بۇل تۋرالى وقو وڭىرلىك كوممۋنيكاتسيالار قىزمەتىندە وتكەن ءباسپاسوز ءماسليحاتىندا دەنساۋلىق ساقتاۋ باسقارماسىنىڭ باسشىسى مۇقان ەگىزباەۆ حابارلادى. ونىڭ ايتۋىنشا, رەسپۋبليكالىق كورسەتكىشتەن تومەن مۇنداي جەتىستىككە وبلىستا تۇڭعىش رەت قول جەتكىزىلدى.
«وبلىستا انالار جانە نارەستەلەر ءولىم-ءجىتىمىن تومەندەتۋ ماقساتىندا جۇيەلى شارالار قولدانىلىپ, بالالار مەن بوساناتىن ايەلدەرگە جاردەم بەرۋ قىزمەتىندە مەديتسينالىق كومەك كورسەتۋدىڭ بىرىكتىرىلگەن ۇلگىسى تابىستى ەندىرىلدى. قولدانىلىپ جاتقان شارالار ناتيجەسىندە سوڭعى بىرنەشە جىل ىشىندە كورسەتكىشتەردىڭ تۇراقتى تومەندەۋىنە قول جەتكىزىلدى. ستاتيستيكا كوميتەتىنىڭ مالىمەتتەرى بويىنشا وبلىستا انا ءولىم-ءجىتىمىنىڭ كورسەتكىشى اعىمداعى جىلدىڭ 8 ايىندا 41,7% ازايىپ, العاش رەت رەسپۋبليكالىق كورسەتكىشتەن تومەن بولدى. اعىمداعى جىلعى 9 ايىنىڭ الدىن الا مالىمەتتەرى بويىنشا انا ءولىم-ءجىتىم كورسەتكىشى 2 ەسەگە تومەندەدى», - دەدى م.ەگىزباەۆ.
سپيكەرگە سەنسەك, وڭتۇستىك قازاقستان وبلىسىندا «جول كارتاسى» شەڭبەرىندە 2017 جىلعى 9 ايىنىڭ قورىتىندىسىمەن, دەنساۋلىق ساقتاۋ جۇيەسىنىڭ نەگىزگى ينديكاتورلارىنا قول جەتكىزىلدى. وبلىستا 5 نەگىزگى الەۋمەتتىك ءمانى بار جۇقپالى ەمەس اۋرۋلار – ءجىتى ميوكارد ينفاركتى, مي قاناينالىمىنىڭ ءجىتى بۇزىلىسى (ينسۋلت), قاتەرلى ىسىكتەر, جاراقاتتار, انا مەن بالا دەنساۋلىعىن قورعاۋ قىزمەتى بويىنشا اۋرۋشاڭدىق جانە ءولىم-ءجىتىم كورسەتكىشتەرى رەسپۋبليكالىق كورسەتكىشتەردەن تومەن.
وڭتۇستىك قازاقستان وبلىسىنىڭ تۇرعىندارىنا 104 مەديتسينالىق ۇيىم كومەك كورسەتەدى. ونىڭ 38-ءى ەمحانالىق جانە 49-ى اۋرۋحانالىق مەكەمە. ولاردا 7950 دارىگەر, 24874 ورتا بۋىن مەديتسينالىق قىزمەتكەر جۇمىس ىستەيدى.