اقتاۋدا ء«سوز بەن ساز» اتتى اۆتورلىق باعدارلامانىڭ تۇساۋى كەسىلگەنىنە ءبىر جىل بولدى.
ماڭعىستاۋ وڭىرىندە, جالپى قازاق دالاسىندا اۋەندەرى شىرقالىپ جۇرگەنمەن وزدەرى تاسادا قالعان نەمەسە ومىردەن ءوتىپ كەتكەن سازگەرلەردى حالىققا تانىتۋ, ناسيحاتتاۋ ماقساتىنداعى باعدارلاما كورەرمەن ىقىلاسىنا بولەنىپ كەلەدى.
– اقتاۋدا بەلگىلى «شالقىمالى» ءانىنىڭ اۆتورى, ءانشى-سازگەر, اقىن, جۋرناليست تالعات اتشىباەۆ اعامىزدىڭ قارالى نامازى ءوتىپ جاتقان كەز. اعايىن-تۋىس, ەل-جۇرتى ءوز الدىنا, قايعىدان قان جۇتقان ونەر ادامدارى تالانتتى اعالارىن قيماي تۇنجىراپ تۇرعان. وسى كەزدە ءانشى بايمۇرات «اتتەڭ, ءبىزدىڭ اسىلدى تىرىسىندە باعالاي بىلمەيتىن وتە ناشار ادەتىمىز بار... قازاقتىڭ تالانتتى قانشا ۇلى مەن قىزى كوزى تىرىسىندە قولداۋسىز, قوشامەتسىز, ناسيحاتسىز كەتتى؟! ولگەن سوڭ وتىرىك مۇلايىمسىگەندەي بولىپ جۇرگەن جوقپىز با, الدە دارىندىلاردىڭ تەك ولگەنىن عانا كۇتەمىز بە؟ – دەپ كۇيىنىپ, ءبىر يدەيانىڭ ۇشىن سىلتەگەندەي بولدى. ويلانا كەلە, ء«سوز بەن ساز» باعدارلاماسىنىڭ تۇساۋىن كەستىك, دەيدى جوبا اۆتورى بەردىحان المەن.
باعدارلاما اياسىندا ءبىر جىل ىشىندە ءۇش رەت كونتسەرت وتكىزىلىپ, العاشقى كونتسەرتتە 22 سازگەردىڭ باسىن قوسسا, ەكىنشى كونتسەرتكە – 18, ءبىر جىلدىققا وراي ۇيىمداستىرىلعان ءۇشىنشى كونتسەرتكە 12 سازگەر قاتىسقان. وسى ۋاقىت ارالىعىندا بارلىعى 63 سازگەردىڭ 584 ءانى «قازاقستان-اقتاۋ» تەلەارناسى ارقىلى ناسيحاتتالعان. اتالمىش جوباعا تەك ماڭعىستاۋلىق قانا ەمەس, ەلىمىزدىڭ تاراز, قىزىلوردا, اتىراۋ, الماتى, استانا, شىمكەنت, سەمەي قالالارىنان سازگەرلەر قاتىسىپ, ءوز اندەرىن تىڭدارماندارعا ۇسىندى. ولاردىڭ اراسىندا وكتەم التاەۆ, كەنتاۋ نازاربەك, بەكجىگىت سەردالى, ابدىرەيىم ءومىروۆ, ساۋرانبەك ەلەۋوۆ, ابدىعاپار تەمىروۆ سىندى سازگەرلەر بار. ءۇشىنشى كونتسەرتتە «قىزدارعا اسەمدىك جاراسادى» انىمەن تىڭدارمانىن ءتانتى ەتكەن قوستانايلىق قايرات نۇرعازين, «قىزدار-اي, قىزدار», «مەنى ويلاپ قام جەمەشى» اندەرىنىڭ اۆتورى تارازدىق ءۇمىت بيتەنوۆا, قىزىلوردادان «قورقىت اتا قوبىزى» ءانىنىڭ اۆتورى رامازان تايمانوۆ قوناق رەتىندە قاتىستى.
جۇرتشىلىقتىڭ ىقىلاسىنا يە بولعان باعدارلاما تۋرالى جوبا اۆتورى تەڭىز جاعاسىندا اۋقىمدى كونتسەرت وتكىزۋ جانە ماڭعىستاۋ وڭىرىندەگى 1936 جىلى تۋىلعان ش.سابىتاەۆتان باستاپ, قازىرگى ەڭ جاس سازگەر, ق.نۇرتاس, ت.ءتورالى اندەرىن جازىپ جۇرگەن جەرلەسىمىز – ءو.امانگەلديەۆ اراسىنداعى سازگەرلەردىڭ شىعارمالارىن جيناقتاپ, ءان ماتىندەرى مەن نوتالارى باسىلعان «ماڭعىستاۋ سازگەرلەرىنىڭ انتولوگياسىن» شىعارىپ, وبلىس مەكتەپتەرى مەن مادەنيەت ۇيلەرىنە تاراتۋ, سونداي-اق ء«سوز بەن سازدىڭ» ەفيردەن وتكەن ساندارىن DVD ديسكى تۇرىندە تاراتۋ جوسپارى بار ەكەندىگىن ايتتى.
گۇلايىم شىنتەمىرقىزى, «ەگەمەن قازاقستان»
ماڭعىستاۋ وبلىسى