قازاقستان رەسپۋبليكاسى ءدىن ىستەرى جانە ازاماتتىق قوعام ءمينيسترى نۇرلان ەرمەكباەۆ جۇمىس ساپارىمەن قىرعىزستاندا بولدى. مينيستر بىشكەك قالاسىنداعى «الا-ارچا» مەملەكەتتىك رەزيدەنتسياسىندا وتكەن «قازىرگى زاماناۋي زايىرلى مەملەكەتتەگى يسلام» تاقىرىبىندا ۇيىمداستىرىلعان حالىقارالىق كونفەرەنتسياعا قاتىستى.
كونفەرەنتسيا جۇمىسى قىرعىز رەسپۋبليكاسىنىڭ پرەزيدەنتى المازبەك اتامباەۆتىڭ قۇتتىقتاۋ سوزىمەن اشىلدى.
كونفەرەنتسيا بارىسىندا نۇرلان ەرمەكباەۆ قىرعىز رەسپۋبليكاسىنىڭ پرەزيدەنتى المازبەك اتامباەۆقا جانە وسىنداي ماڭىزدى شارانى ۇيىمداستىرعان قىرعىز ۇكىمەتىنىڭ وكىلدەرىنە العىس ءبىلدىردى.
قازاقستان رەسپۋبليكاسىنىڭ ءدىن ىستەرى جانە ازاماتتىق قوعام ءمينيسترى نۇرلان ەرمەكباەۆ ءوز سوزىندە راديكاليزم كورىنىستەرىنە قارسى كۇرەس باعىتىن كورسەتە وتىرىپ, دەسترۋكتيۆتى ءدىني اعىمدار يدەيالارىنىڭ ناسيحاتتالۋ ماسەلەسىن كوتەردى.
«كەڭەس ۇكىمەتى كەزەڭىنىڭ وزىندە ءبىزدىڭ حالىقتارىمىزدىڭ اراسىندا ادامداردىڭ دىنگە دەگەن كوزقاراسىنا قاراماستان, بەيبىتشىلىك پەن تولەرانتتىلىققا باعىتتالعان ءدىني داستۇرلەر قالىپتاسقان بولاتىن. ءبىز ءدىني مۇرالارىمىزدى زامان تالاپتارىنا سايكەس بەيىمدەپ, ساقتاپ قالۋىمىز كەرەك. تەك زايىرلى قوعام عانا كوپكونفەسسيالى ورتادا ءوزىنىڭ ءدىني تەڭدىگىن قامتاماسىز ەتە الادى», – دەپ ءوز ويىن ورتاعا سالدى نۇرلان ەرمەكباەۆ.
مينيستر حالىقارالىق ىنتىماقتاستىقتى تەرەڭدەتۋ جانە ءدىني نەگىزدە ەكسترەميزمنىڭ الدىن الۋ سالاسىندا تاجىريبە الماسۋ مەن بىرلەسكەن شارالاردى قابىلداۋ ماقساتىندا ءدىني قىزمەت سالاسىن رەتتەيتىن ورتالىق ازيا ەلدەرىنىڭ ۆەدومستۆولارى اراسىندا حالىقارالىق كونسۋلتاتيۆتىك كەڭەس قۇرۋ تۋرالى ۇسىنىس ءبىلدىردى.
«بىزگە, مەملەكەت قايراتكەرلەرى, عىلىم مەن ءدىن جولىنداعى تۇلعالار – ءبارىمىز ءدىني ەكسترەميزم مەن راديكاليزم تاراپىنان تۋىندايتىن قاۋىپ-قاتەرلەرگە قارسى بىرىگۋىمىز كەرەك... مۇنداي كەڭەس وڭىرلىك فورماتتا بىرلەسكەن ءتيىمدى جۇمىس تەتىكتەرىن قالىپتاستىرۋعا جول اشادى. بىرلەسىپ شەشىمدەردى جۇزەگە اسىرۋ ارقىلى دەسترۋكتيۆتى كۇشتەرگە قارسى تۇرا الامىز», – دەپ اتاپ ءوتتى قر ءدىن ىستەرى جانە ازاماتتىق قوعام ءمينيسترى نۇرلان ەرمەكباەۆ. سونداي-اق مينيستر كونفەرەنتسيا قاتىسۋشىلارىن مەملەكەتتىڭ جانە دىندەردىڭ ءوزارا ارەكەتتەسۋى جولىندا قازاقستاندىق مودەلىن قالىپتاستىرۋ باعىتىندا قازاقستان ۇكىمەتى تاراپىنان اتقارىلىپ جاتقان شارالارمەن تانىستىردى. زاڭدى تۇردە جۇمىس ىستەيتىن بارلىق ءدىني بىرلەستىكتەرمەن ىنتىماقتاستىق ورناتۋ ارقىلى ازاماتتاردىڭ ار-وجدان بوستاندىعىنا دەگەن قۇقىقتارىن قامتاماسىز ەتۋدەگى مەملەكەت قولعا الىپ وتىرعان جۇمىستار تۋرالى ايتتى.
مينيستر قازاقستاندىق قوعام ەتنوسارالىق جانە دىنارالىق كەلىسىمدى ساقتاۋدىڭ بىرەگەي ۇلگىسى بولىپ سانالاتىندىعىن اتاپ ءوتتى. وسىنداي وڭتايلى تاجىريبەنىڭ نەگىزىندە پرەزيدەنت نۇرسۇلتان نازارباەۆ الەمدىك ءداستۇرلى ءدىن كوشباسشىلارىنىڭ سەزىن وتكىزۋ تۋرالى باستاما جاسادى. قازىرگى زايىرلى مەملەكەتتەردە يسلامنىڭ ورنى مەن ءرولىن تالقىلاۋ كونفەرەنتسيانىڭ باستى تاقىرىبىنا اينالدى. قاتىسۋشىلار مەملەكەتتەردىڭ ۇلتتىق مادەني ەرەكشەلىكتەرىن ساقتاۋ, تەرىس ءدىني قۇندىلىقتاردىڭ تارالۋىن بولدىرماۋ جانە ءدىني سالادا دەموكراتيالىق باسقارۋدىڭ تيىمدىلىگىن ارتتىرۋ قاجەتتىلىگىنە نازار اۋداردى.
كونفەرەنتسيانىڭ اشىلۋ سالتاناتىندا, سونداي-اق ورتالىق ازيا بويىنشا ەۋروپالىق كەڭەستىڭ ارنايى وكىلى پەتەر بۋريان, ءۇندىستاننىڭ سىرتقى ىستەرى جونىندەگى مەملەكەتتىك ءمينيسترى مۋشابار اكبار, وزبەكستان پرەزيدەنتىنىڭ كەڭەسشىسى رۋستام كاميلوۆ, مىسىر اراب رەسپۋبليكاسىنىڭ مادەنيەت ءمينيسترى حەلمي نامنام, تاجىكستان رەسپۋبليكاسىنىڭ ءدىن ىستەرى كوميتەتىنىڭ توراعاسى سۋلايمون داۆلاتوۆ جانە ازەربايجان, بەلگيا, بۇۇ, ەقىۇ-دان كەلگەن باسقا دا مارتەبەلى مەيماندار ءسوز سويلەدى.
كونفەرەنتسيا جۇمىسىنا 19 ەلدىڭ ءدىن سالاسىنداعى ۋاكىلەتتى ورگاندارىنىڭ باسشىلارى, بەدەلدى حالىقارالىق ۇيىمداردىڭ وكىلدەرى جانە تانىمال شەتەلدىك يسلامتانۋشى ساراپشىلار قاتىسۋدا.