ەلوردانىڭ «بارىس» كومانداسى قۇرلىقتىق حوككەي ليگاسىندا كەزەكتى كەزدەسۋىن 25 قىركۇيەكتە سانكت-پەتەربۋرگتىڭ سكا كومانداسىنا قارسى وتكىزىپ, 1:4 ەسەبىمەن ەسە جىبەرگەن ەدى.
ال ارادا ەكى كۇن وتكەندە استاناداعى «بارىس ارەنا» مۇز سارايىندا ءياروسلاۆلدىڭ «لوكوموتيۆ» كومانداسىن قابىلداپ, 6:1 ەسەبىمەن ويسىراتا جەڭدى.
سكا كومانداسىنا قارسى وتكەن ويىننىڭ العاشقى مينۋتتارىندا-اق ارمياشىلاردىڭ شابۋىلشىسى سەرگەي كالينين ءدۋبلدىڭ اۆتورى اتاندى. ماتچتىڭ 58-سەكۋندىندا ەسەپتى اشسا, التىنشى مينۋتتا ەسەپتى 2:0-گە جەتكىزدى. وسىلايشا, ءبىرىنشى كەزەڭ قوناقتاردىڭ ايقىن باسىمدىلىعىمەن ءوتتى. بۇل ارادا قاقپاشى حەنريك كارلسسوننىڭ ورەسكەل قاتەلىكتەر جىبەرگەنىن ايتپاسقا بولمايدى.
قوناقتار ەكىنشى كەزەڭدى دە ءساتتى باستادى. ءبىر ويىنشىسى كوپ بولىپ ويناعان سكا حوككەيشىلەرى ماتچ تىزگىنىن قولعا الىپ, 23-مينۋتتا پاتريك حەرسلي قوناقتاردىڭ ءۇشىنشى شايباسىن سوقتى. ەكىنشى كەزەڭ اياقتالار تۇستا شابۋىلشى الەكساندر بارابانوۆ تابلوداعى كورسەتكىشتى 4:0-گە جەتكىزدى. بۇل جەردە قورعاۋشىلار قاتەلىك جىبەرىپ قويدى.
ءۇشىنشى كەزەڭنىڭ باسىندا «بارىس» كلۋبىنىڭ باپكەرلەر قۇرامى شۆەتسيالىق قاقپاشى حەنريك كارلسسوننىڭ ورنىنا 22 جاستاعى سەرگەي كۋدرياۆتسەۆتى شىعاردى. ال ارادا كوپ ۋاقىت وتپەي كومانداداعى ەڭ جاس حوككەيشى, 19 جاستاعى كيريلل پولوحوۆ سكا كومانداسىنا سوعىلعان جالعىز شايبانىڭ اۆتورى اتاندى. ءسويتىپ كيريلل پولوحوۆ قۇرلىقتىق حوككەي ليگاسىنداعى ءوزىنىڭ العاشقى شايباسىن سوقتى.
اراعا ەكى كۇن سالىپ «بارىس» «لوكوموتيۆ» حوككەي كلۋبىمەن سىنعا ءتۇسىپ, تارتىستى وتكەن ماتچتا جەرلەستەرىمىز 6:1 ەسەبىمەن ايقىن باسىمدىقپەن جەڭدى. بۇل ويىندا قازاقستاندىق شابۋىلشى نيكيتا ميحايليس ەكى شايبا سوعىپ, ماتچ قاھارمانى اتاندى. «بارىس» كلۋبىنان ميحايليستان باسقا مەتت فرەتتين, (24-مينۋت), رومان ساۆچەنكو (43-مينۋت), ليندەن ۆەي (44-مينۋت) جانە كوماندا كاپيتانى نايدجەل دوۋس (52-مينۋت) گول سالدى. ال قوناقتار ساپىنان جالعىز شايبانىڭ اۆتورى دەنيس الەكسەەۆ (29-مينۋت) اتاندى.
بۇل «بارىستىڭ» قحل-داعى سەگىزىنشى جەڭىسى. «شىعىس» ديۆيزيونى بويىنشا تۋرنير كەستەسىندە «بارىس» كومانداسى كەيىنگى ءبىر جەڭىلىس جانە ءبىر جەڭىستەن سوڭ بەسىنشى ورىنعا تۇراقتادى. كوماندانىڭ ەنشىسىندە 25 ۇپاي بار.
ەندى «بارىس» كلۋبى الداعى التى ويىندى سىرت الاڭدا وتكىزەدى. 30 قىركۇيەكتە «تراكتورمەن» (چەليابينسك), 2 قازاندا «نەفتەحيميكپەن» (نيجنەكامسك), 4 قازاندا «دينامومەن» (مينسك), 6 قازاندا «سوچيمەن» (سوچي), 10 قازاندا «اۆانگاردپەن» (ومسك) جانە 12 قازان كۇنى «يۋگرامەن» (حانتى-مانسيسك) كۇش سىناسادى.
ءالي بيتورە, «ەگەمەن قازاقستان»