قازاقستان مەن قىتاي اراسىندا ءبىر جىل ىشىندە 5 ملرد تەكشە مەتر قازاقستاندىق گاز جەتكىزۋ تۋرالى تاريحي كەلىسىمشارتقا قول قويىلدى. «قازترانسگاز» اق - ۇلتتىق وپەراتورىنىڭ كۇتىلەتىن ەكسپورتتىق ءتۇسىمى شامامەن 1 ملرد اقش دوللارىن قۇراماق, دەپ حابارلايدى كومپانيانىڭ ءباسپاسوز قىزمەتى.
«قازترانسگاز» اق جانە «PetroChina International Company Limited» كومپانياسى اراسىندا ساتىپ الۋ-ساتۋ شارتى جاسالدى». گازدى ەكسپورتاۋ جۇمىستارى 15 قازاننان باستالادى دەپ جوسپارلانىپ وتىر. گاز ءوندىرىسىنىڭ رەسۋرستىق بازاسى قازاقستاننىڭ باتىسىنان جانە «قازترانسگاز» اق-نىڭ جەراستى قويمالارىنداعى گاز قورلارىنان الىنباق.
قىتاي تاراپىنان گازدى قابىلداۋ ورنى رەتىندە «قورعاس» شەكارا بەكەتى انىقتالدى», دەلىنگەن كومپانيا حابارلامادا.
«قازترانسگاز» ۇك اق-نىڭ گاز تاسىمالداۋ جانە ماركەتينگ جونىندەگى ۆيتسە-پرەزيدەنتى قايرات شارىپباەۆتىڭ ايتۋىنشا, قازاقستاندىق گازدى تاسىمالداۋدىڭ ەكسپورتتىق جانە ترانزيتتىك باعىتتارىن ءارتاراپتاندىرۋ, سونىمەن قاتار, كوگىلدىر وتىندى ەكسپورتتاۋ كولەمىن ارتتىرۋ - قازاقستان پرەزيدەنتى قويعان نەگىزگى ستراتەگيالىق تالاپتاردىڭ ءبىرى.