ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى يگىلىكتى ىستەردىڭ التىن قازىعىنا اينالدى. وسى باعدارلاما اياسىندا ۇلتتىق كاسىپكەرلەر پالاتاسى «اتامەكەنىم» اتتى اكتسيا باستادى.
بيزنەس يەلەرىن بۇقارا حالىققا جاقسىلىق جاساۋعا شاقىراتىن ناۋقان اتىراۋلىق دينارا ەرتىلەۋوۆاعا كۇتپەگەن قۋانىش سىيلادى. ءبىر بالاسى بار جالعىزباستى انا بۇگىنگە دەيىن پاتەر جالداپ كەلگەن ەدى. دارىگەرلەر جۇرەگى مەن وكپەسىنە ترانسپلانتاتسيا جاساۋ كەرەكتىگىن ايتقان. 2011 جىلى مۇگەدەكتىگى بويىنشا تۇرعىن ءۇي كەزەگىنە تۇرعانمەن, باسىبايلى باسپانالى بولۋدىڭ اۋىلى ءالى الىس. دينارانىڭ اۋىر جاعدايىنان حاباردار بولعان اتىراۋ وبلىستىق كاسىپكەرلەر پالاتاسى ايماقتىق كەڭەسى پاتەر الىپ بەرۋگە شەشىم شىعاردى. ايماقتىق كەڭەس ءتورايىمى ءاليا بەكقوجيەۆانىڭ قولىنان جاڭا پاتەردىڭ كىلتىن العان دينارا ەرتىلەۋوۆا: «بۇل مەنىڭ ومىرىمدەگى ەڭ باقىتتى كۇن» دەپ العىسىن ايتتى.
«مەملەكەت باسشىسى, ۇكىمەت بيزنەستىڭ دامۋىنا قاجەت جاعدايدىڭ ءبارىن جاساپ وتىر. الىستاعى اۋىل حالقىنىڭ كاسىپ اشۋىنا دا قولداۋ كورسەتەتىن باعدارلامالار بار. كاسىپكەر رەتىندە الەۋمەتتىك جاۋاپكەرشىلىكتى سەزىنىپ, قينالعاندارعا قول ۇشىن بەرۋىمىز كەرەك. ۇلتتىق كاسىپكەرلەر پالاتاسىنىڭ «اتامەكەنىم» اكتسياسىنا قاتىسۋدى پارىزىمىز دەپ بىلەمىن. بارلىق بيزنەس يەلەرىن جاقسىلىق جاساۋعا شاقىرامىن», دەيدى ءاليا بەكقوجيەۆا.
«اتامەكەن» ۇلتتىق كاسىپكەرلەر پالاتاسى رەسمي سايتتارىندا الەۋمەتتىك ماسەلەلەر ءتىزىمىن جاساۋدى قولعا العان. قولداۋ مەن كومەكتى قاجەت ەتكەندەر ەندى ينتەرنەت ارقىلى سۇرانىس قالدىرا الادى.
باقىتگۇل باباش, «ەگەمەن قازاقستان»