كەشە ۇكىمەتتىڭ ءباسپاسوز ورتالىعىندا ەكسپو-2017 حالىقارالىق كورمەسىندە ۇسىنىلعان يننوۆاتسيالىق تەحنولوگيالاردى قازاقستاننىڭ اگروونەركاسىپ كەشەنى سالاسىنا قولدانۋ تاقىرىبىندا بريفينگ ءوتتى.
ءباسپاسوز ءماسليحاتىنا اۋىل شارۋاشىلىعى ۆيتسە-ءمينيسترى گۇلميرا يساەۆا, «قازاگرو» اق باسقارما توراعاسىنىڭ ورىنباسارى گۇلناز اتامقۇلوۆا, سونداي-اق «اگروتەحنولوگيالار ترانسفەرتى جانە كوممەرتسيالاندىرۋ ورتالىعى» جشس باس ديرەكتورىنىڭ مىندەتىن اتقارۋشى ازامات سادىقوۆ جانە «قازاقستان ۇلتتىق اگرارلىق ۋنيۆەرسيتەتى» كەاق سۋ رەسۋرستارى جانە مەليوراتسيا كافەدراسىنىڭ PhD دوكتورى زۇلپىحار باۋىرجان قاتىسىپ, كورمەنىڭ اگروتەحنولوگيالار سالاسىنداعى ءرولى تۋرالى ايتىپ بەردى.
گ.يساەۆانىڭ ايتۋىنشا, ەكسپو-2017 تەك الەمدىك ەنەرگەتيكادا عانا ەمەس, سونىمەن قاتار كوپتەگەن وزگە سالالاردا دا, سونىڭ ىشىندە اگروتەحنولوگيالار سالاسىندا دا يننوۆاتسيالار الاڭىنا اينالدى.
«ەلىمىزدىڭ اۋىل شارۋاشىلىعى مينيسترلىگى اسا قىزىقتى جاڭا تەحنولوگيالاردى ىرىكتەۋ ماقساتىندا ارنايى جۇمىس توبىن قۇردى. بۇل توپ بىرنەشە رەت اۋىل شارۋاشىلىعى سالاسىنداعى الدىڭعى قاتارلى تەحنولوگيالاردى تانىستىرۋعا, سەمينارلار مەن كەزدەسۋلەرگە قاتىستى», دەدى گ.يساەۆا. قازاقستاندا قولدانۋ ىقتيمالدىعىمەن اۋىل شارۋاشىلىعى ءۇشىن 15 ەلدەن 66 جاڭا تەحنولوگيا ىرىكتەلىپ الىندى. ولاردىڭ اراسىندا اۋىلشارۋاشىلىق قالدىقتارىنان ەنەرگيا جانە جانعىش ماتەريالدار الۋ, بالدىر بيوماسساسىن, تىڭايتقىشتار الۋ تەحنولوگيالارى, ءداندى داقىلدار ءوسىرۋ تەحنولوگيالارى, اۋىل شارۋاشىلىعى ايماقتارى ءۇشىن بەينە-مونيتورينگتىڭ ۇشقىشسىز اۆياتسيالىق كەشەندەرىن پايدالانۋ جانە ت. ب. يننوۆاتسيالىق جوبالار بار.
ىرىكتەلىپ الىنعان تەحنولوگيالار عىلىمي-ساراپتامالىق باعا الۋ ماقساتىندا «ۇاعبو» كەاق سالالىق ينستيتۋتتارىنا جىبەرىلگەن. سونىمەن قاتار ەكسپو-2017 اياسىندا الەمدىك جەتەكشى عىلىمي-زەرتتەۋ ورتالىقتارىمەن جانە ازىرلەۋشىلەرمەن ىنتىماقتاستىق ورناتىلدى. كورمە اۋىل شارۋاشىلىعىن دامىتۋعا ىقپال ەتەتىن جانە قازاقستان مەن وزگە ەلدەر اراسىنداعى قارىم-قاتىناستى جانداندىرۋعا كومەك بەرەتىن زاماناۋي يننوۆاتسيالىق اگروتەحنولوگيالاردى باعالاۋعا ۇلكەن مۇمكىندىك بەردى, دەيدى گ. يساەۆا.
ال «قازاگرو» اق باسقارما توراعاسىنىڭ ورىنباسارى گۇلناز اتامقۇلوۆانىڭ ايتۋىنشا, قازاقستاندىق يننوۆاتسيالىق اگروجوبالار ەكسپو-2017 كورمەسىندە ۇزدىكتەر قاتارىندا بولعان. گ.اتامقۇلوۆا سونىمەن قاتار «جاسىل» تەحنولوگيالاردى اۋىل شارۋاشىلىعىندا قولدانۋدىڭ تيىمدىلىگىن جانە قازاقستاننىڭ ورگانيكالىق ونىمدەر وندىرىسىندەگى الەۋەتىن كورسەتكەن «قازاگرو» حولدينگىنىڭ ەكسپوزيتسياسى تۋرالى دا باياندادى. ول, سونداي-اق كەلۋشىلەر وتاندىق اوك دامۋىنىڭ زاماناۋي كەزەڭىمەن جانە قازاقستاندا ورگانيكالىق اۋىل شارۋاشىلىعى پەرسپەكتيۆالارىمەن تانىسقانىن, رەسۋرس ۇنەمدەيتىن تەحنولوگيالار قولدانىلاتىن «قازاگرو» جوبالارىنا ۆيرتۋالدى ساياحات جاساۋ مۇمكىندىگىنە يە بولعانىن تىلگە تيەك ەتتى. ماسەلەن, ەكسپو قوناقتارى قۇرعاق بيە ءسۇتى وندىرىسىمەن تانىسۋ جانە كۇركەتاۋىق ەتى ءوندىرىسى مەن قايتا وڭدەۋدىڭ تولىق تسيكلىن كورۋ, قازاقستانداعى ەڭ ءىرى ونەركاسىپتىك جىلىجايدى, سونداي-اق ەمدامدىك ءسۇت ونىمدەرى ءوندىرىسىن ارالاۋ مۇمكىندىگىنە يە بولعان.
گ.اتامقۇلوۆا ەكسپو-2017 كورمەسىن وتكىزۋ كەزەڭىندە حولدينگتىڭ ەكسپوزيتسياسىن الەمنىڭ ءارتۇرلى ەلدەرىنەن 10 مىڭنان استام ادام ارالاعانىن دا اتاپ ءوتتى. سونداي-اق كورمە اياسىندا 2017 جىلعى 25 تامىزدا «اگروينۆەستفورۋم 2017» ۇيىمداستىرىلعان. فورۋمعا الەمنىڭ 18 ەلىنەن 200-دەن استام قاتىسۋشى, ونىڭ ىشىندە ءىرى شەتەلدىك ينۆەستيتسيالىق قورلار مەن قارجى ۇيىمدارىنىڭ 40-قا جۋىق وكىلى, سونىمەن قاتار قازاقستاندىق جانە شەتەلدىك اگروبيزنەس وكىلدەرى قاتىسقان. فورۋمنىڭ قورىتىندىسى بويىنشا قازاقستاننىڭ اۋىل شارۋاشىلىعى سالاسىنا ينۆەستيتسيالار تارتۋ, ونى ەكونوميكالىق ارتاراپتاندىرۋعا قولداۋ كورسەتۋ بويىنشا بىرقاتار ماڭىزدى كەلىسىمدەر مەن مەموراندۋمدارعا قول قويىلعان.
دينارا بىتىك, «ەگەمەن قازاقستان»