قازاقستان حالىقتارىنىڭ ءتىل فەستيۆالىن اتاپ ءوتۋ اياسىندا سۇلەيمەن دەميرەل اتىنداعى ۋنيۆەرسيتەتتە مەملەكەتتىك ءتىلدىڭ قولدانىس اياسىن كەڭەيتۋگە, ەتنوسارالىق ىنتىماقتاستىقتى, قازاقستان حالىقتارىنىڭ دوستىعى مەن بىرلىگىن ناسيحاتتاۋعا, سونداي-اق, كوپتىلدىلىك ءۇردىسىن دامىتۋعا باعىتتالعان ءتىل اپتالىعى ءوتتى.
ءتىل اپتالىعىنىڭ رەسمي بولىگى ەۋروپالىق تىلدەر كۇنىنە ارنالعان حالىقارالىق سيمپوزيۋممەن اشىلدى. سيمپوزيۋم اياسىندا «كوپتىلدى ءبىلىم بەرۋ داۋىرىندەگى ءتىل ساياساتى مەن مۋلتيمادەني سايكەستىك» تاقىرىبىندا سەمينار وتكىزىلدى. وعان ليتۆا, ۇلىبريتانيا, فرانتسيا, يتاليا ەلشىلىكتەرىنىڭ, يۋنەسكو جانە بۇۇ ۇيىمدارىنىڭ وكىلدەرى, سونداي-اق, كانادادان كەلگەن پروفەسسورلار, سدۋ, قازۇۋ, كيمەپ جانە قازاقستانداعى سوربوننا ينستيتۋتىنىڭ پروفەسسور-وقىتۋشىلارى قاتىستى.
جاھاندانۋ زامانىنداعى تىلدەردىڭ دامۋ تەندەنتسياسىنا قاتىستى بىرقاتار وزەكتى ماسەلەلەرگە توقتالىپ, حالىقارالىق قاتىناس, ديپلوماتيالىق سەرىكتەستىك جانە ءبىلىم بەرۋ سالاسىنداعى جاڭا مۇمكىندىكتەردى نىعايتۋ جونىندە پىكىر الماسقان سيمپوزيۋم قاتىسۋشىلارى بىرنەشە جىلدار بويى كوپتەگەن تىلدەر مەن وركەنيەتتەردىڭ ىقپالىندا بولعان قازاقستان ءۇشىن ماڭىزدى فاكتور سانالاتىن مادەنيەتتەر ديالوگى يدەياسىنىڭ ماڭىزدىلىعىنا ايرىقشا توقتالدى.
ليتۆا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى ۆيتاۋتاس ناۋدۋجاس سۇلەيمەن دەميرەل ۋنيۆەرسيتەتىندەگى ءبىلىم بەرۋ جۇيەسىنە جوعارى باعا بەرە وتىرىپ, الەمنىڭ تۇكپىر-تۇكپىرىندەگى مامانداردىڭ باسىن قوسقان وسىنداي حالىقارالىق سيمپوزيۋم وتكىزۋدىڭ وزەكتىلىگىن اتاپ ءوتتى.
