ساعىنتاەۆ شىمكەنت مۇناي-وڭدەۋ زاۋىتىندا بولدى

باقىتجان ساعىنتاەۆ ءموز-ءدى ارالاۋ بارىسىندا زاۋىتتى جاڭعىرتۋدىڭ ءبىرىنشى كەزەڭىنىڭ ناتيجەلەرىمەن تانىسىپ, كاسىپورىننىڭ شاعىن يزومەريزاتسيالاۋ تەحنولوگيالىق پروتسەسى (مۇنايدىڭ تومەنگى وكتاندى فراكتسيالارىنان تاۋارلىق بەنزيننىڭ جوعارعى وكتاندى كومپونەنتتەرىن الۋ) جۇرەتىن ءارى ك-4, ك-5 (ەۋرو4, ەۋرو5) ستاندارتتارىنا جاۋاپ بەرەتىن بەنزين شىعارىلاتىن وندىرىستىك عيماراتتاردىڭ بىرىندە بولىپ قايتتى.  

شىمكەنت ءموز-ءدى جاڭعىرتۋ جۇمىستارى 2011 جىلى ۇدەمەلى يندۋستريالدى-يننوۆاتسيالىق دامۋ مەملەكەتتىك باعدارلاماسى اياسىندا باستاۋ الدى جانە ول 2 كەزەڭنەن تۇرادى. 2017 جىلدىڭ جازىندا جاڭعىرتۋدىڭ ءى كەزەڭى اياقتالدى. كاسىپورىندا شيكىزاتتى الدىن الا گيدروتازالاۋ بلوگى بار, جەڭىل بەنزين فراكتسيالارىن يزومەريزاتسيالاۋ قوندىرعىسى ورناتىلدى. كۇكىرت شىعارۋ قوندىرعىسى پايدالانۋعا بەرىلدى, ديزەلدىك وتىندى گيدروتازالاۋ قوندىرعىسى رەكونسترۋكتسيالاندى. زاۋىت كەزەڭدى اياقتاعان سوڭ, ك4 جانە ك5 ەكولوگيالىق توبىنىڭ ديزەلدىك وتىنى مەن جوعارعى وكتاندى بەنزيندى وندىرە الادى.

جاڭعىرتۋدىڭ ەكىنشى كەزەڭى 2018 جىلى اياقتالۋى ءتيىس. ايتا كەتكەن ءجون, قازىرگى تاڭدا شىمكەنت ءموز ءۇش قازاقستاندىق ءموز شىعاراتىن مۇناي ونىمدەرىنىڭ جالپى كولەمىنىڭ 30%-ىن وندىرەدى. بۇل - قازاقستاننىڭ وڭتۇستىك وڭىرىندە, رەسپۋبليكانىڭ حالىق تىعىز ورنالاسقان بولىگىندە ورنالاسقان جالعىز مۇناي وڭدەۋ زاۋىتى. قولايلى گەوگرافيالىق ورنالاسقان جەرى مەن جوعارى تەحنولوگيالىق مۇمكىندىكتەرىن ەسكەرسەك, كاسىپورىننىڭ ىشكى جانە سىرتقى نارىقتارعا ءونىم جەتكىزۋ مۇمكىندىگى مول. 

شىمكەنت ءموز قۋاتتىلىعى 5,25 ملن توننانى نەمەسە جىلىنا شامامەن 40,65 ملن باررەل مۇنايدى قۇرايدى. زاۋىتتىڭ مۇناي ونىمدەرىنىڭ سۇرىپتاماسى بەنزيننىڭ ءتۇرلى سۇرىپتارىنان (اي-80, اي-92, اي-96), ديزەلدىك وتىننان, اۆياتسيالىق كەروسيننەن, تومەندەتىلگەن گازدان, ۆاكۋمدىق گازويلدان, مازۋت پەن كۇكىرتتەن تۇرادى. سونىمەن قاتار, قازىرگى تاڭدا ۇكىمەت مەملەكەت باسشىسىنىڭ جولداۋىنا سايكەس, ەكونوميكالىق ءوسىمنىڭ جاڭا مودەلىن قالىپتاستىرۋ جولىندا جۇمىستار اتقارىپ جاتىر. مۇندا جاڭا يندۋستريالاردى قۇرۋمەن قاتار, ءداستۇرلى بازالىق سالالاردىڭ, سونىڭ ىشىندە مۇناي-گاز سەكتورىنىڭ دامۋىنا قارقىن بەرۋ كوزدەلگەن. ۇكىمەت بۇگىندە بيزنەسپەن بىرلەسىپ, بازالىق سالالاردى 2025 جىلعا دەيىن تەحنولوگيالىق قايتا جاراقتاندىرۋ بويىنشا كەشەندى شارالاردى جوسپارلاۋمەن اينالىسۋدا.