وسىدان ءبىراز بۇرىن سپورتتىق مانسابىن كاسىپقوي بوكستا جالعاستىرۋ ءۇشىن اقش-قا اتتانعان داۋرەن ەلەۋسىنوۆ ءبىر جارىم جىلدان بەرى شارشى الاڭعا شىقپاپتى. بۇعان پروموۋتەرلىك كومپانيالاردىڭ ۋادەلەرىندە تۇرماعانى سەبەپ بولعان ەكەن...
بۇگىنگە دەيىن بەس جەكپە-جەگىندە جەڭىسكە جەتىپ, بىرەۋىن تەڭ اياقتاعان بوكسشى مۇحيتتىڭ ار جاعىنداعى ءومىرى, الداعى جوسپارلارى تۋرالى وي ءبولىسىپ جانە ءىنىسى – وليمپيادا چەمپيونى دانيار ەلەۋسىنوۆتىڭ اۋەسقوي بوكسقا قايتا ورالۋىنا قاتىستى سۇراقتارىمىزعا جاۋاپ بەردى.
– داۋرەن, سۇحباتىمىزدى گەننادي گولوۆكين مەن ساۋل الۆارەس اراسىنداعى جەكپە-جەك قورىتىندىسىنا قاتىستى پىكىرىڭىزدەن باستاساق. ءسىزدىڭ ويىڭىزشا, بۇل شەشىم قانشالىقتى ادىلەتتى؟
– مەنىڭشە, بۇل – بوكس الەمىندەگى ەكى الىپتىڭ ەسىمىن ءالى دە پايدالانۋ ماقساتىندا شىعارىلعان شەشىم. ۇيىمداستىرۋشىلارعا ەكەۋىنە قارىمتا جەكپە-جەك بەرۋ ارقىلى تاعى دا اقشا جاساۋ كەرەك بولىپ تۇر. ءوزىم سول سالادا ازداپ جۇرگەندىكتەن جوعارى جاقتاعىلاردىڭ كوزدەپ وتىرعان ماقساتىن تۇسىنەمىن.
بۇل ايقاستا گەننادي بەلسەندى بولدى. اشىق شابۋىلعا شىعىپ, كوبىرەك سوققى جۇمساۋعا تىرىستى. ال «كانەلو» قورعانىسقا كوڭىل بولگەنىمەن, ءدال سوققىلار جاعىنان باسىم تۇسكەندەي كورىندى.
– اڭگىمە اۋانىن وزىڭىزگە بۇرساق. جاقىندا استانادا وتكەن بوكس كەشىندە ءسىزدى كورىپ قالدىق. ەلورداعا قاشان كەلىپ ەدىڭىز؟
– شامامەن ءبىر ايعا جۋىقتادى. اتا-انامىزدى كورىپ كەتەيىك دەپ كەلدىك, ءارى ۆيزانى سوزدىراتىن دا ۋاقىت جاقىنداپ قالدى. ودان بولەك ءبىرجارىم جىل جەكپە-جەكسىز ءجۇردىم. پروموۋتەرلىك كومپانيالارمەن كەلىسىمشارتتى ۇزگەنمىن, ەندى وسى جۇمىستى رەتكە كەلتىرۋ كەرەك. العاش بارعاندا, تاجىريبەسىزدىكتىڭ كەسىرى عوي, ءبىرىنشى كەزدەسكەن پروموۋشنمەن كەلىسىپ قول قويا سالعانمىن. نە قۇجات تەكسەرمەگەنمىن, نە جاتتىعۋ جاعدايىنىڭ جاقسى بولاتىنىنا ابدەن كوز جەتكىزىپ الماعانمىن. بۇلاي دەيتىنىم, كەزدەسۋلەرگە قيىن جاعدايدا دايىندالۋعا تۋرا كەلدى. بەلگىلەنگەن جەكپە-جەكتەر وتپەي قالاتىن. قۇرعاق سوزگە الدانىپ جۇرگەنىمدى تۇسىنگەندىكتەن, كەلىسىمشارتتى بۇزامىن دەپ شەشتىم. بىراق ونىڭ وزىنە ءبىرجارىم جىل ۋاقىت كەتتى. ەندى مۇنداي جۇمىستارعا جاۋاپتى قاراۋ كەرەكتىگىنە كوزىم جەتكەندىكتەن, سپورتتىق كارەرامدى قاتەلىكسىز قايتا باستاعىم كەلەدى. بىرەۋگە قۇل بولىپ جۇمىس ىستەگىم كەلمەيدى.
– جىلدىڭ باسىندا باسقا كومپانيامەن كەلىسىمشارتقا قول قويدى دەپ ەستىپ ەدىك...
– جوق, ودان دا باس تارتتىم. مۇحيتتىڭ ار جاعىندا تمد ەلدەرىنەن كەلگەن بوكسشىلارعا سپورت گاستاربايتەرلەرى رەتىندە قاراپ, پايدالانىپ قالعىسى كەلەدى. ەشقانداي جاعداي جاسالمايدى. ال ەكىنشى كومپانيانىڭ تالابى بويىنشا ءىنىم دانيار دا سول قاتارعا قوسىلۋى كەرەك ەدى. بىراق ول باس تارتقاندىقتان, مەنىڭ كەلىسىمشارتىم دا جارامسىز بولدى. دەگەنمەن ارادا كەلىسپەۋشىلىك بولعان جوق.
