«ۇلتتىڭ ۇلى جازۋشىسى اۋەزوۆ الەمى» دەگەن اتپەن ەلورداداعى ۇلتتىق اكادەميالىق كىتاپحانادا دوڭگەلەك ۇستەل ءوتتى.
بيىل زاڭعار جازۋشى, اكادەميك مۇحتار اۋەزوۆتىڭ تۋعانىنا 120 جىل. «اباي جولى» رومان-ەپوپەياسى ارقىلى وشپەس داڭققا بولەنگەن جازۋشىنىڭ ادەبيەت پەن عىلىم ءۇشىن سىڭىرگەن ەڭبەگى ۇشان-تەڭىز. ول ەڭبەكتەردىڭ كوبى زەرتتەلدى, ءبارىنىڭ باسىن قوسسا توم-توم كىتاپتار شىعاتىنى دا داۋسىز. وعان قوسا جازۋشىنىڭ ماڭدايى جارقىراپ, جان-جاعىنا نۇر شاشقان بەينەسىن سومداعان ەستەلىكتەر مەن ەسسەلەردەن, باسقا دا ماتەريالداردان حالقىمىزدىڭ ۇلى جازۋشىعا دەگەن قۇرمەتى مەن سۇيىسپەنشىلىگىن تانۋعا بولادى. اۋەزوۆتىڭ ءسان-سالتاناتى كەلىسكەن سۇلۋ الەمى بارلىق كەزدە وزىنە ماگنيتتەي تارتىپ تۇراتىنىنىڭ دالەلى بۇل. دوڭگەلەك ۇستەل بارىسىندا ايتىلعان وي-پىكىرلەردىڭ قاي-قايسىسى دا جازۋشىنى جاقسى ءبىر قىرىنان كورسەتىپ, تۇلعاسىن بيىكتەتە تۇسكەندەي اسەردە بولدىق.
شارا بارىسىندا ساياسي عىلىمدار دوكتورى, پروفەسسور كامال بۇرحانوۆ كەزىندە اۋەزوۆتىڭ 90 جىلدىعى تويلانعان ۇلكەن جيىنعا كۋاگەر بولعانىن باياندادى. سول كەزەڭدەردە قازاقستان كوممۋنيستىك پارتياسى ورتالىق كوميتەتىنىڭ ءبىرىنشى حاتشىسى بولعان كولبيننىڭ جيىندا شاتىپ-بۇتىپ, كىسى اتتارىن دا دۇرىس ايتپاي جاساعان بايانداماسىنان سوڭ اقىن ولجاس سۇلەيمەنوۆتىڭ جارىسسوزگە شىققانىن ايتتى. ولجاس اۋەزوۆ تۋرالى ايتىلعان «يزۆەستنىي پيساتەل» دەگەن سوزگە شۇيلىككەن. ء«بىز وسىدان ون جىل بۇرىن اۋەزوۆتى « ۇلى» دەگەنبىز. ول ۇلى جازۋشى بولعان, ۇلى جازۋشى بولىپ قالا بەرەدى» – دەگەن ماعىناداعى ءسوزدى ايتقان ەكەن اقىن. كامال بۇرحانوۆ جەر بەتىندە قازاق دەگەن حالىق باردا اۋەزوۆتىڭ دە داڭقى بيىكتەي بەرەتىنىنە سەنىم ءبىلدىردى.
سونداي-اق اقىن سەرىك تۇرعىنبەك ۇلىنىڭ دا مۇحتار اۋەزوۆ تۋرالى ايتقان وي-پىكىرلەرى تارتىمدى ءارى قىزىقتى بولدى. ول زاڭعار جازۋشىنىڭ ءتۇبى تۇركى ەكى تۇلعاعا ۇلكەن جاقسىلىق جاساعانىن جەتكىزدى. ونىڭ ءبىرى تاتاردىڭ ۇلكەن اقىنى – مۇسا جالەل بولسا, ەكىنشىسى – «ادامزاتتىڭ ايتماتوۆى» اتانعان قىرعىز جازۋشىسى شىڭعىس ايتماتوۆ. ەكەۋىنىڭ دە لەنيندىك سىيلىق الۋىنا ىقپال ەتكەن. راس تاتاردىڭ اقىنى ول كەزدە تىرىلەر ساناتىندا جوق ەدى. ال شىڭعىس ايتماتوۆ سونداي ءىرى سىيلىقتى العاندا نەبارى 28 جاستا ەكەن.
جالپى دوڭگەلەك ۇستەل بارىسىندا ءىرى جازۋشىنىڭ كىسىگە جاساعان قامقورلىعى تۋرالى از ايتىلعان جوق. سونداي-اق ونىڭ ادەبيەت پەن عىلىمداعى سۇبەلى ەڭبەكتەرى دە اتالدى. ءتىپتى ءالى كۇنگە «اباي جولىنىڭ» تاساسىندا قالىپ كەلە جاتقان ەڭبەكتەرى تۋرالى دا ءسوز بولدى. مۇنى دوڭگەلەك ۇستەلدى جۇرگىزگەن فيلولوگ عالىم يمانعازى نۇراحمەت باسا ايتىپ وتىردى. ول بولاشاقتا وسى ەڭبەكتەردى زەرتتەۋ قاجەتتىگىنە دە باسا ءمان بەردى.
ايگۇل سەيىل, «ەگەمەن قازاقستان»