دەموكراتيالىق كۇشتەردىڭ «قازاقستان-2050» ايماقتىق كواليتسياسى, وڭىردەگى لينگۆيستيكالىق ورتالىق, «قازاقستاننىڭ كوممۋنيستىك حالىقتىق پارتياسى», «اۋىل» سوتسيال-دەموكراتيالىق پارتياسىنىڭ وبلىستىق فيليالدارى مەن «جاس وتان» جاستار قاناتىنىڭ وكىلدەرى وسكەمەندە جيىن وتكىزىپ, ەلباسىنىڭ لاتىن قارپىنە كوشۋ جونىندەگى باستاماسىنا قاتىستى پىكىرلەرىن ءبىلدىرىپ, ويلارىن ورتاعا سالدى.
«لاتىن قارپىنە كوشۋ ارقىلى ءبىز مەملەكەتتىك ءتىلىمىزدىڭ ءورىسىن ودان ءارى كەڭەيتىپ, حالىقارالىق دارەجەگە شىعۋىنا جول اشامىز. لاتىن ءالىپبيىن ۇيرەنۋدىڭ ەش قيىندىعى جوق دەپ ويلايمىن. ەڭ باستىسى, قازاق ءتىلىنىڭ ءتول دىبىستارىن بىلدىرەتىن سەگىز ديگرافتى ۇيرەنىپ الساق بولعانى», دەيدى دەموكراتيالىق كۇشتەردىڭ «قازاقستان-2050» ايماقتىق كواليتسياسىنىڭ توراعاسى انۋاربەك مۇحتارحانوۆ.
«اۋىل» سوتسيال-دەموكراتيالىق پارتياسى وبلىستىق فيليالىنىڭ توراعاسى فاريد ابيتاەۆ لاتىن قارپىنە كوشۋ بۇرىن تاجىريبەمىزدە بولعاندىقتان, وسى قارىپپەن ءبىراز ۋاقىت گازەت-جۋرنالدار, كىتاپتار شىققاندىقتان اسا قيىندىق تۋدىرماۋى ءتيىس دەپ سانايدى. «لاتىن قارپىنە كوشۋگە بايلانىستى قوعامدا ءارتۇرلى پىكىرلەر ايتىلىپ جاتىر عوي. ولاي بولۋى زاڭدى دا. قازاق ءتىلىنىڭ بۇرىن دا لاتىن جازۋىنا كوشكەنىن ەسكەرسەك, بۇگىنگى بۇل ءۇردىستىڭ حالىققا ەش قيىندىق تۋعىزبايتىندىعىنا سەنىم مول. ويتكەنى لاتىن قارپى اراب جازۋى نەمەسە كيريلل تاڭباسىنا قاراعاندا قولدانعانعا جەڭىل ءارى قولجەتىمدى. ال اۋىل مەكتەپتەرىن قاجەتتى وقۋلىقتارمەن, ادىستەمەلىك قوسىمشالارمەن قامتاماسىز ەتۋ ماسەلەسى مەملەكەتتىك دەڭگەيدە شەشىلۋى ءتيىس دەپ ويلايمىن», دەيدى ول.
ازامات قاسىم, «ەگەمەن قازاقستان»
وسكەمەن