەسەپكە الا وتىرىپ, جەڭىلدەتىلگەن جۇيە بويىنشا ساتىپ الىنعان جانە قورعا نەسيەنى قامتاماسىز ەتۋ ءۇشىن كەپىل رەتىندە تاپسىرىلدى.
كووپەراتيۆ مۇشەسى قابيدەن نامەتوۆتىڭ بۇرىن كىشكەنتاي قوراسىندا ەكى سيىرى بولاتىن. قوردىڭ نەسيەلىك قارجىسىنا ول ءىرى قارا مالدىڭ 16 باسىن ساتىپ الىپ, قاجەتتى مال ازىق دايىنداعان. قازىر جاڭادان كەڭ قورا سالىپ, جۇبايىنا كومەكتەسەتىن ءبىر ساۋىنشىنى جۇمىسقا الدى.
نەماتوۆ قابيدەن, ء«اليحان-ءامىر» اوك مۇشەسى:
بۇرىن ەكى سيىرىمىز بولاتىن, قازىر مال باسىن كوبەيتىپ, ءسۇتتى كووپەراتيۆكە تاپسىراتىن بولدىق. بۇل ءادىس جاقسى ەكەن – بىرىنشىدەن, ءسۇتتى وزدەرى الىپ كەتەدى, ەكىنشىدەن, ءبىز 6 پايىزبەن نەسيە الىپ وتىرمىز. ەلباسىنا, ۇكىمەتكە وسىنداي باعدارلامالار ءۇشىن ۇلكەن ريزاشىلىعىمدى بىلدىرگىم كەلەدى. سۇتتەن تۇسكەن اقشاعا ەرتەڭگى كۇنىمىزدى ۇايىمداماي, وتباسىلارىمىزدى اسىراپ وتىرمىز.
اۋىل تۇرعىندارى مال ازىقتى بىرىگىپ دايىندايدى – ءشوپ شابۋ, ونى جەتكىزۋ جۇمىستارى ورتاق تەحنيكامەن جۇرگىزىلەدى. ءونىمنىڭ ساپاسى جاقسى - ءسۇت قابىلدايتىن ازاماتتار ونىڭ ساپاسىن قاتاڭ قاداعالايدى.
ء«اليحان-ءامىر» اوك توراعاسى ءوز بيزنەسىن 2004 جىلى ەسكى «پيروجكوۆوزبەن» باستاعان بولاتىن. قالاعا ءوز ءسۇتىن فلياگامەن اپارىپ, كۇن كورەتىن. كەيىن تۋىستارى مەن كورشىلەرى دە وعان قوسىلىپ, ءسۇتتى تاپسىرا باستادى. 2007 جىلى ۇستالىنعان ۋاز ساتىپ الدى. كەيىن ءبىرىنشى ءسۇت تاسىمالداۋ كولىگىن الىپ, ءونىم كولەمىن ۇلعايتتى. ءبىرىنشى سالقىنداتقىشتى الدى. وسى جىلى قوردىڭ كومەگىمەن مودۋلدىك ءسۇت قابىلداۋ بەكەتىن ساتىپ الىپ, ونى قاراوزەك اۋىلىندا ورناتتى.
سەرعازينوۆ قۇنانباي, ء«اليحان-ءامىر» اوك توراعاسى:
ءبىز ءسۇتتى كووپەراتيۆ مۇشەلەرىنەن جانە اۋىل تۇرعىندارىنان قابىلدايمىز – جالپى 8 اۋىلداعى 200 وتباسىدان. ورتا ەسەپپەن, ءبىر ايدا ولاردان 15 ميلليون تەڭگەگە ءسۇت ساتىپ الامىز. وسى جىلى كوكشەتاۋداعى قايتا وڭدەۋ زاۋىتتارىنا 500 توننادان استام ءسۇت جەتكىزدىك. قازىرگى تاڭدا بىزدە ەكى تانكەر, ءتورت ءسۇت تاسىمالداۋ كولىگىمىز بار.
كوكشەتاۋ قالاسىنداعى «Natige» جشس فيليالى باسقارۋشىسىنىڭ ورىنباسارى ءوستاي ءابۋمحاننىڭ ايتۋىنشا, زاۋىت بۇل كووپەراتيۆپەن قۇرىلعان كەزىنەن باستاپ, جۇمىس ىستەپ كەلەدى. ءسۇتتىڭ كورسەتكىشتەرى ستاندارتتارعا ساي, ساپاسى جاقسى. اقىسى اپتاسىنا ءبىر رەت تولەنەدى. زاۋىت اقمولا, سولتۇستىك قازاقستان وبلىستارىنىڭ باسقا دا كووپەراتيۆتەرىمەن ىنتىماقتاسۋعا دايىن, سەبەبى ءوندىرۋ قۋاتتىلىعى ءسۇتتىڭ قوسىمشا كولەمدەرىن قابىلداۋعا مۇمكىندىك بەرەدى.
ابزال كەنجەاحمەتوۆ, «اۋىل شارۋاشىلىعىن قارجىلاي قولداۋ قورى» اق اقمولا فيليالى ديرەكتورىنىڭ ورىنباسارى:
اقمولا وبلىسىندا قوردىڭ قاتىسۋىمەن 38 كووپەراتيۆ قۇرىلىپ, ءبىر مىڭنان استام شاعىن شارۋاشىلىقتى بىرىكتىردى. ونىڭ ىشىندە 25 - ءسۇت, 13 - ەت باعىتىندا جۇمىس ىستەيدى. وبلىستا كووپەراتيۆتەردى جانە ولاردىڭ قاتىسۋشىلارىن قارجىلاندىرۋعا 700 ملن تەڭگە بولىنگەن. جالپى, وبلىسىمىزدا قوردىڭ بارلىق نەسيە باعدارلامالارى بويىنشا 2 ميللياردتان استام تەڭگە اۋىلدىق جوبالارعا باعىتتالدى.
جالپى العاندا, اۋىل شارۋاشىلىعىن قارجىلاي قولداۋ قورىنىڭ قاتىسۋىمەن رەسپۋبليكادا 400-دەن استام كووپەراتيۆ قۇرىلدى, كومپانيا 5,8 مىڭ وتباسىلىق مال بورداقىلاۋ الاڭىن, 134 ءسۇت قابىلداۋ بەكەتىن, 54 سويۋ بەكەتىن, 133 مىڭ اۋىلشارۋاشىلىق جانۋار باسىن ساتىپ الۋدى قارجىلاندىردى.