ال ەلباسىنىڭ ۇشتۇعىرلى ءتىل يدەياسىنا سايكەس كوپتىلدى ءبىلىم بەرۋدى جۇزەگە اسىرۋ بويىنشا جۇيەلى جۇمىس جۇرگىزىپ كەلە جاتقان سۇلەيمەن دەميرەل اتىنداعى ۋنيۆەرسيتەت رەكتورى قانات قوجاحمەت: «ۇشتۇعىرلى ءتىل» ستراتەگيالىق جوباسىن ىسكە اسىرۋ بويىنشا ەلباسىنىڭ بەلگىلەگەن باعىتتارىنا سايكەس, كوپتىلدى ءبىلىم بەرۋدى دامىتۋعا قاتىستى اۋقىمدى جۇمىس اتقارۋىمىز قاجەت. ەڭ الدىمەن, بۇل ماسەلە وقىتۋشىلار مەن ءبىلىم الۋشىلاردىڭ لينگۆيستيكا سالاسىنان حاباردار بولۋىن, سونداي-اق ولاردىڭ مۋلتيلينگۆيستيكالىق دايىندىقتارىن تەكسەرۋ مەن باعالاۋدى كوزدەۋى كەرەك. قازىرگى ۋاقىتتا الەمدەگى اقپاراتتىڭ 90 پايىزى اعىلشىن تىلىندە دايىندالادى. ءار ەكى جىل سايىن ونىڭ اۋقىمى ەكى ەسەگە ارتىپ كەلەدى. اعىلشىن ءتىلىنسىز قازاقستان جالپىۇلتتىق دامۋعا قول جەتكىزە المايدى» دەگەن ەدى ەلباسى. الدىمىزداعى 2019 جىلدان باستاپ كەيبىر پاندەر اعىلشىن تىلىندە وقىتىلاتىندىقتان, ۋنيۆەرسيتەتتىڭ پروفەسسورلىق-وقىتۋشىلار قۇرامى ەلباسى تاپسىرماسىن جۇزەگە اسىرۋعا ءىس جۇزىندە ساقاداي ساي. كوپتىلدىلىكتى دامىتۋ قاۋىمداستىعىنىڭ الدىندا تۇرعان ەڭ كۇردەلى مىندەتتەردىڭ ءبىرى – وقىتۋشىلاردىڭ مۋلتيلينگۆيزم سالاسى مامانى رەتىندەگى پوزيتسياسىن قالىپتاستىرۋ. ءبىلىم بەرۋ جۇيەسىندەگى ەڭ قيىن وزگەرىس اعىلشىن ءتىلى نەمەسە فرانتسۋز ءتىلىنىڭ مۇعالىمدەرىن ەمەس, مۋلتيلينگۆيزم ماماندارىن وقىتۋ بولماق», – دەگەن ويلارىن ورتاعا سالدى.
سدۋ ساراپشىلارىنىڭ بولجامى بويىنشا بىرنەشە ءتىل بىلۋگە عانا ەمەس, سونىمەن قاتار, بىرنەشە وركەنيەتتەردىڭ قۇندىلىقتارىن سىڭىرگەن ەرەكشە ويلاۋ قابىلەتىنە نەگىزدەلگەن مۋلتيلينگۆيزم زاماناۋي الەمنىڭ سۇرانىستارىن تولىق قاناعاتتاندىرا الادى.
وقۋ ورداسىنىڭ باسشىسى سونداي-اق, ستۋدەنتتەردىڭ پاتريوتتىق رۋحىن كوتەرۋ, ولاردىڭ اراسىنداعى ەتنوسارالىق بىرلىكتى دامىتۋ ماقساتىندا ءبىراز جۇمىس اتقارىلىپ, ناقتى قادامدار جاسالعانىن تۋرالى ايتا كەلە, وقۋ ورنى قۇرىلعاننان بەرى ماتەماتيكا, ەكى شەت ءتىلى جانە قازاق ءتىلى ماماندىعى بويىنشا پەداگوگتار ازىرلەۋمەن قاتار, بيىلدان باستاپ فيزيكا-ينفورماتيكا, حيميا-بيولوگيا پاندەرى بويىنشا پەداگوگيكا ماماندارىن دايارلاۋ ءۇشىن ارنايى ليتسەنزيا ارقىلى اعىلشىن تىلىندە ءدارىس بەرۋ قولعا الىنا باستاعانىن جەتكىزدى. «قازىرگى تاڭدا سۇلەيمەن دەميرەل ۋنيۆەرسيتەتىنىڭ «پەداگوگيكالىق جانە گۋمانيتارلىق عىلىمدار» فاكۋلتەتىندە 919 ستۋدەنت ءبىلىم الىپ جاتىر. وسى ۋاقىتقا دەيىن فاكۋلتەتتەن 1044 تۇلەك ءبىلىمىن تامامداپ, بۇگىنگى كۇنى وتاندىق جانە الەمدىك بەدەلدى كومپانيالاردا ءبىراز ءتىلدى ەركىن مەڭگەرگەن تابىستى قىزمەتكەرلەرگە اينالدى», – دەدى قانات قوجاحمەت.
ميرا بايبەك,
«ەگەمەن قازاقستان»
الماتى