ءومىرىنىڭ سوڭعى كەزدەرى لەۆ تولستوي جازۋشىلىقتان گورى قاراپايىم تۇرمىستىق جۇمىستاردى ەرەكشە باعالاي باستاپتى.
عۇمىرىنىڭ جارتىسىنان كوبىن جازۋعا ارناعان گراف ودان گورى ەتىك تىگۋ ماعىنالىراق دەپ ەسەپتەپ, 1884 جىلى ياسنايا پوليانادان ماسكەۋدەگى قىستاۋىنا كەلگەن كەزدەن باستاپ سونداعى شەبەردەن ەتىك تىگۋدى ۇيرەنە باستايدى. دۇنيەدە ەشتەڭەگە كىرىپتار بولماعان جازۋشىنىڭ مۇنداي ارەكەتى اينالاسىنداعىلاردىڭ ءبارىن تاڭعالدىرعان. جازۋشىنىڭ ۇلى يليانىڭ ەستەلىگىندە «شاكىرت» اكەسىنىڭ شەبەردەن ساباق العان كەزىندە ءار جاڭا نارسەنى ۇيرەنگەن سايىن بالاشا قۋانعانىن جازادى. سوفيا اندرەەۆنا اپكەسىنە جازعان حاتىندا كۇيەۋىنىڭ كەبىس تىگىپ اكەلگەنىن, ونىڭ ونشا ءساتتى شىقپاعانىن ايتقان.
ارينە جازۋشى, ءارى گراف, ويشىل تولستوي ەتىك تىگۋ ونەرىن ءومىرىنىڭ ماڭىزدى بولىگىنە اينالدىرىپ, كاسىپ ەتەتىن ويى بولماعان. ءوزى ءۇشىن تىگىپ, سودان جان راحاتىن تاپقان. دەگەنمەن گرافتىڭ قولىنان شىققان ەتىكتى كيۋ باقىتى جاقىندارىنا دا بۇيىرىپتى. كۇيەۋ بالاسى م.سۋحوتينگە ەتىك, اقىن ا.فەتكە باتەڭكە تىگىپ بەرگەن. سۋحوتين ەتىكتى ەكى كۇن كيىپ, ىڭعايسىز بولعاندىقتان جازۋشىنىڭ ون ەكى تومدىق شىعارمالار جيناعىنىڭ قاسىنا: «گراف ل.ن.تولستويدىڭ سوڭعى تۋىندىسى» نەمەسە «13 توم» دەگەن جازۋمەن قويعان ەكەن. ونى كورگەن تولستوي: «ەندەشە بۇل مەنىڭ ەڭ جاقسى تۋىندىم» دەگەن. ال فەت بولسا, باتەڭكەنىڭ ساپاسى مەن شەبەر تىگىلگەنىن ماقتاپ, ۇزاق ۋاقىت كيىپ جۇرگەن ەكەن. ءتىپتى 1885 جىلدىڭ 15 قاڭتارىندا ايعاق حات تا جازىپتى.
وندا: «بۇل قاعاز مەنىڭ تاپسىرىسىممەن «سوعىس جانە بەيبىتشىلىك» رومانىنىڭ اۆتورى گراف ل.ن.تولستوي تىگىپ بەرگەن باتەڭكەنى كيىپ جۇرگەنىمدى راستايدى. ەتىكتى مەن 8 قاڭتار كۇنى الدىم, گراف ەڭبەگى ءۇشىن 6 رۋبل الدى. بۇل ايتقانىمدى قولىممەن جانە مورىممەن راستايمىن» دەپ جازىلعان ەكەن. ەتىك تىگۋ تولستويدىڭ مەزەتتىك قانا قىزىعۋشىلىعى بولماعان. 1891 جىلى سوفيا اندرەەۆنا كۇندەلىگىندە گرافتىڭ وزىنە اياق كيىم تىگىپ العانىن جازعانى بار.
كەمەڭگەر جازۋشىنىڭ بۇل ارەكەتى قالىڭ وقىرمانىن ءالى كۇنگە تاڭعالدىرىپ, ءتۇپسىز ويعا جەتەلەپ كەلەدى.
باعاشار تۇرسىنباي ۇلى, «ەگەمەن قازاقستان»