استانادا «قازاقستاننىڭ 100 جاڭا ەسىمى» جوباسى بويىنشا جۇمىس جانە ساراپشىلار توبىنىڭ كەزەكتى وتىرىسى ءوتتى. وتىرىسقا اقپارات جانە كوممۋنيكاتسيالار ءمينيسترى داۋرەن اباەۆ, قازاقستان حالقى اسسامبلەياسىنىڭ توراعاسى دارحان مىڭباي جانە جوبا ۇيىمداستىرۋشىلارى, قوعام بەلسەندىلەرى قاتىستى.
– ەلباسى ۇسىنعان «رۋحاني جاڭعىرۋ» باعدارلاماسىنىڭ اياسىنداعى بۇل جوبا - ونەرىمەن, بىلىمىمەن, قوعامعا سىڭىرگەن ەڭبەگىمەن, ەرەكشە قاسيەتىمەن دارالانعان تالانتتى ازاماتتارىمىزعا ۇلكەن مۇمكىندىك ۇسىنىپ وتىر. وسىعان ساي, جاڭا ەسىمدەردى انىقتاۋدا جۇرتشىلىق تا جوعارى بەلسەندىلىك تانىتۋدا,– دەدى داۋرەن اباەۆ.
وزدەرىڭىزگە ءمالىم, بيىل 7 ماۋسىمنان باستاپ 15 قىركۇيەككە دەيىن ەلىمىزدىڭ تۇكپىر-تۇكپىرىنەن جوباعا قاتىسۋشىلاردان وتىنىشتەر قابىلداندى. وسى ۋاقىت ىشىندە El.kz پورتالىندا ەكى مىڭ ەكى ءجۇز ون ەكى كانديدات تىركەلدى. قازىرگى كۇنى ولاردى ىرىكتەۋ جۇمىستارى جۇرگىزىلىپ جاتىر.
– سونىمەن قاتار, قاتىسۋشىلاردى ىرىكتەۋدەن بولەك ولاردىڭ تابىستارىنىڭ تاريحىن اقپارات قۇرالدارىندا جان-جاقتى كورسەتە ءبىلۋ دە اسا ماڭىزدى,– دەگەن مينيستر مۇنداي قادام شارانىڭ تاربيەلىك ءارى يدەولوگيالىق تۇرعىدان ناتيجەلى بولاتىندىعىن اتاپ ءوتتى.
اقپارات جانە كوممۋنيكاتسيالار مينيسترلىگى مەن قازاقستان حالقى اسسامبلەياسى بۇل باعىتتى ىسكە اسىرۋ بويىنشا دا جۇيەلى شارالاردى قولعا الۋدا. سولاردىڭ ىشىنەن «استانا» تەلەارناسى تۇسىرگەن فيلم ءۇزىندىسى كوپشىلىك نازارىنا ۇسىنىلدى.
ايا ءومىرتاي,
«ەگەمەن قازاقستان»