الماتىدا لاتىن ءالىپبيى تۋرالى دوڭگەلەك ۇستەل ءوتتى.
الماتىداعى «عىلىم ورداسىنىڭ» كىشى زالىندا ش.ءۋاليحانوۆ اتىنداعى تاريح جانە ەتنولوگيا ينستيتۋتىنىڭ ۇيىمداستىرۋىمەن قر پرەزيدەنتى ن.نازارباەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنا وراي جانە لاتىن الىپبيىنە كوشۋ جونىندەگى پرەزيدەنتتىك يدەيانى قولداۋ ماقساتىندا «قازاقستاندا لاتىن ءالىپبيىنىڭ ەنگىزىلۋى: ۇلتتىق بىرەگەيلىك پەن رۋحاني جاڭعىرۋدىڭ نەگىزى» تاقىرىبىندا دوڭگەلەك ۇستەل ءماجىلىسى ءوتتى.
«عىلىم ورداسى» مقك جانە ءال-فارابي اتىنداعى قازۇۋ-ءدىڭ تاريح, ارحەولوگيا جانە ەتنولوگيا فاكۋلتەتىنىڭ قولداۋىمەن وتكىزىلگەن اتالمىش باسقوسۋدا تانىمال عالىمدار, ۇعا اكادەميكتەرى س.قيراباەۆ, ۋ.قاليجان, پرەزيدەنت ءارحيۆىنىڭ ديرەكتورى, تەحنيكا عىلىمدارىنىڭ دوكتورى ب.جاپاروۆ جانە باسقا دا عىلىمي قاۋىمداستىق وكىلدەرى, عىلىمي-زەرتتەۋ ينستيتۋتتارىنىڭ عالىمدارى, ماگيسترانتتارى مەن دوكتورانتتارى قاتىستى.
ش.ءۋاليحانوۆ اتىنداعى تاريح جانە ەتنولوگيا ينستيتۋتىنىڭ ديرەكتورى, پروفەسسور زيابەك قابىلدينوۆ ءوز سوزىندە «ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىندا قازاقستاننىڭ الەمدەگى ەڭ دامىعان 30 ەلدىڭ قاتارىنا قوسىلۋ ءۇشىن الداعى ۋاقىتتا قولعا الاتىن مىندەتتەردى دە سارالاپ بەردى. ولاردىڭ اراسىندا تاياۋ جىلدارى جۇزەگە اسىرۋعا كىرىسەتىن ناق جوبالاردىڭ اراسىندا – قازاق جازۋىن لاتىن ارپىنە كوشىرۋ ماسەلەسى دە بار. ەلباسىمىز «لاتىنشاعا كوشۋدىڭ تەرەڭ لوگيكاسى بار. بۇل قازىرگى زامانعى تەحنولوگيالىق ورتانىڭ, كوممۋنيكاتسيانىڭ, سونداي-اق ءححى عاسىرداعى عىلىمي جانە ءبىلىم بەرۋ پروتسەسىنىڭ ەرەكشەلىكتەرىنە بايلانىستى», دەپ كورسەتە كەلە, قازاق ءالىپبيىنىڭ جاڭا گرافيكاداعى بىرىڭعاي ستاندارتتى نۇسقاسىن قابىلداۋ, ەكى جىل مەرزىم ارالىعىندا وسى ماسەلەگە قاتىستى ۇيىمداستىرۋ جانە ادىستەمەلىك جۇمىستار جۇرگىزۋدى جۇكتەگەن ەدى. سوندىقتان ەلىمىزدىڭ رۋحاني جاڭعىرۋىنىڭ نەگىزى بولىپ تابىلاتىن لاتىن الىپبيىنە قاتىستى حالىق اراسىندا كەڭىنەن ءتۇسىندىرۋ جۇمىستارىن جۇرگىزىپ, قولداۋ ءبىلدىرۋ قاي-قايسىمىزدىڭ دا پارىزىمىز», ەكەنىن اتاپ ءوتتى.
جيىنعا قاتىسۋشىلار جاھاندانۋ ۇردىسىندەگى لاتىن ءالىپبيىنىڭ قولدانىس اياسىنىڭ ماڭىزى, لاتىن الىپبيىنە كوشۋ جانە ونى ەنگىزۋ جولدارى, تاريحي تامىرلارى مەن الەمدىك تاجىريبەسى, لاتىن ءالىپبيىنىڭ مۇمكىندىكتەرى مەن بولاشاعى تۋراسىنداعى ماسەلەلەردى تالقىلاي وتىرىپ, لاتىنعا كوشۋ جونىندەگى پرەزيدەنتتىك باستاماعا تولىقتاي قولداۋ كورسەتەتىندەرىن جەتكىزدى, سونداي-اق جاڭا الىپبيدە پايدالانىلاتىن ارىپتەردى دۇرىس تاڭداۋ جونىندەگى ءوز ۇسىنىستارى مەن تىلەكتەرىن ورتاعا سالدى.
دوڭگەلەك ۇستەل اياسىندا پرەزيدەنت ءارحيۆى 1928-1940 جىلدارداعى قۇندى تاريحي قۇجاتتار كورمەسىن, «عىلىم ورداسىنىڭ» ورتالىق عىلىمي كىتاپحاناسى لاتىن قارپىندەگى سيرەك كىتاپتار كورمەسىن ۇيىمداستىردى.
ميرا بايبەك,
"ەگەمەن قازاقستان"
الماتى