«اۋىلىڭدا قارتىڭ بولسا جازىپ قويعان حاتپەن تەڭ» دەيدى حالىق دانالىعى. شىمكەنتتەگى ورتالىق ساياباقتا سالاماتتى ءومىر سالتىن قالىپتاستىرۋ ماقساتىندا «التىن جاس» اتاۋىمەن قارتتار كۇنى اتالىپ ءوتتى. شاراعا وبلىس اكىمى جانسەيىت تۇيمەباەۆ ارنايى كەلىپ, ارداگەرلەردى قۇتتىقتادى, سىي-سياپات تاپسىردى.
بۇل كۇنى ساياباققا كەلگەن قارتتاردى وبلىستىڭ تاڭداۋلى دارىگەرلەرى دياگنوستيكالىق تەكسەرۋلەردەن وتكىزىپ, ەمدەلۋ جولدارىن ايتتى. ولارعا ستوماتولوگتار, كارديولوگتار, تەراپەۆتەر, ەندوكرينولوگتار مەن وكۋليستەر قىزمەت كورسەتتى. زەينەتكەرلەر قان قىسىمدارىن ولشەتىپ, كوزدەرىن كورسەتىپ, ۋدز اپپاراتىنىڭ كومەگىمەن اعزاسىن تەكسەرتىپ, ەكسپرەسس-اناليزدەر تاپسىردى.
ساياباققا جينالعان جۇرت كونتسەرتتىك باعدارلامامەن قاتار ارداگەرلەر اراسىندا وتكەن شاحمات ءتۋرنيرىنىڭ كۋاسى بولدى. كوتەرىڭكى كوڭىل-كۇي سىيلاۋعا ۇمتىلعان مىڭ بۇرالعان كاسىبي بيشىلەر, انشىلەرمەن جارىسا وبلىستاعى ىنتىماعى جاراسقان بارلىق ەتنوس وكىلدەرى ءان شىرقادى.
– قارتتار – ءبىزدىڭ باعا جەتپەس قازىنامىز, – دەيدى وبلىستىق دەنساۋلىق ساقتاۋ باسقارماسىنىڭ باسشىسى مۇحان ەگىزباەۆ. – ولار وسىنداي جاقسى ومىرگە جەتۋ ءۇشىن بار كۇش-جىگەرىن جۇمسادى, قاجىرلى ەڭبەك ەتتى. ەندى ونىڭ وتەۋى قايتۋى كەرەك. ءبىز قارتتار ءۇشىن وبلىس كولەمىندەگى اۋرۋحانا, ەمحانالاردا «اشىق ەسىك» كۇندەرىن ۇيىمداستىرعان بولاتىنبىز. ال 1 قازاننان باستاپ مەديتسينا قىزمەتكەرلەرى ۇلى وتان سوعىسىنا قاتىسقان ارداگەرلەردىڭ ۇيىنە وزدەرى بارىپ, دارىگەرلىك كومەك كورسەتەدى.
بۇل شارا الداعى ۋاقىتتا دا جالعاسىن تابا بەرەدى.
باقتيار تايجان, «ەگەمەن قازاقستان»
وڭتۇستىك قازاقستان وبلىسى