– امەريكاعا ارمان قۋىپ باراتىن بوكسشىلار كوپ. ءبارى دە ءوز جولىن تاپقىسى كەلەدى. ال باسەكەگە توتەپ بەرۋ ءۇشىن نە ىستەۋ كەرەك؟
– ەڭ الدىمەن ساۋاتتى زاڭگەرلىكپەن «قارۋلانعان» ءجون. سەبەبى كەلىسىمشارت جاسار الدىندا ارنايى ماماننىڭ كومەگى قاجەت بولادى. بوكسشى قانداي قاعازعا قول قويىپ جاتقانىن بۇگە-شەگەسىنە دەيىن وقىپ شىعۋى كەرەك. ءوز باسىم ماعان حابارلاسىپ كەڭەس سۇراعان جەرلەستەرىمنىڭ بارلىعىنا سونى ايتامىن. قازىر كاسىپقوي بوكسقا اۋىسىپ جاتقان جاستاردىڭ كوبىسى ماعان حابارلاسادى. كەلىسىمىڭدى بەرمەس بۇرىن باسقا بوكسشىلارمەن سويلەسىپ, سول پروموۋشن جايلى زەرتتەپ العان ءجون.
قايتالاپ ايتامىن, كاسىپقويلار اراسىندا ونەر كورسەتكىسى كەلەتىن بىلعارى قولعاپ شەبەرى الدىمەن قۇجاتتارعا باسا ءمان بەرگەنى ءجون. سەبەبى كەلىسىمشارتىڭىزدىڭ ءبىر بۇرىشىندا كورىنەر-كورىنبەس ارىپتەرمەن قاعازدا جازىلعاننىڭ ءبارىن جوققا شىعاراتىن پۋنكتتەر بولۋى ابدەن مۇمكىن. ياعني, جىلداپ تەگىن جۇمىس ىستەگەننەن گورى اۋدارماشىعا نەمەسە زاڭگەرگە اقشا تولەپ, بارلىق ماسەلەنىڭ باسىن بىردەن اشىپ العان ءجون.
– اۋەسقوي بوكستا ازيا چەمپيوناتىندا توپ جاردىڭىز, حالىقارالىق تۋرنيرلەردە ۇزدىك اتانىپ ءجۇردىڭىز. چەمپيوندىق جولدى جالعاستىرۋعا نە كەدەرگى بولدى؟
– اۋەسقوي بوكستا ازدى-كوپتى باعىمدى سىناپ كوردىم. دەگەنمەن, كاسىپقوي بوكسقا اۋىساتىن ۋاقىت جەتكەنىن ءتۇسىندىم.
شىنى كەرەك, بالا كۇنىمنەن ماعان اۋەسقوي بوكس ۇنامايتىن. بىراق ءبىزدىڭ ەلدە كاسىپقوي بوكسقا اۋىسىپ كەتۋگە بۇرىن مۇمكىندىك از ەدى. سوندىقتان اۋەسقويلار اراسىندا وزىمە ءبىراز تاجىريبە جيناپ الۋىم كەرەك دەپ قانا جۇرەتىنمىن. اۋەسقوي بوكستى ءوز باسىم كاسىپقوي بوكسقا دەيىنگى ساتى دەپ قاراستىردىم. بوكستا ءوزىن دامىتقىسى كەلەتىن جاستارعا دا بىرتىندەپ وسى سپورتقا بەت بۇرۋعا كەڭەس بەرەمىن. بىراق بۇل شەتەلدىك پروموۋتەرلەرگە قۇلدىققا بار دەگەنىم ەمەس. مەنىڭشە, الەۋەتى مول بوكسشىلارعا كاسىپقوي بوكسقا جول سالۋ كەرەك. ايتپەسە قۇراماعا ىلىگە الماعان قانشاما دارىندى جىگىتتەر كۇزەتشى قىزمەتىنەن ءارى اسا الماي ءجۇر.
– دانيار جايلى ناقتىلاي كەتسەك. كاسىپقوي بوكسقا اۋىسۋ تۋرالى ويىنان باس تارتۋىنا نە سەبەپ؟ اعاسى رەتىندە ونىڭ بۇل شەشىمىن قولدايسىز با؟
– نەگىزى بۇل سۇراققا دانياردىڭ ءوزى جاۋاپ بەرگەنى دۇرىس شىعار. ال مەنىڭ بۇعان قاتىستى پىكىرىم ەكىۇداي. اۋەسقوي بوكستا ءبىراز بەلەستى باعىندىردى, ەندى كاسىپقوي بوكستا شىڭدالا تۇسسە ەكەن دەپ ەدىم. وعان دانياردىڭ مۇمكىندىگى جەتەدى. ەڭبەكقور, تابيعات بەرگەن دارىنى دا بار. بىراق باستاپقى كەلىسىمشارت كوڭىلدەن شىقپاعان سوڭ, كاسىپقوي بوكسقا بارۋ رايىنان باس تارتىپ, اۋەسقوي بوكسقا ورالۋدى ءجون كوردى. ول كىشكەنتاي بالا ەمەس. شەشىمدى ءوزى قابىلدايدى. ال مەن ونى اعاسى رەتىندە قاي كەزدە دە قولدايمىن.
– اڭگىمەڭىزگە راحمەت.
اڭگىمەلەسكەن ءمادينا اسىلبەك, جۋرناليست